Food Biennale | കേരളത്തിലെ ആദ്യത്തെ ഭക്ഷണ മേള 'കല്ലുമ്മക്ക' ബേക്കല്‍ ബീച്ച് പാര്‍ക്കില്‍
ബേക്കല്‍: കല്ലുമ്മക്ക ഫുഡ് ബിനാലെ എന്ന പേരില്‍ കേരളത്തിലെ ആദ്യത്തെ ഭക്ഷണ മേള ബേക്കല്‍ ബീച്ച് പാര്‍ക്കില്‍. ഏപ്രില്‍ അഞ്ച് മുതല്‍ 20 വരെയാണ് ഫുഡ് ബിനാലെ സംഘടിപ്പിക്കുന്നത്. കുടുബശ്രീ കല്ലുമ്മക്ക ഫുഡ് ബിനാലെ ശനിയാഴ്ച വൈകുന്നേരം 5 മണിക്ക് ജില്ലാ പൊലീസ് മേധാവി ശില്‍പ ഡി IPS ഉദ് ഘാടനം ചെയ്യും.
ബി.ആര്‍.ഡി.സി യുടെയും ബേക്കല്‍ ബീച്ച് പാര്‍ക്കിന്റെയും സംയുക്താഭിമുഖ്യത്തില്‍ കുടുംബശ്രീ, ബേക്കലിലെ താജ്, ലളിത്, ഗേറ്റ് വേ എന്നീ പഞ്ചനക്ഷത്ര ഹോട്ടലുകളുടെയും, ഫുഡ് ക്രാഫ് റ്റ് ഇന്‍സ്റ്റിറ്റ്യൂട്ടിന്റെയും സഹകരണത്തോടെ കാസര്‍കോടിന്റെ സ്വന്തം വിഭവങ്ങള്‍ മുതല്‍ ദേശവും കടന്ന് രാജസ്ഥാനിന്റെ രുചിക്കൂട്ടുകള്‍ വരെ കുടുംബശ്രീ സ്റ്റാളുകളില്‍ ഒരുക്കും. ഹൈദരാബാദി ബിരിയാണി, വിവിധ ഇന്ത്യന്‍ ചൈനീസ് വിഭവങ്ങളുടെ സ്റ്റാളുകളുമുണ്ടാവും. ഏഷ്യന്‍ കോണ്ടിനെന്റല്‍ ഭക്ഷണമായിരിക്കും ബേക്കലിലെ പഞ്ചനക്ഷത്ര ഹോട്ടലുകള്‍ ഒരുക്കുക.
ബേക്കലിലെ പഞ്ചനക്ഷത്ര ഹോട്ടലുകളായ താജ്, ലളിത്, ഗേറ്റ് വേ എന്നീ റിസോര്‍ട്ടുകളുടെ സ്റ്റാളുകളില്‍ പ്രീമിയം ഭക്ഷണ വിഭവങ്ങള്‍ ഏപ്രില്‍ 12 മുതല്‍ സന്ദര്‍കര്‍ക്ക് മിതവായ വിലയില്‍ ലഭ്യമാക്കും.
കാസര്‍കോട് കുടുംബശ്രീ ഒരുക്കുന്ന ചിക്കന്‍ സുക്ക, നെയ്പത്തിരി, പുളിവാളന്‍ തുടങ്ങിയ വിഭവങ്ങള്‍, വയനാട് കുടുംബശ്രീ ഒരുക്കുന്ന പോത്തിന്‍ കാല്, മലബാര്‍ ബിരിയാണി, കോഴി പെരട്ട്, തുടങ്ങിയ ഇനങ്ങളും കോഴിക്കോട് കുടുംബശ്രീ ഒരുക്കുന്ന മലബാര്‍ സ്‌നാക്‌സ്, കരിഞ്ചീരക കോഴി എന്നീ വിഭവങ്ങളും അട്ടപ്പാടി കുടുംബശ്രീയുടെ
വനസുന്ദരി, സോലൈ മില്ലന്‍ എന്നീ വിഭവങ്ങളും എറണാകുളം കുടുംബശ്രീ ഒരുക്കുന്നവിവിധ തരം ജ്യൂസുകള്‍ കൊല്ലം കുടുംബശ്രീയുടെ വിവിധ തരം പായസങ്ങള്‍ രാജസ്ഥാനില്‍ നിന്നുള്ള വിവിധയിനം രുചിയേറും വിഭവങ്ങള്‍ എന്നിവയും കുടുംബശ്രീ സ്റ്റാളുകളിലുണ്ടാവും.
കല്ലുമ്മക്കയോടനുബന്ധിച്ച് കുടുംബശ്രീ പ്രവര്‍ത്തകര്‍ക്ക് വേണ്ടി ഏപ്രില്‍ 11 ന് സിനിമാറ്റിക്ക് ഡാന്‍സ്, 12 ന് കൈ കൊട്ടിക്കളി, 19 ന് ഫാഷന്‍ ഷോ, 20 ന് നാടന്‍ പാട്ട്, എന്നീ കലാ പരിപാടികളുടെ മത്സരങ്ങളും നടക്കും. മത്സരത്തില്‍ കുടുംബശ്രീ പ്രവര്‍ത്തകരെ കൂടാതെ മറ്റുള്ളവര്‍ക്കും പങ്കെടുക്കാം. മികച്ച കലാ പ്രകടനങ്ങള്‍ക്ക് ക്യാഷ് അവാര്‍ഡും നല്‍കും. കലാ പരിപാടിയില്‍ പങ്കെടുക്കുന്നവര്‍ പരിപാടിയുടെ രണ്ട് ദിവസം മുമ്പെങ്കിലും 8078515289 എന്ന നമ്പറില്‍ വിളിച്ച് രജിസ്റ്റര്‍ ചെയ്യണം.
ക്യൂ. എച്ച് ഗ്രൂപ്പ് ബി.ആര്‍.ഡി.സിയില്‍ നിന്നും പാര്‍ക്ക് ഏറ്റെടുത്ത ശേഷം സന്ദര്‍ശകരം ആകര്‍ഷിക്കാന്‍ വിവിധ പദ്ധതികളാണ് പാര്‍ക്കില്‍ ഒരുക്കിയത്. 150 അടി ഉയരത്തിലേക്കുയര്‍ത്തിയ പ്ലാറ്റ് ഫോമിലിരുന്ന് കൊണ്ട് കടലിന്റെയും കരയുടെയും കാഴ്ചകള്‍ കണ്ട് ആഘോഷിക്കാനും ഭക്ഷണം കഴിക്കാനുമുള്ള സ്‌കൈ ഡൈനിംഗ്, വിവിധ അഡ്വഞ്ചര്‍ ആക്ടിവിറ്റികള്‍, പെറ്റ് ഫോറസ്റ്റ്, 30 ഓളം സോഫ് റ്റ് ഗെയിംസിന്റെ ആര്‍ക്കേഡ് ഗെയിം സോണ്‍, ഫുഡ് സ്ട്രീറ്റ്, ഷോപ്പിംഗ് സ്ട്രീറ്റ് എന്നിവയും സ്ഥിരമായി പാര്‍ക്കില്‍ ഒരുക്കിയിട്ടുണ്ട്.
കുട്ടികള്‍ക്കും മുതിര്‍ന്നവര്‍ക്കും ആസ്വദിക്കാനുള്ള വൃത്തിയും ഭംഗിയുമുള്ള ബീച്ചിനടുത്തുള്ള ദക്ഷിണേന്ത്യയിലെ മികച്ച പാര്‍ക്കായി ബേക്കല്‍ ബീച്ച് പാര്‍ക്കിനെ മാറ്റിയെടുക്കുക എന്നതാണ് ലക്ഷ്യമെന്ന് ബേക്കല്‍ ബീച്ച് പാര്‍ക്ക് ബി.ആര്‍.ഡി.സിയില്‍ നിന്നും ഏറ്റെടുത്ത ഖത്തര്‍ ഹോസ്പിറ്റാലിറ്റി ഗ്രൂപ്പ് അധികൃതര്‍ അറിയിച്ചു.
വാര്‍ത്താസമ്മേളനത്തില്‍ ബി.ആര്‍.ഡി.സി മാനേജര്‍മാരായ യു. എസ്.പ്രസാദ്, കെ.എന്‍. സജിത്ത്, ബീച്ച് പാര്‍ക്ക് ഡയറക്ടര്‍ അനസ് മുസ്തഫ എ.പി, കുടുംബശ്രീ ജില്ലാ അസിസ്റ്റന്റ് കോര്‍ഡിനേറ്റര്‍ ഹരിദാസ് ഡി, കുടുംബശ്രീ ഐഫ്രം കോര്‍ഡിനേറ്റര്‍ സജിത്ത് വി എന്നിവര്‍ പങ്കെടുത്തു.
