കാസര്‍കോട്: ബി ജെ പി സംസ്ഥാന അധ്യക്ഷന്‍ രാജീവ് ചന്ദ്രശേഖരന്‍ ഏപ്രില്‍ 29 ന് കാസര്‍കോട്ടെത്തുന്നു. ചൊവ്വാഴ്ച രാവിലെ 10 മണിക്ക് കാസര്‍കോട് പുതിയ ബസ് സ്റ്റാന്റ് പരിസരത്തുള്ള ആര്‍.കെ. മാള്‍ ആഡിറ്റോറിയത്തിലാണ് ജില്ലയിലെ വികസിത് കേരള കണ്‍വന്‍ഷന്‍ സംഘടിപ്പിക്കുന്നത്. രാവിലെ 8 മണിക്ക് മണ്ഡലം പ്രസിഡന്റുമാര്‍, ജില്ലാ ഭാരവാഹികള്‍ എന്നിവര്‍ പങ്കെടുക്കുന്ന കോര്‍ കമ്മിറ്റി യോഗം നടക്കും. 9.30 മണിക്ക് പുതിയ ബസ് സ്റ്റാന്റ് പരിസരത്ത് നിന്നും അധ്യക്ഷനെ ആര്‍.കെ. മാളിലേക്ക് സ്വീകരിച്ച് ആനയിക്കും.10 മണിക്ക് വികസിത് കേരള കണ്‍വന്‍ഷന്‍ രാജീവ് ചന്ദ്രശേഖര്‍ ഉദ് ഘാടനം ചെയ്യും. ബിജെപി പഞ്ചായത്ത് ജനറല്‍ സെക്രട്ടറി, ഭാരവാഹികള്‍, സജീവാംഗങ്ങള്‍, 2015, 2020 ലെ തദ്ദേശ തെരഞ്ഞെടുപ്പില്‍ ജനപ്രതിനിധികളായി തെരഞ്ഞെടുക്കപ്പെട്ടവര്‍, 2020 തെരഞ്ഞെടുപ്പില്‍ രണ്ടാം സ്ഥാനത്തെത്തിയ ബിജെപി സ്ഥാനാര്‍ത്ഥികള്‍, പ്രത്യേക ക്ഷണിതാക്കള്‍, എന്‍.ഡി.എ. ജില്ലാ നേതാക്കള്‍ എന്നിങ്ങനെ വിവിധ വിഭാഗങ്ങളില്‍പ്പെടുന്ന പാര്‍ട്ടിയുടെ നേതാക്കളെ അദ്ദേഹം അഭിസംബോധന ചെയ്ത് സംസാരിക്കും. നരേന്ദ്ര മോദി സര്‍ക്കാരിന്റെ പല ജനക്ഷേമ പദ്ധതികളും കേരളത്തില്‍ നടപ്പാകാത്ത സാഹചര്യത്തില്‍ നമ്മുടെ സംസ്ഥാനത്തിന്റെ സമ്പൂര്‍ണ്ണ വികസനം സാധ്യമാക്കാന്‍ തദ്ദേശസ്വയംഭരണ സ്ഥാപനങ്ങളിലും നിയമസഭയിലും ബിജെപിയുടെ പ്രാതിനിധ്യം വര്‍ദ്ധിപ്പിക്കേണ്ടതുണ്ടെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ആസന്നമായ തദ്ദേശ സ്വയംഭരണസ്ഥാപനങ്ങളിലേക്കുള്ള തെരഞ്ഞെടുപ്പിന്റെ ഒരുക്കങ്ങള്‍ ഈ കണ്‍വന്‍ഷനോടെ ആരംഭിക്കും. വാര്‍ത്ത സമ്മേളനത്തില്‍ ജില്ലാ പ്രസിഡന്റ് എം.എല്‍.അശ്വിനി, ജനറല്‍ സെക്രട്ടറി പി.ആര്‍. സുനില്‍ എന്നിവര്‍ സംബന്ധിച്ചു.
