ഷാര്‍ജയില്‍ വീടിന് മുന്നിലുണ്ടായ വാഹനാപകടത്തില്‍ 14 മാസം പ്രായമുള്ള കുഞ്ഞ് മരിച്ചു; ഡ്രൈവര്‍ അറസ്റ്റില്‍
അപകടം വരുത്തിയ ശേഷം ഡ്രൈവര്‍ വാഹനം നിര്‍ത്താതെ പോയെങ്കിലും പിന്നീട് പിടികൂടിയതായി ഷാര്‍ജ പൊലീസ്
ഷാര്‍ജ: ഷാര്‍ജയില്‍ വീടിന് മുന്നിലുണ്ടായ വാഹനാപകടത്തില്‍ 14 മാസം പ്രായമുള്ള ആണ്‍ കുഞ്ഞ് മരിച്ചു. സംഭവത്തില്‍ ഡ്രൈവര്‍ അറസ്റ്റില്‍. നവംബര്‍ 3 ന് വൈകുന്നേരം 4 മണിയോടെ കുട്ടിയുടെ വീടിന് പുറത്ത് വെച്ചാണ് നടുക്കുന്ന അപകടം സംഭവിച്ചത്.
അപകടം വരുത്തിയ ശേഷം ഡ്രൈവര്‍ വാഹനം നിര്‍ത്താതെ പോയെങ്കിലും പിന്നീട് പിടികൂടിയതായി ഷാര്‍ജ പൊലീസ് അറിയിച്ചു. നവംബര്‍ 3 ന് വൈകുന്നേരം നാല് മണിയോടെയാണ് അപകടം നടന്നത്. കുട്ടിയുടെ സഹോദരങ്ങള്‍ വീടിനകത്തുണ്ടായിരുന്നു. ഇതിനിടെ കുഞ്ഞ് പുറത്തേക്ക് ഇറങ്ങുകയും തൊട്ടുപിന്നാലെ അപകടം സംഭവിക്കുകയുമായിരുന്നുവെന്ന് പൊലീസ് അറിയിച്ചു.
കുഞ്ഞിന്റെ രണ്ട് വയസ്സുള്ള സഹോദരന്‍ സംഭവം കണ്ട് അമ്മയെ അറിയിക്കാനായി ഓടി. അപകട സമയത്ത് അച്ഛന്‍ ജോലിസ്ഥലത്തായിരുന്നുവെന്നും അധികൃതര്‍ പറഞ്ഞു. അപകടത്തെക്കുറിച്ച് ഷാര്‍ജ പൊലീസ് ഓപ്പറേഷന്‍സ് റൂമില്‍ ഉടന്‍ വിവരം ലഭിക്കുകയും വാസിത് പൊലീസ് സ്റ്റേഷനിലെ പട്രോളിംഗ് സംഘം സ്ഥലത്തെത്തി അന്വേഷണം ആരംഭിക്കുകയും ചെയ്തു.
കുട്ടിയെ ഉടന്‍ തന്നെ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. തുടര്‍ന്ന് പൊലീസ് പ്രത്യേക അന്വേഷണ സംഘം രൂപീകരിച്ച് ഡ്രൈവറെ തിരിച്ചറിയുകയും അറസ്റ്റ് ചെയ്യുകയും ചെയ്തു. ഇയാളെ തുടര്‍ നിയമനടപടികള്‍ക്കായി പബ്ലിക് പ്രോസിക്യൂഷന് കൈമാറി.
