ഉള്ളാള്‍ സയ്യിദ് മദനി 22 ാമത് പഞ്ചവാര്‍ഷിക ഉറൂസിന് ഏപ്രില്‍ 24ന് തുടക്കമാവും
മെയ് 18 വരെ നീണ്ടുനില്‍ക്കുന്ന പരിപാടികളില്‍ പ്രമുഖ പണ്ഡിതരും കേന്ദ്ര സംസ്ഥാന, മന്ത്രിമാരും സംബന്ധിക്കും
കാസര്‍കോട്: ദക്ഷിണേന്ത്യയിലെ പ്രമുഖ തീര്‍ത്ഥാടന കേന്ദ്രമായ ഉള്ളാള്‍ സയ്യിദ് മുഹമ്മദ് ശരീഫുല്‍ മദനി 432 ാം വാര്‍ഷിക 22 ാമത് പഞ്ച വാര്‍ഷിക ഉറൂസ് മുബാറകിന് 2024 ഏപ്രില്‍ 24ന് തുടക്കമാകും. മെയ് 18 വരെ നീണ്ടുനില്‍ക്കുന്ന പരിപാടികളില്‍ പ്രമുഖ പണ്ഡിതരും കേന്ദ്ര സംസ്ഥാന, മന്ത്രിമാരും സംബന്ധിക്കും.
24ന് വൈകിട്ട് ഉള്ളാള്‍ ഖാസിയും ഇന്ത്യന്‍ ഗ്രാന്റ് മുഫ്തിയുമായ കാന്തപുരം എ പി അബൂബക്കര്‍ മുസ്ലിയാരുടെ അധ്യക്ഷതയില്‍ സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്യും. വിവിധ പരിപാടികളില്‍ കര്‍ണാടക മുഖ്യമന്ത്രി സിദ്ധരാമയ്യ ഉപമുഖ്യമന്ത്രി ഡി കെ ശിവകുമാര്‍ സ്പീക്കര്‍ യുടി ഖാദര്‍, സയ്യിദ് കെ എസ് ആറ്റക്കോയ തങ്ങള്‍ കുമ്പോല്‍, സയ്യിദ് ഇബ്രാഹിമുല്‍ ഖലീല്‍ അല്‍ ബുഖാരി, പേരോട് അബ്ദുല്‍ റഹ്‌മാന്‍ സഖാഫി, അബ്ദുല്‍ ഹമീദ് മുസ്ലിയാര്‍ മാണി തുടങ്ങിയവര്‍ സംബന്ധിക്കും.
ഇന്ത്യയിലെ പ്രസിദ്ധമായ തീര്‍ത്ഥാടന കേന്ദ്രമായ ഉള്ളാളിലെ ഉറൂസിന് കേരള-കര്‍ണാടക സംസ്ഥാനങ്ങള്‍ക്ക് പുറമെ ഇന്ത്യയുടെ മറ്റ് കേന്ദ്രങ്ങളില്‍ നിന്നുമായി ദിനംപ്രതി പതിനായിരങ്ങളാണ് സംഗമിക്കുന്നത്. ഉള്ളാളില്‍ അന്ത്യവിശ്രമം കൊള്ളുന്ന ഖുതുബുസ്സമാന്‍ സയ്യിദ് മുഹമ്മദ് ശരീഫുല്‍ മദനി (റ) തങ്ങള്‍ 400 വര്‍ഷങ്ങള്‍ക്കു മുമ്പ് മദീനയില്‍ നിന്നുമാണ് ഉള്ളാളിലെത്തിയത്.
ഉള്ളാളിലും പരിസര പ്രദേശങ്ങളിലും ഇസ്ലാമിക പ്രബോധനം നടത്തിയ മദനി തങ്ങള്‍ ജനഹൃദയങ്ങള്‍ കീഴക്കി. സയ്യിദ് മദനി തങ്ങളുടെ നാമധേയത്തില്‍ നിരവധി വൈജ്ഞാനിക സാംസ്‌കാരിക ആത്മീയ കേന്ദ്രങ്ങള്‍ ഉള്ളാളിലും പരിസരങ്ങളിലുമായി പ്രവര്‍ത്തിക്കുന്നുണ്ട്. ദര്‍ഗ്ഗാ കമ്മിറ്റിക്ക് കീഴില്‍ ശരീഅത്ത് കോളേജ്, ഹിഫ് ളുല്‍ ഖുര്‍ആന്‍ കോളേജ്, സയ്യിദ് മദനി ഹയര്‍ സെക്കണ്ടറി സ്‌കൂള്‍, ആശുപത്രി, മദ്രസകള്‍, പള്ളികള്‍ തുടങ്ങിയവ പ്രവര്‍ത്തിച്ച് വരുന്നു. ആയിരത്തിലേറെ വിദ്യാര്‍ത്ഥികള്‍ പഠനം നടത്തുന്നു. നിരവധി പണ്ഡിതര്‍ സമൂഹത്തില്‍ വ്യത്യസ്ത തലങ്ങളില്‍ പ്രവര്‍ത്തിക്കുന്നുണ്ട്.
സയ്യിദ് മദനി തങ്ങളുടെ സ്മരണക്കായി നടത്തി വരുന്ന പഞ്ചവത്സര ഉറൂസ് മുബാറകിന്റെ ഭാഗമായി മഖാം സിയാറത്ത്, ദിക് റ് മജ് ലിസ്, ഉദ് ഘാടന സെഷന്‍, മദനി മൗലിദ് സദസ്, മദനി സംഗമം, സയ്യിദ് മദനി ഗ്രാന്റ് മസ്ജിദ് ശിലാസ്ഥാപനം, സ്റ്റുഡന്‍സ് സമ്മിറ്റ്, ആദരിക്കല്‍ ചടങ്ങ്, താജുല്‍ ഉലമ സയ്യിദ് അബ്ദുറഹ് മാന്‍ അല്‍ ബുഖാരി & കൂറാ തങ്ങള്‍ അനുസ്മരണം, പ്രവാസി പ്രതിനിധി സമ്മേളനം, ശരീഅത്ത് കോളേജ് & ഹിഫ് ളുല്‍ ഖുര്‍ആന്‍ കോളേജ് പ്രോഗ്രാം, അല്‍ കനഫ് അലുംനി സംഗമം, സയ്യിദ് മദനി നാഷണല്‍ പീസ് കോഫറന്‍സ്, നഅതേ ശരീഫ്, ബുര്‍ദ്ദാസ്വാദനം, മുഅല്ലിം സമ്മേളനം, സനദ് ദാനം, ദഅവാ കോളേജ് കോഫറന്‍സ്, മതപ്രഭാഷണം, സമാപന സംഗമം, സാമൂഹിക രാഷ്ട്രീയ മഹാ സംഗമം, സന്തല്‍, അദാനം പരിപാടികള്‍ നടക്കും.
വാര്‍ത്താ സമ്മേളനത്തില്‍ ഹനീഫ ഹാജി (പ്രസി. ഉള്ളാള്‍ ദര്‍ഗ്ഗ കമ്മിറ്റി),യു എം അഷ്റഫ് അഹ്‌മദ് (വൈസ് പ്രസിഡന്റ്, ദര്‍ഗ്ഗ കമ്മിറ്റി), ശിഹാബുദ്ദീന്‍ സഖാഫി (ജന. സെക്രട്ടറി ഉള്ളാള്‍ ദര്‍ഗ്ഗ കമ്മിറ്റി),നാദിമുര്‍ റഹ് മാന്‍ (ഫിന. സെക്രട്ടറി ദര്‍ഗ്ഗ കമ്മിറ്റി) കന്തല്‍ സൂപ്പി മദനി എന്നിവര്‍ സംബന്ധിച്ചു.
