കൊച്ചി: വധഗൂഢാലോചനാ കേസില് നടന് ദിലീപിനെതിരെ നിര്ണായക തെളിവുകളുണ്ടായിരുന്ന മൊബൈല് ഫോണുകളെത്തിയ മുംബൈ ലാബില് അന്വേഷണ സംഘം പരിശോധന നടത്തി. ഡാറ്റ നീക്കം ചെയ്തതിന്റെ തെളിവുകള് ക്രൈംബ്രാഞ്ച് കണ്ടെടുത്തു.
മൊബൈല് ഫോണിലെ ഡാറ്റ നശിപ്പിച്ചതുമായി ബന്ധപ്പെട്ടുള്ള തെളിവുകളാണ് ശേഖരിക്കാന് കഴിഞ്ഞത്. ആറ് ഫോണുകളിലേയും വിവരങ്ങള് ആദ്യം ഒരു ഹാര്ഡ് ഡിസ്കിലേക്ക് ലാബില് നിന്നും മാറ്റിയിരുന്നു. അതിന്റെ മിറര് കോപ്പി ക്രൈംബ്രാഞ്ചിന് ലഭിച്ചു.
ഫോണുകളിലെ ഡാറ്റ പകര്ത്തിയ ഹാര്ഡ് ഡിസ്കിന്റെ മിറര് കോപിക്ക് പുറമേ, ഫോണുകള് കൊറിയര് ചെയ്തതിന്റെ ബില്, ലാബ് തയ്യാറാക്കിയ ഫോറന്സിക് റിപ്പോര്ട്ട് എന്നിവയടക്കമുള്ള തെളിവുകളാണ് ശേഖരിച്ചത്. ഇതിന്റെ അടിസ്ഥാനത്തില് തെളിവുകള് നശിപ്പിച്ച ദിലീപിന്റെ ജാമ്യം റദ്ദാക്കാന് അന്വേഷണ സംഘം കോടതിയെ സമീപിക്കും. തെളിവ് നശിപ്പിച്ചതിന് ലാബിനെതിരെയും നടപടിക്ക് സാധ്യതയുണ്ട്.
കേസില് നിര്ണായകമായ മൊബൈല് ഫോണ് ഡാറ്റകള് ദിലീപ് നശിപ്പിച്ചതായി അന്വേഷണസംഘം നേരത്തെ കണ്ടെത്തിയിരുന്നു. മുംബൈ ലാബില് കൊണ്ടുപോയി വിവരങ്ങള് നീക്കിയ ശേഷമാണ് ഫോണുകള് കോടതിക്ക് കൈമാറിയെന്നാണ് ഫോറന്സിക് റിപ്പോര്ട്ടിലുള്ളത്. ഫോണുകള് കൈമാറാന് ഹൈക്കോടതി ഉത്തരവിട്ടശേഷമാണ് മുംബൈയില് വെച്ച് ഫോണുകള് ഫോര്മാറ്റ് ചെയ്തയെന്നും ക്രൈംബ്രാഞ്ച് കണ്ടെത്തിയിരുന്നു.
ഇതിന് പിന്നാലെയാണ് മുംബൈയിലെ ലാബില് നിന്ന് അന്വേഷണ സംഘം തെളിവുകള് ശേഖരിച്ചത്.