ദേശീയപാതയില്‍ പലയിടത്തും ബസ് കാത്തിരിപ്പ് കേന്ദ്രങ്ങളുടെ പ്രവൃത്തി പൂര്‍ത്തിയായില്ല; വിദ്യാര്‍ത്ഥികളടക്കം മഴ നനയുന്നു
മഴ നനഞ്ഞ് സര്‍വീസ് റോഡിനരികില്‍ ബസ് കാത്തുനില്‍ക്കുന്ന വിദ്യാര്‍ത്ഥികളും യാത്രക്കാരും
കാസര്‍കോട്: ദേശീയപാത തലപ്പാടി-ചെങ്കള റീച്ച് ഈ മാസം തന്നെ ഔദ്യോഗികമായി തുറന്നുകൊടുക്കാന്‍ സര്‍ക്കാര്‍ ആലോചിക്കുന്നതിനിടെ സര്‍വീസ് റോഡരികില്‍ പലയിടത്തും ബസ് കാത്തിരിപ്പ് കേന്ദ്രങ്ങളുടെ പ്രവൃത്തി പൂര്‍ത്തിയായില്ല. ഇവിടങ്ങളില്‍ വിദ്യാര്‍ത്ഥികളടക്കമുള്ളവര്‍ മഴ നനഞ്ഞാണ് ബസ് കാത്തിരിക്കുന്നത്. ഇതുമൂലം സ്‌കൂള്‍ പുസ്തകങ്ങളും പഠനോപകരണങ്ങളുമൊക്കെ നനയുന്നത് പഠനത്തെയും ബാധിക്കുന്നു. പല കുട്ടികളും നനഞ്ഞത് മൂലം സ്‌കൂളില്‍ പോകാനാകാതെ തിരിച്ചു വീട്ടിലേക്ക് പോകുന്നതായും പറയുന്നു. വിദ്യാര്‍ത്ഥികള്‍ മഴ നനയുന്നത് പനിയടക്കമുള്ള രോഗങ്ങള്‍ പിടിപെടാന്‍ കാരണമാകുമെന്ന് അധ്യാപകരും രക്ഷിതാക്കളും ഭയക്കുന്നുണ്ട്. ബസ് കാത്തിരിപ്പ് കേന്ദ്ര നിര്‍മ്മാണം വേഗത്തിലാക്കണമെന്ന് സന്നദ്ധ സംഘടനകളും നാട്ടുകാരും സ്‌കൂള്‍ പി.ടി.എകളും അധ്യായന വര്‍ഷം ആരംഭിക്കുന്നതിന് മുമ്പ് തന്നെ അധികൃതരോട് ആവശ്യപ്പെട്ടതാണ്. ദേശീയപാതക്ക് സമീപത്തുണ്ടായിരുന്ന കടകളും കെട്ടിടങ്ങളും വികസനത്തിന്റെ ഭാഗമായി പൊളിച്ചുമാറ്റിയതോടെ മഴ വന്നാല്‍ കയറി നില്‍ക്കാന്‍ ഇടമില്ലാത്തതാണ് വിദ്യാര്‍ത്ഥികള്‍ അടക്കമുള്ള യാത്രക്കാര്‍ക്ക് ദുരിതമാവുന്നത്. അതുകൊണ്ട് തന്നെ ബസ് കാത്തിരിപ്പ് കേന്ദ്രങ്ങള്‍ സ്ഥാപിക്കുന്ന നടപടി വേഗത്തിലാക്കണമെന്നാണ് ആവശ്യം ഉയരുന്നത്.
