അഗ്നിവീര് റിക്രൂട്ട്മെന്റ് റാലി മുനിസിപ്പല് സ്റ്റേഡിയത്തില് തുടങ്ങി
പുതിയ ബാച്ച് അഗ്നിവീര് ജവാന്മാരെ തിരഞ്ഞെടുക്കുന്നതിന് ഇന്ന് രാവിലെ വിദ്യാനഗറിലെ മുനിസിപ്പല് സ്റ്റേഡിയത്തില് ആരംഭിച്ച റിക്രൂട്ട്മെന്റ് റാലിയില് നിന്നുള്ള വിവിധ ദൃശ്യങ്ങള്
കാസര്കോട്: പുതിയ ബാച്ച് അഗ്നിവീര് ജവാന്മാരെ തിരഞ്ഞെടുക്കുന്നതിനുള്ള റിക്രൂട്ട്മെന്റ് റാലി ഇന്ന് രാവിലെ മുതല്വിദ്യാനഗറിലെ മുനിസിപ്പല് സ്റ്റേഡിയത്തില് ആരംഭിച്ചു. എ.ഡി.എം പി. അഖില് ഫ്ളാഗ് ഓഫ് നിര്വഹിച്ചു. കോഴിക്കോട് ആര്മി റിക്രൂട്ടിങ് ഓഫീസിന്റെ നേതൃത്വത്തിലാണ് അഞ്ച് ദിവസം നീളുന്ന റിക്രൂട്ട്മെന്റ് റാലി നടത്തുന്നത്. ഓണ്ലൈന് പരീക്ഷ വിജയിച്ച കാസര്കോട്, കണ്ണൂര്, കോഴിക്കോട്, വയനാട്, മലപ്പുറം, പാലക്കാട്, തൃശൂര്, മാഹി, ലക്ഷദ്വീപ് എന്നിവിടങ്ങളിലെയും നാലായിരത്തോളം ഉദ്യോഗാര്ത്ഥികളാണ് പങ്കെടുക്കുന്നത്. ജനറല് ഡ്യൂട്ടി, ടെക്നിക്കല്, ക്ലാര്ക്ക്/സ്റ്റോര്കീപ്പര്, ട്രേഡ്സ്മാന് തസ്തികകളിലേക്കുള്ള ഒഴിവുകള് ഇതുവഴി നികത്തും. ദിവസേന 800 ഓളം പേര്ക്ക് കായികക്ഷമതാപരീക്ഷ നടക്കുമെന്നാണ് അറിയുന്നത്. ഇന്ന് 1600 മീറ്റര് ഓട്ടം, പുള്അപ്, സിഗ് സാഗ് ബാലന്സ്, ജമ്പിങ് എന്നിവയില് വിജയിക്കുന്നവരുടെ നേത്ര-ശാരീരിക അളവ്-സര്ട്ടിഫിക്കറ്റ് പരിശോധനകള് പൂര്ത്തിയാക്കും. നാളെ മുതല് വൈദ്യപരിശോധനയുണ്ടാകും.
