പാസ്പോര്‍ട്ട് അപേക്ഷകള്‍ക്കുള്ള പുതിയ ഫോട്ടോ മാര്‍ഗ്ഗനിര്‍ദ്ദേശങ്ങള്‍ പുറത്തിറക്കി ഖത്തറിലെ ഇന്ത്യന്‍ എംബസി

ദോഹ: പാസ്പോര്‍ട്ട് അപേക്ഷകള്‍ക്കുള്ള പുതിയ ഫോട്ടോ മാര്‍ഗ്ഗനിര്‍ദ്ദേശങ്ങള്‍ പുറത്തിറക്കി ഖത്തറിലെ ഇന്ത്യന്‍ എംബസി. അപ്ഡേറ്റ് ചെയ്ത ഗ്ലോബല്‍ പാസ്പോര്‍ട്ട് സേവാ ലോഞ്ചിന്റെ ഭാഗമായി, എല്ലാ അപേക്ഷകരും പുതുക്കുമ്പോഴോ പുതിയ പാസ്പോര്‍ട്ടിന് അപേക്ഷിക്കുമ്പോഴോ ICAO-അനുയോജ്യമായ ഫോട്ടോ അപ്ലോഡ് ചെയ്യണമെന്ന് ഇന്ത്യന്‍ വിദേശകാര്യ മന്ത്രാലയം നിര്‍ബന്ധമാക്കിയിട്ടുണ്ടെന്ന് എംബസി അറിയിച്ചു.

പാസ്പോര്‍ട്ട് സേവനങ്ങള്‍ക്ക് പാലിക്കേണ്ട ICAO മാനദണ്ഡങ്ങള്‍ക്കനുസൃതമായ ഫോട്ടോ മാര്‍ഗ്ഗനിര്‍ദ്ദേശങ്ങള്‍ അറിയാം;

1. ഫോട്ടോയുടെ 80-85 ശതമാനം മുഖം ഉള്‍ക്കൊള്ളുന്ന തരത്തില്‍ തലയുടെയും തോളുകളുടെ മുകള്‍ ഭാഗത്തിന്റെയും ക്ലോസ് അപ്പിലായിരിക്കണം.

2. കളര്‍ ഫോട്ടോ ആയിരിക്കണം.

3. ഡയമെന്‍ഷന്‍ 630*810 പിക്‌സലുകള്‍ ആയിരിക്കണം.

4. ഫോട്ടോകള്‍ കമ്പ്യൂട്ടര്‍ സോഫ്റ്റ്വെയര്‍ ഉപയോഗിച്ച് മാറ്റം വരുത്തിയത് ആകരുത്.

5. ബാക്ക് ഗ്രൗണ്ട് വെളുത്ത നിറമായിരിക്കണം.

6. ഫോട്ടോയില്‍ അപേക്ഷകന്‍ നേരിട്ട് ക്യാമറയിലേക്ക് നോക്കുന്നതായി കാണിക്കണം.

7. ചര്‍മ്മത്തിന്റെ നിറം സ്വാഭാവികമായിരിക്കണം.

8. ഉചിതമായ തെളിച്ചവും കോണ്‍ട്രാസ്റ്റും ഉണ്ടായിരിക്കണം.

9.പൂര്‍ണ്ണമായും മുഖം കാണണം.

10. കണ്ണുകള്‍ തുറന്നതും വ്യക്തമായി കാണാവുന്നതുമായിരിക്കണം.

11. കണ്ണുകള്‍ക്ക് കുറുകെ രോമം ഉണ്ടാകരുത്.

12. ഏകീകൃത വെളിച്ചത്തില്‍ എടുക്കണം

13. മുഖത്ത് നിഴലുകളോ ഫ്‌ലാഷ് റിഫ്‌ലക്ഷനുകളോ ഉണ്ടാകരുത്.

14. കണ്ണ് ചുവപ്പായിരിക്കരുത്.

15. വായ തുറന്നിരിക്കരുത്.

16. ക്യാമറയില്‍ നിന്ന് 1.5 മീറ്റര്‍ അകലെ നിന്ന് വേണം ഫോട്ടോ എടുക്കാന്‍(വളരെ അടുത്ത് പാടില്ല).

17. ഫോട്ടോ മങ്ങിയത് ആകരുത്.

18. ഫോട്ടോയില്‍ മുടിയുടെ മുകളില്‍ നിന്ന് താടിയുടെ അടിഭാഗം വരെ തലഭാഗം പൂര്‍ണ്ണമായും ഉള്‍ക്കൊള്ളണം.

19. ഫ്രെയിമിന്റെ മധ്യഭാഗം (തല ചരിഞ്ഞിരിക്കരുത്) ആകണം ഫോട്ടോ.

20. മതപരമായ കാരണങ്ങളല്ലാതെ ശിരോവസ്ത്രങ്ങള്‍ അനുവദനീയമല്ല. എന്നാല്‍ താടിയുടെ അടിഭാഗം മുതല്‍ നെറ്റിയുടെ മുകള്‍ഭാഗം വരെയുള്ള മുഖ ഭാഗവും മുഖത്തിന്റെ രണ്ട് അരികുകളും വ്യക്തമായി കാണിക്കണം. മുഖത്തെ ഭാവം സ്വാഭാവികമായി കാണപ്പെടണം.