കൊച്ചി: ഓരോ സിനിമാ ലൊക്കേഷനുകളിലും ആഭ്യന്തര പരാതി പരിഹാര സെല് രൂപീകരിക്കണമെന്ന് ഹൈക്കോടതി ഉത്തരവ്. സിനിമാ സംഘടനകളിലും സ്ത്രീകള്ക്കായി ആഭ്യന്തര പരാതി പരിഹാര സംവിധാനം ആരംഭിക്കണമെന്നും ഹൈക്കോടതിയുടെ നിര്ണായക ഉത്തരവ് വ്യക്തമാക്കി. ചീഫ് ജസ്റ്റിസ് അധ്യക്ഷനായ ഡിവിഷന് ബഞ്ചിന്റേതാണ് ഉത്തരവ്. സിനിമയിലെ വനിതാപ്രവര്ത്തകരുടെ കൂട്ടായ്മയായ ഡബ്ല്യു.സി.സിയാണ് ഈ ആവശ്യം ഉന്നയിച്ച് ഹൈക്കോടതിയില് ഹര്ജി നല്കിയത്. നടി ആക്രമിക്കപ്പെട്ടതിന് പിന്നാലെ 2018-ലാണ് ഡബ്ല്യു.സി.സി ഇക്കാര്യമാവശ്യപ്പെട്ട് ഹൈക്കോടതിയെ സമീപിച്ചത്. രാജ്യത്ത് നിലനില്ക്കുന്ന നിയമമുണ്ട്. ഏത് തൊഴില് മേഖലയിലാണെങ്കിലും സ്ത്രീകള്ക്കെതിരെ ചൂഷണം നടന്നാല് അത് പരിഹരിക്കാനും തടയുന്നതിനും ആഭ്യന്തരപരാതി പരിഹാര സെല് വേണം. ഈ നിയമം സിനിമക്കും ബാധകമാണ്. സിനിമയില് ഒട്ടേറെ സ്ത്രീകളാണ് ജോലിചെയ്യുന്നത്-ഹൈക്കോടതി വ്യക്തമാക്കി.
വനിതാകൂട്ടായ്മയുടെ ഈ ആവശ്യം ന്യായമാണെന്ന് സംസ്ഥാനവനിതാ കമ്മീഷന് കോടതിയെ അറിയിച്ചിരുന്നു. കമ്മീഷനെ ജനുവരി 31-നാണ് ഹര്ജിയില് ഹൈക്കോടതി കക്ഷി ചേര്ത്തത്.