ബംഗ്ലാദേശിനെതിരെ തോറ്റെങ്കിലും സാഫ് അണ്ടര്‍ 17 വനിതാ ചാമ്പ്യന്മാരായി ഇന്ത്യ
2018ലും 2019ലും കിരീടം ചൂടിയ ഇന്ത്യ ആറു വര്‍ഷത്തെ ഇടവേളക്കു ശേഷമാണ് അണ്ടര്‍ 17 കിരീടത്തിലെത്തുന്നത്
ഭൂട്ടാനിലെ ചാങ്ലിമിതാങ് സ്റ്റേഡിയത്തില്‍ ഞായറാഴ്ച നടന്ന സാഫ് അണ്ടര്‍ 17 വനിതാ ചാമ്പ്യന്‍ഷിപ്പിലെ അവസാന മത്സരത്തില്‍ ഇന്ത്യക്ക് ഏക തോല്‍വി. ബംഗ്ലാദേശിനോട് 3-4 ന് ആണ് ഇന്ത്യ പരാജയപ്പെട്ടത്. എന്നിരുന്നാലും യംഗ് ടൈഗ്രസ്സസ് ചാമ്പ്യന്മാരായി ടീം കിരീടം നേടി, ഒരു മത്സരം ബാക്കി നില്‍ക്കെ പോയിന്റ് പട്ടികയില്‍ അപ്രതിരോധ്യമായ ലീഡ് നേടിയാണ് കിരീട നേട്ടം. യംഗ് ടൈഗ്രസ്സസില്‍ ഇന്ത്യന്‍ ടീം അഞ്ച് മത്സരങ്ങളില്‍ വിജയിക്കുകയും ഒരു മത്സരത്തില്‍ പരാജയപ്പെടുകയും ചെയ്തു. 2018ലും 2019ലും കിരീടം ചൂടിയ ഇന്ത്യ ആറു വര്‍ഷത്തെ ഇടവേളക്കു ശേഷമാണ് അണ്ടര്‍ 17 കിരീടത്തിലെത്തുന്നത്.
നേപ്പാള്‍, ഭൂട്ടാന്‍ എന്നിവരാണ് ടൂര്‍ണമെന്റില്‍ മത്സരിച്ച മറ്റു ടീമുകള്‍. ഒരോ ടീമും രണ്ടു തവണ ഏറ്റുമുട്ടുന്ന ഫോര്‍മാറ്റിലായിരുന്നു മത്സരം ക്രമീകരിച്ചത്. ആദ്യ തവണ ബംഗ്ലാദേശിനെ 2-0ത്തിന് തോല്‍പിച്ച ശേഷമായിരുന്നു, പൂളിലെ അവസാന മത്സരത്തില്‍ ഇന്ത്യ ബംഗ്ലാദേശിനോട് 4-3ന് തോറ്റത്.
ഇന്ത്യക്കായി അനുഷ്‌ക കുമാരി, പ്രിതിക ബര്‍മന്‍, ജുലാന്‍ നോങ്മയ്തം എന്നിവര്‍ സ്‌കോര്‍ ചെയ്തു. ബംഗ്ലാദേശിനായി പൂര്‍ണിമ മര്‍മ, അല്‍പി അക്തര്‍ എന്നിവര്‍ ഓരോ ഗോളും, സൗരവി അകന്‍ഡ ഇരട്ട ഗോളും നേടി.
ഒക്ടോബറില്‍ കിര്‍ഗിസ് റിപ്പബ്ലിക്കിലെ ബിഷ്‌കെക്കില്‍ നടക്കാനിരിക്കുന്ന എഎഫ്സി അണ്ടര്‍ 17 വനിതാ ഏഷ്യന്‍ കപ്പ് യോഗ്യതാ മത്സരങ്ങള്‍ക്കുള്ള തയ്യാറെടുപ്പുകള്‍ തുടരുന്നതിനായി ടീം ബെംഗളൂരുവിലേക്ക് പോകും.
