ആപ്പിള്‍ പ്രേമികളെ ഇതിലേ.. ഐഫോണ്‍ എസ്ഇ4 ലോഞ്ച് അടുത്താഴ്ച
ആപ്പിളിന്റെ ഐഫോണ്‍ എസ്ഇ 4 മോഡല്‍ ലോഞ്ചിങ്ങിനൊരുങ്ങി. അടുത്താഴ്ച വിപണിയിലെത്തുമെന്നാണ് റിപ്പോര്‍ട്ട്. 2025ല്‍ ആപ്പിളിന്റെ ആദ്യ മൊബൈല്‍ ഫോണ്‍ അവതരണം കൂടിയാണിത്. 2022ന് ശേഷം ഇതാദ്യമായാണ് എസ്ഇ സീരീസില്‍ ഒരു ഹാന്‍ഡ് സെറ്റ് ആപ്പിള്‍ പുറത്തിറക്കുന്നത്. ആപ്പിളിന്റെ ഫ്‌ളാഗ്ഷിപ്പ് ഫോണുകളുമായി താരതമ്യം ചെയ്യുമ്പോള്‍ വിലക്കുറവാവണ് പ്രധാന പ്രത്യേകത. 2022ല്‍ ഇറങ്ങിയ എസ് ഇ മൂന്നാം തലമുറ ഫോണിന് 39,999 രൂപയായിരുന്നു വില. എന്നാല്‍ ഐഫോണ്‍ എസ്ഇ 4ന്റെ വില ഇതിലും ഉയരും. എ18 ചിപ്പ്, ആപ്പിള്‍ ഇന്റലിജന്‍സ്, 48 എംപി ക്യാമറ അടക്കമുള്ള പ്രീമിയം ഫീച്ചറുകള്‍ ഇതില്‍ ഉള്‍പ്പെടുന്നു. ഇതാണ് വില ഉയരാന്‍ കാരണം.
സവിശേഷതകള്‍:
2022 മാര്‍ച്ച് എട്ടിനായിരുന്നു മൂന്നാം തലമുറ ഐഫോണ്‍ എസ്ഇ ആപ്പിള്‍ പ്രഖ്യാപിച്ചത്. ഈ ഫോണില്‍ നിന്ന് വലിയ അപ്‌ഡേറ്റുകള്‍ എസ്ഇ 4ലുണ്ടാകും. ഉയര്‍ന്ന നിലവാരത്തിലുള്ള ചിത്രങ്ങളും വീഡിയോകളും പകര്‍ത്താന്‍ കഴിയുന്ന രീതിയില്‍ 48 എംപിയുടെ സിംഗിള്‍ റീയര്‍ ക്യാമറയായിരിക്കും ഐഫോണ്‍ എസ്ഇ 4ന്റെ ഒരു സവിശേഷത. മൂന്നാം തലമുറ എസ്ഇയിലുണ്ടായിരുന്നത് 12 എംപി സെന്‍സര്‍ മാത്രമായിരുന്നു. ആപ്പിളിന്റെ കരുത്തുറ്റ എഐ18 ചിപ്പില്‍ വരുന്ന എസ്ഇ 4 ഫോണില്‍ എഐ ഫീച്ചറുകളുണ്ടാകും. ഐഫോണ്‍ 16 സിരീസ് ഫ് ളാഗ്ഷിപ്പ് ഫോണുകള്‍ക്ക് ഉപയോഗിച്ച ചിപ്പാണ് എ18.
ഡിസൈനിലും മാറ്റങ്ങള്‍
ഐഫോണ്‍ 14ന്റെ അതേ മോഡലിലാണ് എസ്ഇ 4 പുറത്തിറക്കുക എന്നാണ് സൂചന. 6.1 ഇഞ്ച് വരുന്ന ഫുള്‍-സ്‌ക്രീന്‍ ഡിസ്‌പ്ലെയാണ് ഫോണിന് വരിക. അതായത്, ഹോം ബട്ടണോ ബെസെല്‍സോ ഫോണിലുണ്ടാവില്ല. ക്യാമറ, ചിപ്പ് എന്നിവയ്ക്ക് പുറമെ ബാറ്ററിയിലും ഐഫോണ്‍ എസ്ഇ 4 വമ്പന്‍ അപ്‌ഡേറ്റ് കൊണ്ടുവരും എന്നാണ് പ്രതീക്ഷ. ചരിത്രത്തിലാദ്യമായി എസ്ഇ സീരീസില്‍ ഫേസ് ഐഡി വരുന്നു എന്ന സവിശേഷതയും ഐഫോണ്‍ എസ് ഇ നാലാം തലമുറ ഫോണിനുണ്ട്.
