തിരുവനന്തപുരം: സംസ്ഥാനത്ത് ഏഴ് ജില്ലകളില് പ്ലസ് വണ്ണിന് 20 ശതമാനം സീറ്റുകള് വര്ധിപ്പിച്ചു. കാസര്കോട്, കണ്ണൂര്, വയനാട്, കോഴിക്കോട്, മലപ്പുറം, പാലക്കാട്, തിരുവനന്തപുരം ജില്ലകളിലെ സര്ക്കാര്, എയ്ഡഡ് സ്കൂളുകളിലാണ് സീറ്റ് വര്ധന നടപ്പിലാക്കിയിരിക്കുന്നത്. ബുധനാഴ്ച ചേര്ന്ന മന്ത്രിസഭാ യോഗത്തിലാണ് തീരുമാനം.
ഇലക്ട്രോണിക് മാധ്യമം മുഖേന സമന്സ് നല്കുന്നതിന് 1973ലെ ക്രിമിനല് നടപടി നിയമ സംഹിതയിലെ 69, 91 എന്നീ വകുപ്പുകളില് ഭേദഗതി വരുത്തണമെന്ന് ആവശ്യപ്പെട്ട് കേരള ഹൈക്കോടി രജിസ്ട്രാര്(ജില്ലാ കോടതി) ലഭ്യമാക്കിയ ശുപാര്ശയില് നിയമ നിര്മാണം നടത്താനും മന്ത്രിസഭാ യോഗത്തില് തീരുമാനിച്ചു. സംസ്ഥാനത്ത് വിവിധ സേവനങ്ങള്ക്കായി ഏകീകൃത വിവര സംവിധാനം സജ്ജമാക്കുന്നതിനുള്ള പദ്ധതിക്ക് മന്ത്രി സഭായോഗം തത്വത്തില് അംഗീകാരം നല്കിയിട്ടുണ്ട്. നവകേരളം കര്മ പദ്ധതിയുടെ കോ ഓര്ഡിനേറ്ററായി ഡോ. ടി എന് സീമയെ മൂന്ന് വര്ഷത്തേക്ക് നിയമിക്കാനും മന്ത്രിസഭാ യോഗത്തില് തീരുമാനമായി.