വന്‍ സര്‍പ്രൈസുമായി ആപ്പിള്‍; ഐഫോണ്‍ 17 പ്രോ മാക്സിന്റെ പേര് മാറ്റിയേക്കും; ഒപ്പം മറ്റ് 3 മാറ്റങ്ങളും
കാലിഫോര്‍ണിയ: ഉപഭോക്താക്കള്‍ക്ക് വന്‍ സര്‍പ്രൈസ് ഒരുക്കി ആപ്പിള്‍ കമ്പനി. വരാനിരിക്കുന്ന ഐഫോണ്‍ 17 പ്രോ മാക്സിന്റെ പേര് മാറ്റിയേക്കുമെന്നാണ് പുറത്തുവരുന്ന റിപ്പോര്‍ട്ടുകള്‍. ആപ്പിള്‍ ഐഫോണ്‍ 17 പ്രോ മാക്സിനെ ഐഫോണ്‍ 17 അള്‍ട്ര എന്ന് പുനര്‍നാമകരണം ചെയ്‌തേക്കാം എന്നും റിപ്പോര്‍ട്ടുകള്‍ സൂചിപ്പിക്കുന്നു. കൊറിയന്‍ ലീക്കര്‍ ആയ yeux1122 ആണ് ബ്ലോഗിലൂടെ ഇക്കാര്യം അറിയിച്ചത്.
പേര് മാറ്റത്തിന് പുറമെ, ഐഫോണ്‍ 17 അള്‍ട്രയില്‍ വരുന്ന മൂന്ന് മാറ്റങ്ങളെക്കുറിച്ചും ടിപ്സ്റ്റര്‍ ബ്ലോഗ് പോസ്റ്റില്‍ പരാമര്‍ശിക്കുന്നുണ്ട്. ചെറിയ ഡൈനാമിക് ഐലന്‍ഡ്, ഒരു വേപ്പര്‍ ചേംബര്‍ കൂളിംഗ് സിസ്റ്റം, ഒരു വലിയ ബാറ്ററി തുടങ്ങിയ മാറ്റങ്ങള്‍ ഐഫോണ്‍ 17 അള്‍ട്രയില്‍ ലഭിക്കും എന്നാണ് പുറത്തുവന്ന റിപ്പോര്‍ട്ട്.
ഐഫോണ്‍ 17 അള്‍ട്ര മാത്രമാണ് ഈ മാറ്റങ്ങള്‍ ലഭിക്കുന്ന ഐഫോണ്‍ 17 നിരയിലെ ഏക ഡിവൈസ് എന്ന അഭ്യൂഹവും ലീക്കര്‍ പങ്കുവയ്ക്കുന്നു. ഐഫോണ്‍ 17 അള്‍ട്രയില്‍ മാത്രമേ ചെറിയ ഡൈനാമിക് ഐലന്‍ഡ് ഉണ്ടാകൂ എന്നാണ് yeux1122യുടെ വാക്കുകള്‍.
കഴിഞ്ഞ വര്‍ഷം, ഐഫോണ്‍ 17 പ്രോ മാക്സില്‍ 'വളരെ ഇടുങ്ങിയ ഡൈനാമിക് ഐലന്‍ഡ്' ഉണ്ടായിരിക്കാമെന്ന് അനലിസ്റ്റ് ജെഫ് പു പറഞ്ഞിരുന്നു, എന്നാല്‍ ഐഫോണ്‍ 17 ന് ചെറിയ ഡൈനാമിക് ഐലന്‍ഡ് ഉണ്ടാകില്ലെന്ന് അവകാശപ്പെട്ട ആപ്പിള്‍ അനലിസ്റ്റ് മിംഗ്-ചി കുവോയുടെ റിപ്പോര്‍ട്ടിന് വിരുദ്ധമാണ് ഈ കിംവദന്തി.
എന്നിരുന്നാലും, വിതരണക്കാരില്‍ നിന്ന് ഓര്‍ഡര്‍ ചെയ്ത അളവിനെ അടിസ്ഥാനമാക്കി, ഐഫോണ്‍ 17 പ്രോ, പ്രോ മാക്സ് മോഡലുകള്‍ ഉള്‍ക്കൊള്ളാന്‍ ഇത് പര്യാപ്തമല്ലെന്ന് ബ്ലോഗിലെ കൊറിയന്‍ ലീക്കര്‍ അവകാശപ്പെടുന്നു, ഇത് ഐഫോണ്‍ 17 അള്‍ട്രയ്ക്ക് മാത്രമേ ചെറിയ ഡൈനാമിക് ഐലന്‍ഡ് ഉണ്ടാകൂ എന്നും സൂചിപ്പിക്കുന്നു.
ഐഫോണ്‍ 17 പ്രോ മോഡലുകളിലോ എല്ലാ ഐഫോണ്‍ 17 മോഡലുകളിലോ ചേംബര്‍ വരാമെന്ന അഭ്യൂഹങ്ങള്‍ക്കിടയിലും, ഐഫോണ്‍ 17 അള്‍ട്രയില്‍ മാത്രമേ വേപ്പര്‍ ചേംബര്‍ ഉണ്ടായിരിക്കുകയുള്ളൂ എന്നും ലീക്കര്‍ ഉറപ്പിച്ചു പറയുന്നു. ഐഫോണ്‍ 17 അള്‍ട്രയ്ക്ക് വലിയ ബാറ്ററി നല്‍കുന്നതിനെക്കുറിച്ചും ബ്ലോഗില്‍ പരാമര്‍ശമുണ്ട്. വലിയ ബാറ്ററി കാരണം ആപ്പിള്‍ ഐഫോണ്‍ 17 പ്രോ മാക്സിന്റെ കനം വര്‍ദ്ധിപ്പിച്ചേക്കാം എന്ന് ഐസ് യൂണിവേഴ്സ് എന്നറിയപ്പെടുന്ന ഒരു ചൈനീസ് ലീക്കര്‍ നേരത്തെ അവകാശപ്പെട്ടിരുന്നു.
2025 സെപ്റ്റംബറില്‍ പുറത്തിറങ്ങുന്ന ഐഫോണ്‍ 17 സീരീസ് ലൈനപ്പില്‍ ഐഫോണ്‍ 17, ഐഫോണ്‍ 17 എയര്‍, ഐഫോണ്‍ 17 പ്രോ, ഐഫോണ്‍ 17 അള്‍ട്രാ തുടങ്ങിയ ഫോണുകളാണ് ടിപ്സ്റ്റര്‍ പ്രതീക്ഷിക്കുന്നത്. എങ്കിലും ഏറ്റവും പ്രീമിയമായ ഐഫോണ്‍ 17 മോഡലിന് ആപ്പിള്‍ 'അള്‍ട്രാ' എന്ന പേര് നല്‍കുമോ എന്ന് കണ്ടറിയണം. ഈ റിപ്പോര്‍ട്ടുകള്‍ ശരിയാണോ എന്ന് വ്യക്തമാകാന്‍ ഐഫോണ്‍ 17-ന്റെ ലോഞ്ച് വരെ നമുക്ക് കാത്തിരിക്കേണ്ടിവരും.
