നിങ്ങളുടെ അടുത്ത അവധിക്കാലം വാഗമണിലേക്കാകട്ടെ; സന്ദര്‍ശിക്കാന്‍ പറ്റിയ സ്വപ്നതുല്യമായ സ്ഥലങ്ങള്‍ ഇതാ!
പൈന്‍മരക്കാടും തങ്ങളുപാറയും മൊട്ടക്കുന്നും ഷൂട്ടിങ്ങ് പോയിന്റും ഒക്കെയായി ഒറ്റദിവസം കൊണ്ട് കണ്ടു തീര്‍ക്കാന്‍ പറ്റാത്തത്രയും മനോഹരങ്ങളായ കാഴ്ചകളാണ് ഇവിടെ ഉള്ളത്
എത്ര കണ്ടാലും കൊതി തീരാത്തെ സഞ്ചാരികളുടെ പ്രിയപ്പെട്ട സ്ഥലമാണ് വാഗമണ്‍. കേരളത്തിലെ എല്ലാ ജില്ലകളില്‍ നിന്നുമുള്ള ആളുകള്‍ മനോഹരമായ ഈ പ്രകൃതി ഭംഗി കാണാന്‍ മഴയെന്നോ വെയിലെന്നോ ഉള്ള വ്യത്യാസമില്ലാതെ ഇവിടെ എത്തുന്നു. പൈന്‍മരക്കാടും തങ്ങളുപാറയും മൊട്ടക്കുന്നും ഷൂട്ടിങ്ങ് പോയിന്റും ഒക്കെയായി ഒറ്റദിവസം കൊണ്ട് കണ്ടു തീര്‍ക്കാന്‍ പറ്റാത്തത്രയും മനോഹരങ്ങളായ കാഴ്ചകളാണ് ഇവിടെ ഉള്ളത്.
നിങ്ങള്‍ ശാന്തമായ കാഴ്ചകള്‍ ആസ്വദിക്കാന്‍ ആഗ്രഹിക്കുന്നവരാണെങ്കിലും വലിയ സാഹസികത ആസ്വദിക്കാന്‍ ആഗ്രഹിക്കുന്നവരാണെങ്കിലും അതെല്ലാം ഇവിടെ ലഭിക്കും.
വാഗമണ്‍ വ്യൂ പോയിന്റ്
വാഗമണിലേക്കുള്ള കാഴ്ചകളുടെ തുടക്കം തന്നെ വാഗമണ്‍ വ്യൂ പോയിന്റില്‍ നിന്നുമാണ്. കോട്ടയത്തു നിന്നും തൊടുപുഴ ഭാഗത്തു നിന്നും വരുമ്പോള്‍ പാലാ-ഈരാറ്റുപേട്ട- തീക്കോയി റൂട്ടിലൂടെയാണ് വരേണ്ടത്. ഇവിടെ തീക്കോയി കഴിഞ്ഞ് റോഡിലൂടെ മുന്നോട്ട് പോരുമ്പോള്‍ എത്തിച്ചേരുന്നത് വാഗമണ്ണിന്റെ കവാടത്തിലേക്കാണ്. വാഗമണ്‍ വ്യൂ പോയിന്റില്‍ വണ്ടി നിര്‍ത്തി, കാഴ്ചകള്‍ കാണാതെ മുന്നോട്ട് പോകരുത്. ഐസ്‌ക്രീം നുണഞ്ഞ്, താഴെ, മലമ്പാതകളിലൂടെ കയറ്റം കയറാതെ, കിതച്ചുവലിച്ചു വരുന്ന ബസുകളും, താഴെ താഴ് വാരങ്ങളും അവിടങ്ങളിലെ വീടുകളും പിന്നെ കാട്ടിലൂടെ വെള്ളിനൂല്‍ കണക്കേ ഒലിച്ചിറങ്ങുന്ന വെള്ളച്ചാട്ടങ്ങളും ഒക്കെ ഇവിടെ നിന്നും ആസ്വദിക്കുവാന്‍ പറ്റുന്ന കാര്യങ്ങളാണ്. ഇതല്ലെങ്കില്‍ മാറിമാറിയെത്തുന്ന കോടമഞ്ഞും ആസ്വദിക്കാം.
തങ്ങള്‍പാറ
വാഗമണില്‍ സൗജന്യമായി ആസ്വദിക്കുവാന്‍ കഴിയുന്ന മറ്റൊരു കാര്യമാണ് തങ്ങള്‍പാറയിലേക്കുള്ള കയറ്റവും ഇവിടെ നിന്നുള്ള കാഴ്ചകളും. കോലാഹലമേടിന് സമീപം സ്ഥിതി ചെയ്യുന്ന തങ്ങള്‍പാറ ഷെയ്ഖ് ഫരീദുദ്ദീന്റെ ഖബറിടമാണെന്നാണ് വിശ്വസിക്കപ്പെടുന്നത്. എന്നാല്‍ വിശ്വാസികള്‍ മാത്രമല്ല ഇവിടേക്ക് എത്തിച്ചേരുന്നത്. വാഗമണ്ണിന്റെ കാഴ്ചകള്‍ കാണാന്‍ എത്തുന്നവരുടെ ഒരു സ്ഥിരം സങ്കേതം കൂടിയാണ് തങ്ങളുപാറ. പാറകളും മൂന്നു മലകളും കയറിയിറങ്ങി ചെന്നാല്‍ കിട്ടുന്ന വാഗമണ്ണിന്റെ കാഴ്ച ഒരിക്കലും മറക്കില്ല.
മുരുഗന്‍ ഹില്‍
വാഗമണ്ണിലെ മറ്റൊരു പ്രധാന ഇടമാണ് മുരുഗന്‍ ഹില്‍. ഹൈന്ദവ വിശ്വാസികളുടെ തീര്‍ഥാടന കേന്ദ്രമായി മാത്രമല്ല, വാഗമണ്‍ കാഴ്ചകള്‍ കാണാനെത്തുന്നവര്‍ തേടിപ്പിടിച്ചെത്തുന്ന ഒരിടം കൂടിയാണ് മുരുഗന്‍ ഹില്‍. ചെറിയൊരു ട്രക്ക് ചെയ്തുമാത്രം എത്തുവാന്‍ സാധിക്കുന്ന ഇവിടെ മലയുടെ മുകളില്‍ ഒരു ചെറിയ മുരുകന്‍ ക്ഷേത്രം കാണാം. തികച്ചും ശാന്തവും ആത്മീയവുമായ ഒരു അന്തരീക്ഷമാണ് ഇവിടെയുള്ളത്. അതിനു ചുറ്റുമായി ഒരു ചെറിയ കാവും കാളി ദേവീയുടെ പ്രതിഷ്ഠയും കാണാം. കുരിശുമലയോട് ചേര്‍ന്നു സ്ഥിതി ചെയ്യുന്ന ഇവിടെ സൂര്യോദയവും സൂര്യാസ്തമയവും കാണുവാനാണ് കൂടുതല്‍ ആളുകള്‍ എത്തുന്നത്.
കുരിശുമല
വാഗമണ്ണില്‍ സൗജന്യമായി കാണുവാന്‍ പറ്റിയ വേറൊരു സ്ഥലമാണ് കുരിശുമല. കുരിശുമലയെന്ന് കേള്‍ക്കുമ്പോള്‍ ഒരു ക്രിസ്ത്യന്‍ തീര്‍ഥാടന കേന്ദ്രമെന്ന് കരുതി പോകാതിരിക്കരുത്. വിശ്വാസികളല്ലാത്തവര്‍ക്കും പോയി കാണുവാനും ആസ്വദിക്കുവാനും പറ്റിയ കാഴ്ചകള്‍ ഇവിടെയുണ്ട്. കുരിശുമല ആശ്രമവും ഇവിടുത്തെ ഡയറി ഫാമും എല്ലാവരെയും ആകര്‍ഷിക്കുന്നു. പ്രകൃതി മനോഹരമായ കാഴ്ചകളും എപ്പോഴും വീശുന്ന ഇളംകാറ്റും പിന്നെ ഇടയ്ക്കിടെ തലകാണിക്കുവാനെത്തുന്ന കോടമഞ്ഞും ഇവിടുത്തെ പ്രത്യേകതയാണ്.
തേയിലത്തോട്ടങ്ങളുടെ കാഴ്ചയും മുകളില്‍ നിന്നു നോക്കുമ്പോഴുള്ള മുരുകന്‍ പാറയും സൗന്ദര്യത്തിന് മാറ്റ് കൂട്ടുന്നു. മുകളിലേക്ക് വീണ്ടും കയറിയാല്‍ പ്രമുഖ വാസ്തുശില്‍പിയായിരുന്ന ലാറി ബക്കര്‍ യൂറോപ്യന്‍ മാതൃകയില്‍ നിര്‍മ്മിച്ച ഒരു കെട്ടിടവും കാണാം. വലിയ നോയമ്പ് കാലത്ത് കുരിശിന്റെ വഴിയില്‍ പങ്കെടുക്കുവാന്‍ നൂറു കണക്കിന് വിശ്വാസികളാണ് കുരിശുമലയില്‍ എത്തുന്നത്.
മൊട്ടക്കുന്ന്
വാഗമണ്ണില്‍ ഒഴിവാക്കാന്‍ പറ്റാത്ത കാഴ്ചകളിലൊന്നാണ് ഇവിടുത്തെ ഏക്കറുകളോളം പരന്നു കിടക്കുന്ന മൊട്ടക്കുന്നുകള്‍. വെറും പുല്ല് മാത്രം തളിര്‍ത്തു നില്‍ക്കുന്ന ഇവിടെ കയറിയും ഇറങ്ങിയും കിടക്കുന്ന കുന്നുകളിലൂടെ നടന്നും ഫോട്ടോ എടുത്തും സമയം ചിലവഴിക്കാം. കുട്ടികളും കുടുംബവുമായുള്ള യാത്രയാണെങ്കില്‍ ഭക്ഷണം കൊണ്ടുവന്ന് ഇവിടെയിരുന്ന് കഴിക്കുകയും ചെയ്യാം. സൗജന്യമാണ് ഇവിടേക്കുള്ള പ്രവേശനം.
വാഗമണ്‍ വെള്ളച്ചാട്ടം
പാലൊഴുകുംപാറ വെള്ളച്ചാട്ടം എന്നാണ് യഥാര്‍ഥ പേരെങ്കിലും ഇവിടം സഞ്ചാരികള്‍ക്കിടയില്‍ അറിയപ്പെടുന്നത് വാഗമണ്‍ വെള്ളച്ചാട്ടം എന്നാണ്. ലോവര്‍ പൈന്‍ ഫോറസ്റ്റിനോട് ചേര്‍ന്നാണ് ഈ വെള്ളച്ചാട്ടം സ്ഥിതി ചെയ്യുന്നത്. ഒക്ടോബര്‍ അവസാനമാകുമ്പോഴേയ്ക്കും നിറഞ്ഞൊഴുകും. എന്നാല്‍ അകലെ നിന്നു കാണുവാനേ സാധിക്കുകയുള്ളൂ.
തേക്കടി
പെരിയാര്‍ വന്യജീവി സങ്കേതത്തിന്റെ ആസ്ഥാനമായ തേക്കടി, ഇടതൂര്‍ന്ന വനങ്ങള്‍, ശാന്തമായ തടാകങ്ങള്‍, വൈവിധ്യമാര്‍ന്ന വന്യജീവികള്‍ എന്നിവയാല്‍ സമ്പന്നമാണ്. ആനകളെയും കാട്ടുപോത്തുകളെയും, കടുവയെ പോലും കാണാം. സാഹസികത ഇഷ്ടപ്പെടുന്നവര്‍ക്ക്, പെരിയാര്‍ തടാകത്തിലൂടെയുള്ള മുള റാഫ്റ്റിംഗ്, മൂടല്‍മഞ്ഞുള്ള പാതകളിലൂടെ പ്രകൃതി ഭംഗി ആസ്വദിച്ച് കൊണ്ടുള്ള നടത്തവും, അല്ലെങ്കില്‍ ഏലം, കുരുമുളക്, ഗ്രാമ്പൂ തോട്ടങ്ങളിലൂടെയുള്ള നടത്തവും ഒഴിവാക്കാന്‍ പറ്റാത്തതാണ്.
സന്ദര്‍ശിക്കാന്‍ ഏറ്റവും അനുയോജ്യമായ സമയം: ഒക്ടോബര്‍ മുതല്‍ മാര്‍ച്ച് വരെ (തണുത്തതും വരണ്ടതുമായ കാലാവസ്ഥ).
പ്രധാന ആകര്‍ഷണങ്ങള്‍: പെരിയാര്‍ വന്യജീവി സങ്കേതം, കടത്തനാടന്‍ കളരി കേന്ദ്രം, സുഗന്ധവ്യഞ്ജന തോട്ടങ്ങള്‍. വാഗമണ്ണില്‍ നിന്നുള്ള ഡ്രൈവ് സമയം: ഏകദേശം 1 മണിക്കൂര്‍ 30 മിനിറ്റ് (49 കിലോമീറ്റര്‍).
കുമരകം
വേമ്പനാട് തടാകത്തിന്റെ തീരത്ത് സ്ഥിതി ചെയ്യുന്ന കുമരകം, ശാന്തമായ ഹൗസ് ബോട്ട് ക്രൂയിസുകള്‍ക്കും, സമൃദ്ധമായ പ്രകൃതിദൃശ്യങ്ങള്‍ക്കും, സൈബീരിയന്‍ കൊക്കുകള്‍, ഹെറോണുകള്‍, എഗ്രെറ്റുകള്‍ തുടങ്ങിയ ദേശാടന സഞ്ചാരികള്‍ സീസണല്‍ ആയി എത്തുന്ന പ്രശസ്തമായ പക്ഷിസങ്കേതത്തിനും പേരുകേട്ടതാണ്. തടാകത്തിലെ ഒറ്റപ്പെട്ട പച്ചപ്പ് നിറഞ്ഞ പാതിരാമണല്‍ ദ്വീപിലേക്കുള്ള ബോട്ട് യാത്ര, വിശ്രമത്തിന്റെ മനോഹാരിത വര്‍ദ്ധിപ്പിക്കുന്നു.
ഇവിടെ എത്തുന്ന സഞ്ചാരികള്‍ക്ക് പുലര്‍ച്ചെ പക്ഷിനിരീക്ഷണം നടത്തുകയോ തെങ്ങുകള്‍ ഇടതൂര്‍ന്ന് നില്‍ക്കുന്ന ഇടുങ്ങിയ കനാലുകളിലൂടെ നീന്തുകയോ ചെയ്യാം. സഞ്ചാരികള്‍ക്ക് ശാന്തമായ അന്തരീക്ഷമാണ് ലഭിക്കുന്നത്. ഹൗസ് ബോട്ട് ഡെക്കില്‍ നിന്ന് സൂര്യാസ്തമയങ്ങളില്‍ കരിമീന്‍ ഫ്രൈ പോലുള്ള പ്രിയപ്പെട്ട പ്രാദേശിക വിഭവങ്ങള്‍ ആസ്വദിക്കാനുള്ള അവസരവും നഷ്ടപ്പെടുത്തരുത്.
സന്ദര്‍ശിക്കാന്‍ ഏറ്റവും അനുയോജ്യമായ സമയം: സെപ്റ്റംബര്‍ മുതല്‍ മാര്‍ച്ച് വരെ
പ്രധാന ആകര്‍ഷണങ്ങള്‍: ഏറ്റുമാനൂര്‍ ശ്രീ മഹാദേവ ക്ഷേത്രം, കുമരകം പക്ഷിസങ്കേതം, അരുവിക്കുഴി വെള്ളച്ചാട്ടം
വാഗമണില്‍ നിന്നുള്ള ഡ്രൈവ് സമയം: ഏകദേശം 2 മണിക്കൂര്‍ (76 കി.മീ)
ആലപ്പി
കിഴക്കിന്റെ വെനീസ് എന്ന് പലപ്പോഴും വിളിക്കപ്പെടുന്ന ആലപ്പുഴ, കനാലുകള്‍, തടാകങ്ങള്‍, കണ്ണാടി പോലെ നിശ്ചലമായ കായലുകള്‍ എന്നിവയുടെ സ്വപ്നതുല്യമായ ശൃംഖലയാണ്. ഇതൊക്കെ തന്നെ ആലപ്പുഴയെ കേരളത്തിലെ ഏറ്റവും പ്രശസ്തമായ സ്ഥലങ്ങളിലൊന്നാക്കി മാറ്റുന്നു. നെല്‍വയലുകളിലൂടെയും, മനോഹരമായ ഗ്രാമങ്ങളിലൂടെയും, കായലുകളിലൂടെയുമുള്ള ഹൗസ് ബോട്ട് യാത്ര ഒരു സിനിമാറ്റിക് അനുഭവമാണ്. ചരിത്രപരമായ തുറമുഖത്തിനും വിളക്കുമാടങ്ങള്‍ക്കും പേരുകേട്ട ആലപ്പുഴ ബീച്ചിലേക്ക് പോകാം, അല്ലെങ്കില്‍ സമുദ്രനിരപ്പിന് താഴെ കൃഷി ചെയ്യുന്ന സമൃദ്ധമായ കുട്ടനാട് പ്രദേശം പര്യവേക്ഷണം ചെയ്യാം, ഇതെല്ലാം ഇന്ത്യയിലെ അപൂര്‍വ കാഴ്ചകളാണ്. ഇവിടെ സഞ്ചാരികള്‍ക്ക് നല്ല തണുപ്പ് പ്രദാനം ചെയ്യുന്നു.
സന്ദര്‍ശിക്കാന്‍ ഏറ്റവും അനുയോജ്യമായ സമയം: നവംബര്‍ മുതല്‍ ഫെബ്രുവരി വരെ
ഒഴിവാക്കാനാവാത്ത അനുഭവങ്ങള്‍: പരമ്പരാഗത കേരള ഭക്ഷണങ്ങള്‍, അംഗീകൃത പ്രാക്ടീഷണര്‍മാരുടെ ആയുര്‍വേദ ചികിത്സകള്‍, മഴക്കാലത്ത് വള്ളംകളികള്‍ ആസ്വദിക്കല്‍, ഹൗസ് ബോട്ട് താമസം.
വാഗമണ്ണില്‍ നിന്നുള്ള ഡ്രൈവ് സമയം: ഏകദേശം 3 മണിക്കൂര്‍ (98 കി.മീ)
മൂന്നാര്‍
സമുദ്രനിരപ്പില്‍ നിന്ന് ഏകദേശം 1,600 മീറ്റര്‍ ഉയരത്തില്‍ സ്ഥിതി ചെയ്യുന്ന ഈ മുന്‍ ബ്രിട്ടീഷ് വേനല്‍ക്കാല വിശ്രമകേന്ദ്രം പ്രകൃതിസ്‌നേഹികള്‍ക്കും സഞ്ചാരികള്‍ക്കും ഒരു പറുദീസയാണ്. പച്ചത്തോട്ടങ്ങളിലൂടെ നടക്കുക, പുതുതായി ഉണ്ടാക്കിയ പ്രാദേശിക ചായ കുടിക്കുക, ഹില്‍സ്റ്റേഷന്റെ സാവധാനത്തിലുള്ള ജീവിതം ആസ്വദിക്കുക; ഇവിടെ എല്ലാം വളരെ സിനിമാറ്റിക് ആയി തോന്നും. വംശനാശഭീഷണി നേരിടുന്ന നീലഗിരി താറും 12 വര്‍ഷത്തിലൊരിക്കല്‍ പൂക്കുന്ന അപൂര്‍വ നീലക്കുറിഞ്ഞി പൂവും ഉള്ള ഇരവികുളം ദേശീയോദ്യാനത്തിലേക്ക് കാല്‍നടയാത്ര നടത്തുക. ഒരിക്കലും അമിതമായി തോന്നാത്ത ഒരു തരം ഹില്‍സ്റ്റേഷനാണ് മൂന്നാര്‍. ഇത്രയും പര്യവേക്ഷണങ്ങള്‍ക്ക് ശേഷം, ഹോസ്റ്റലര്‍ മൂന്നാറില്‍ വിശ്രമിക്കുക, ഇതെല്ലാം ഇവിടുത്തെ കാഴ്ചകളാണ്.
സന്ദര്‍ശിക്കാന്‍ ഏറ്റവും അനുയോജ്യമായ സമയം: ഒക്ടോബര്‍ മുതല്‍ മെയ് വരെ
പ്രധാന ആകര്‍ഷണങ്ങള്‍: മൂന്നാര്‍ ടീ മ്യൂസിയം, ആറ്റുകാല്‍ വെള്ളച്ചാട്ടം, മാട്ടുപ്പെട്ടി അണക്കെട്ട്, ടോപ്പ് സ്റ്റേഷന്‍, കാര്‍മലഗിരി എലിഫന്റ് പാര്‍ക്ക്
വാഗമണില്‍ നിന്ന് വാഹനമോടിക്കാന്‍ ഏകദേശം 3 മണിക്കൂര്‍ 12 മിനിറ്റ് (94 കി.മീ)
ഫോര്‍ട്ട് കൊച്ചി
ഫോര്‍ട്ട് കൊച്ചിയിലേക്കുള്ള യാത്രകള്‍ ചരിത്രത്തിലേക്കുള്ള യാത്ര കൂടിയാണ്. വിവിധ കാലഘട്ടങ്ങളിലായി ഇവിടെ വാണ വ്യത്യസ്ത വിഭാഗങ്ങളുടെ സംസ്‌കാരങ്ങള്‍ ഇടകലര്‍ന്ന് ഇന്നും നിലനില്‍ക്കുന്ന സ്ഥലം. കെ.ജെ. ഹെര്‍ഷല്‍ റോഡിലൂടെ നടന്നാല്‍ ഇമ്മാനുവേല്‍ കോട്ടയുടെ ഭാഗങ്ങള്‍ കാണാം. 1503-ല്‍ പണി തീര്‍ത്ത ഈ കോട്ട കൊച്ചി മഹാരാജാവും പോര്‍ച്ചുഗീസ് രാജവംശവുമായുള്ള തന്ത്രപരമായ സഖ്യത്തിന് സാക്ഷ്യം വഹിക്കുന്നു. കുറച്ചു കൂടി മുന്നോട്ടു പോയാല്‍ ഡച്ച് ശവക്കോട്ടയാണ്, മറ്റൊരു കൊളോണിയല്‍ അവശിഷ്ടം. അതിനോട് ചേര്‍ന്ന് താക്കുര്‍ ഹൗസ്. ചായ ലേല രംഗത്തെ പ്രമുഖരായ താക്കൂര്‍ ആന്റ് കമ്പനിയുടേതാണ് ഇതിപ്പോള്‍. ബ്രിട്ടീഷ് ഭരണകാലത്ത് നാഷണല്‍ ബാങ്ക് ഓഫ് ഇന്ത്യയിലെ ഓഫീസര്‍മാരുടെ വാസസ്ഥലമായിരുന്നു ഇത്. നേരത്തേ ഇതിനെ കുന്നേല്‍ ബംഗ്ലാവ് എന്നു വിളിച്ചിരുന്നു.
മറ്റൊരു ആകര്‍ഷണ കേന്ദ്രമാണ് ഡേവിഡ് ഹാള്‍. ഡേവിഡ് കോഡര്‍ എന്ന പ്രസിദ്ധനായ ജൂത പ്രമുഖന്റെ പേരിലാണ് ഇതറിയപ്പെടുന്നത്. കേരളത്തിലെ സസ്യജാലങ്ങളെക്കുറിച്ചുള്ള ആദ്യത്തെ ആധുനിക ശാസ്ത്രപഠന ഗ്രന്ഥമായ ഹോര്‍ത്തുസ് മലബാറിക്കസ് രചിച്ച ഹെന്റിക് അഡ്രിയന്‍ വാന്‍ റീഡ് താമസിച്ചിരുന്നത് ഇവിടെയാണ്. ഇന്ത്യയിലെ ഏറ്റവും പഴയ യൂറോപ്യന്‍ പള്ളിയായ സെന്റ് ഫ്രാന്‍സിസ് പള്ളിയും ഇവിടെ അടുത്താണ്. 1503-ല്‍ പണിത ഈ പള്ളിയിലാണ് വാസ്‌കോ ഡ ഗാമയെ ആദ്യം അടക്കിയത്. തൊട്ടടുത്താണ് വാസ്‌കോ ഡ ഗാമ ചത്വരം. അതുമല്ലെങ്കില്‍ പിയേഴ്‌സ് ലെസ്ലി ബംഗ്ലാവിലേക്കു കടന്ന് കടല്‍ തീരത്തെ അഭിമുഖീകരിക്കുന്ന വരാന്തകള്‍ കാണാം.
വാസ്‌കോ ഡ ഗാമ താമസിച്ചിരുന്നതെന്ന് കരുതുന്ന വാസ്‌കോ ഹൗസ് തീര്‍ച്ചയായും കാണേണ്ട ഒരിടമാണ്. കൊച്ചിയിലെ ഏറ്റവും പഴയ പോര്‍ച്ചുഗീസ് കെട്ടിടങ്ങളില്‍ ഒന്നാണിത്. ചരിത്രങ്ങള്‍ക്കു സാക്ഷ്യങ്ങളായ പഴയ ബിഷപ്പ് ഹൗസും സന്ദര്‍ശകര്‍ക്ക് കൗതുകമാവും. വലിയ ഗോഥിക് ശൈലിയിലുള്ള ദീര്‍ഘ വൃത്താകാരമായ ആര്‍ച്ചുകള്‍ ഇതിന്റെ സവിശേഷതയാണ്. കൊച്ചി ഭദ്രാസനത്തിലെ 27-ാമത്തെ ബിഷപ്പായ ഡോം ജോസ് ഗോമസ് ഫെരേരയാണ് ഇത് പള്ളിക്കായി വാങ്ങിയത്. ഫോര്‍ട്ടു കൊച്ചിയിലെ പല തെരുവുകള്‍ക്കും ആധുനികയുഗത്തിന്റെ സഞ്ചാര വേഗങ്ങളില്ല. തെരുവും, വില്പനശാലകളും, സന്ദര്‍ശകരും നാട്ടുകാരും പതിഞ്ഞ വേഗത്തില്‍ അവരവരുടെ സമയം തേടുന്നതു പോലെ.
സന്ദര്‍ശിക്കാന്‍ ഏറ്റവും അനുയോജ്യമായ സമയം: നവംബര്‍ മുതല്‍ ഫെബ്രുവരി വരെ
അതുല്യമായ അനുഭവങ്ങള്‍: സൂര്യാസ്തമയ സമയത്ത് ചൈനീസ് മീന്‍പിടുത്ത വലകള്‍ കാണുന്നത്, ജൂത പട്ടണത്തിലൂടെയും ഫോര്‍ട്ട് കൊച്ചിയുടെ പൈതൃക മേഖലയിലൂടെയും നടക്കാനുള്ള യാത്രകള്‍, തത്സമയ കഥകളി അല്ലെങ്കില്‍ കളരിപ്പയറ്റ് പ്രകടനത്തില്‍ പങ്കെടുക്കല്‍.
വാഗമണ്ണില്‍ നിന്നുള്ള ഡ്രൈവ് സമയം: ഏകദേശം 3 മണിക്കൂര്‍ 30 മിനിറ്റ് (106 കിലോമീറ്റര്‍)
സൂര്യനെല്ലി
പശ്ചിമഘട്ടത്തിന്റെ ആഴങ്ങളില്‍ സ്ഥിതി ചെയ്യുന്ന സൂര്യനെല്ലി, പനോരമിക് പര്‍വത കാഴ്ചകള്‍, അനന്തമായ തേയിലത്തോട്ടങ്ങള്‍, ഒരു റീസെറ്റ് ബട്ടണ്‍ പോലെ തോന്നിക്കുന്ന തണുത്ത ശുദ്ധവായു എന്നിവ പ്രദാനം ചെയ്യുന്ന ഒരു വ്യത്യസ്തമായ സ്ഥലമാണ്. അയല്‍ക്കാരനായ മൂന്നാറില്‍ നിന്ന് വ്യത്യസ്തമായി, ഈ കുന്നിന്‍ചെരുവിലെ ഗ്രാമം ശാന്തവും തിരക്ക് കുറഞ്ഞതും ഫില്‍ട്ടര്‍ ചെയ്യാത്തതുമായ പ്രകൃതിയാണ്.
ഇവിടുത്തെ ഏറ്റവും മികച്ച അനുഭവങ്ങളിലൊന്ന് ലോകത്തിലെ ഏറ്റവും ഉയരം കൂടിയ ജൈവ തേയിലത്തോട്ടമായ കൊളുക്കുമല ടീ എസ്റ്റേറ്റിലേക്കുള്ള കുണ്ടും കുഴിയും നിറഞ്ഞതും എന്നാല്‍ ആശ്വാസകരവുമായ ജീപ്പ് യാത്രയാണ്, പ്രത്യേകിച്ച് സൂര്യോദയ സമയത്ത്. ശാന്തമായ ആനയിറങ്കല്‍ അണക്കെട്ട് സന്ദര്‍ശിക്കാം, നക്ഷത്രനിബിഡമായ ആകാശത്തിന് കീഴില്‍ ക്യാമ്പ് ചെയ്യാം, അല്ലെങ്കില്‍ ഒരു അജണ്ടയുമില്ലാതെ ഒരു തടാകത്തിനരികില്‍ ഇരിക്കാം. ഇവ എല്ലാം തന്നെ വളരെ ആസ്വാദ്യകരമാണ്.
സന്ദര്‍ശിക്കാന്‍ ഏറ്റവും അനുയോജ്യമായ സമയം: ഒക്ടോബര്‍ മുതല്‍ മാര്‍ച്ച് വരെ
ഒഴിവാക്കാനാവാത്ത അനുഭവങ്ങള്‍: അഡ്വെന്‍ട്രോണ്‍ ഡ്യുവല്‍ സിപ്ലൈന്‍, മീശപുലിമല കൊടുമുടി, ലോക്ക് ഹാര്‍ട്ട് ഗ്യാപ് വ്യൂപോയിന്റ്
വാഗമണില്‍ നിന്നുള്ള ഡ്രൈവ് സമയം: ഏകദേശം 3 മണിക്കൂര്‍ 30 മിനിറ്റ് (102 കി.മീ)
