ഇന്ത്യ ഉള്‍പ്പെടെയുള്ള രാജ്യങ്ങളിലുള്ളവര്‍ക്ക് തിരിച്ചടി; തൊഴിലാളി റിക്രൂട്ട്‌മെന്റ് കരാറില്‍ ഒപ്പുവച്ച് സൗദി അറേബ്യയും ബംഗ്ലാദേശും
രാജ്യത്തിലെ ബംഗ്ലാദേശി തൊഴിലാളികളുടെ തൊഴില്‍ കാര്യക്ഷമമാക്കുന്നതിനും ജീവനക്കാര്‍ക്കും തൊഴിലുടമകള്‍ക്കും സംരക്ഷണം ഉറപ്പാക്കുന്നതിനും ലക്ഷ്യമിട്ടുള്ളതാണ് കരാര്‍
റിയാദ്: ഇന്ത്യ ഉള്‍പ്പെടെയുള്ള രാജ്യങ്ങളിലുള്ളവര്‍ക്ക് കനത്ത തിരിച്ചടിയായി തൊഴിലാളി റിക്രൂട്ട്‌മെന്റ് കരാറില്‍ ഒപ്പുവച്ച് സൗദി അറേബ്യയും ബംഗ്ലാദേശും. രാജ്യത്തിലെ ബംഗ്ലാദേശി തൊഴിലാളികളുടെ തൊഴില്‍ കാര്യക്ഷമമാക്കുന്നതിനും ജീവനക്കാര്‍ക്കും തൊഴിലുടമകള്‍ക്കും ശക്തമായ സംരക്ഷണം ഉറപ്പാക്കുന്നതിനും ലക്ഷ്യമിട്ടുള്ള തൊഴില്‍ റിക്രൂട്ട്‌മെന്റ് കരാറിലാണ് ഇരുരാജ്യങ്ങളും ഒപ്പുവച്ചത്.
റിയാദില്‍ സൗദി മാനവ വിഭവശേഷി, സാമൂഹിക വികസന മന്ത്രി എഞ്ചിനീയറായ അഹമ്മദ് അല്‍ രാജ്ഹിയും ബംഗ്ലാദേശി പ്രവാസി ക്ഷേമ, വിദേശ തൊഴില്‍ മന്ത്രിയായ ഡോ. ആസിഫ് നസ്രുളും ആണ് കരാറില്‍ ഒപ്പുവച്ചത്. ഇരു രാജ്യങ്ങളിലെയും ഉദ്യോഗസ്ഥര്‍ ചടങ്ങില്‍ പങ്കെടുത്തു.
പുതിയ കരാറിന് കീഴില്‍, റിക്രൂട്ട്‌മെന്റ് പ്രക്രിയകള്‍ നിയന്ത്രിക്കുന്നതിനും, തൊഴില്‍ അവകാശങ്ങള്‍ സംരക്ഷിക്കുന്നതിനും, തൊഴിലാളികളും തൊഴിലുടമകളും തമ്മിലുള്ള കരാര്‍ ബന്ധങ്ങള്‍ ഔപചാരികമാക്കുന്നതിനും ഇരു രാജ്യങ്ങളും ഒരു നിയന്ത്രണ ചട്ടക്കൂട് സ്ഥാപിക്കും. തൊഴില്‍ വിപണികളെ വൈവിധ്യവത്കരിക്കുന്നതിനും, സന്തുലിതവും നിയന്ത്രിതവുമായ തൊഴില്‍ അന്തരീക്ഷം നിലനിര്‍ത്തുന്നതിന് അന്താരാഷ്ട്ര പങ്കാളിത്തങ്ങള്‍ ശക്തിപ്പെടുത്തുന്നതിനുമുള്ള രാജ്യത്തിന്റെ ശ്രമങ്ങളുമായി ഈ സംരംഭം യോജിക്കുന്നു.
വിദഗ്ധ തൊഴിലാളികളുടെ റിക്രൂട്ട്‌മെന്റിലും പരിശീലനത്തിലും സഹകരണം വര്‍ദ്ധിപ്പിക്കുന്നതിനുള്ള സംവിധാനങ്ങളെക്കുറിച്ചും, രാജ്യത്തിലെ ബംഗ്ലാദേശി പ്രവാസികളുടെ ക്ഷേമവും സംരക്ഷണവും മെച്ചപ്പെടുത്തുന്നതിനുള്ള സംരംഭങ്ങളെക്കുറിച്ചും ഇരു മന്ത്രിമാരും കൂടിക്കാഴ്ചയില്‍ ചര്‍ച്ച ചെയ്തു. സാമ്പത്തിക, സാമൂഹിക ലക്ഷ്യങ്ങള്‍ കൈവരിക്കുന്നതിന് ഉഭയകക്ഷി ബന്ധങ്ങള്‍ ശക്തിപ്പെടുത്തേണ്ടതിന്റെ പ്രാധാന്യം ഡോ. നസ്രുള്‍ ഊന്നിപ്പറഞ്ഞു.
വിദഗ്ധ തൊഴിലാളികള്‍ക്ക് കൂടുതല്‍ തൊഴിലവസരങ്ങള്‍ ഉണ്ടാക്കുന്നതിനും ന്യായമായ പരിഗണനയ്ക്കും നിയമ സംരക്ഷണത്തിനുമുള്ള ഉറപ്പുകള്‍ ശക്തിപ്പെടുത്തുന്നതിനും കരാര്‍ സഹായിക്കുമെന്ന് ബംഗ്ലാദേശ് ഉദ്യോഗസ്ഥര്‍ പറഞ്ഞു. ശക്തമായ സാമ്പത്തിക, സാംസ്‌കാരിക ബന്ധങ്ങള്‍ നിലനിര്‍ത്തുന്ന ഇരു രാജ്യങ്ങളും തമ്മിലുള്ള സഹകരണം കൂടുതല്‍ ആഴത്തിലാക്കുന്നതിനുള്ള മറ്റൊരു ചുവടുവയ്പ്പാണിത്.
