HASARANGA | സീസണിലെ ടീമിന്റെ ആദ്യ വിജയം; കൊയ്തത് 4 വിക്കറ്റ്; പിന്നാലെ പുഷ്പാ സ്റ്റൈല് ആഘോഷം; രാജസ്ഥാന്‍ റോയല്‍സ് താരം വാനിന്ദു ഹസരങ്കയുടെ പ്രതികരണം ഇങ്ങനെ!
ഗുവാഹത്തി: കഴിഞ്ഞദിവസം രാജസ്ഥാന്‍ റോയല്‍സിനെ സംബന്ധിച്ചിടത്തോളം എന്തുകൊണ്ടും ആഘോഷിക്കേണ്ട ദിവസം തന്നെയായിരുന്നു. ഐപിഎല്‍ സീസണിലെ തുടര്‍ച്ചയായ പരാജയത്തിനുശേഷം ആദ്യമായാണ് ടീം വിജയത്തിലെത്തുന്നത്. അതും ചെന്നൈ സൂപ്പര്‍ കിംഗ്‌സിനെതിരെ നാലു വിക്കറ്റ് വീഴ്ത്തിയാണ് വിജയം.
നേരത്തെ രണ്ടു കളികളിലും ടീം പരാജയപ്പെട്ടിരുന്നു. തുടര്‍ന്ന് ഒരുപാട് വിമര്‍ശനങ്ങള്‍ നേരിടേണ്ടി വരികയും ചെയ്തു. അതിനിടെയാണ് കഴിഞ്ഞദിവസം ചെന്നൈ സൂപ്പര്‍ കിംഗ്‌സിനെതിരെയുള്ള വിജയം. വിജയ ശില്‍പിയായതോ ശ്രീലങ്കന്‍ സ്പിന്നറായ വാനിന്ദു ഹസരങ്കയും.
തന്റെ വിജയം ഹസരങ്ക ശരിക്കും ആഘോഷിച്ചു. ഓരോ വിക്കറ്റെടുത്തശേഷവും പുഷ്പ സ്റ്റൈല് പുറത്തെടുത്താണ് ഹസരങ്ക വിക്കറ്റ് നേട്ടങ്ങള്‍ ആഘോഷിച്ചത്. മത്സരശേഷം ഇതേകുറിച്ചുള്ള ഹസരങ്കയുടെ പ്രതികരണം ഇങ്ങനെയാണ്;
'ദക്ഷിണേന്ത്യന്‍ സിനിമകളോടുള്ള ഇഷ്ടം കൊണ്ടാണ് താന്‍ പുഷ്പ സ്‌റ്റൈലില്‍ വിക്കറ്റ് നേട്ടം ആഘോഷിച്ചത്. താന്‍ ധാരാളം മലയാളം, തമിഴ്, തെലുങ്ക് സിനിമകള്‍ കാണാറുള്ള ആളാണ്'- എന്നും സമ്മാനദാനച്ചടങ്ങില്‍ ഹസരങ്ക വ്യക്തമാക്കി.
ഹസരങ്ക വീഴ്ത്തിയ നാലു വിക്കറ്റുകളും സിക്‌സര്‍ വഴങ്ങിയശേഷമായിരുന്നു. പവര്‍ പ്ലേ പിന്നിട്ടതിന് പിന്നാലെ പന്തെറിയാനെത്തിയ ഹസരങ്ക തന്റെ ആദ്യ ഓവറിലെ ആദ്യ പന്തില്‍ തന്നെ രാഹുല്‍ ത്രിപാഠിയെ വീഴ്ത്തിയാണ് ചെന്നൈക്ക് ആദ്യ പ്രഹരമേല്‍പ്പിച്ചത്. പിന്നാലെ ആതേ ഓവറില്‍ ഹസരങ്കയെ ശിവം ദുബെ സിക്‌സിന് പറത്തി.
തന്റെ രണ്ടാം ഓവറില്‍ ശിവം ദുബെ ഫോറും സിക്‌സും പറത്തിയതിന് പിന്നാലെ അടുത്ത പന്തില്‍ ദുബെയെ റിയാന്‍ പരാഗിന്റെ കൈകളിലെത്തിച്ചാണ് ഹസരങ്ക കണക്കുതീര്‍ത്തത്. സ്പിന്നര്‍മാര്‍ക്കെതിരെ തകര്‍ത്തടിക്കുന്ന ശിവം ദുബെയുടെ വിക്കറ്റ് മത്സരഫലത്തില്‍ നിര്‍ണായകമാകുകയും ചെയ്തു. തന്റെ മൂന്നാം ഓവറിലും സിക്‌സ് വഴങ്ങിയതിന് പിന്നാലെ ഹസരങ്ക വിജയ് ശങ്കറെ ക്ലീന്‍ ബൗള്‍ഡാക്കി.
ഒടുവില്‍ തന്റെ അവസാന ഓവറില്‍ റുതുരാജ് ഗെയ് ക് വാദും ഹസരങ്കയെ സിക്‌സിന് പറത്തിയെങ്കിലും തൊട്ടടുത്ത പന്തില്‍ റുതുരാജിനെ വീഴ്ത്തി ഹസരങ്ക കണക്കുവീട്ടി. മത്സരത്തില്‍ നാലോവറില്‍ 35 റണ്‍സ് വഴങ്ങിയാണ് ഹസരങ്ക നാലുവിക്കറ്റെടുത്തത്. ആദ്യ മത്സരത്തില്‍ ഒരു വിക്കറ്റ് മാത്രം നേടാനെ ഹസരങ്കക്ക് കഴിഞ്ഞിരുന്നുള്ളു. രണ്ട് കളികളില്‍ പിഞ്ച് ഹിറ്ററായി ഇറങ്ങിയെങ്കിലും ഹസരങ്കക്ക് തിളങ്ങാനായിരുന്നില്ല.
