തിരുവനന്തപുരം: ഐ.എസ്.ആര്.ഒ. ചാരക്കേസുമായി ബന്ധപ്പെട്ട ഗൂഢാലോചന കേസില് സിബി മാത്യൂസും ആര്.ബി. ശ്രീകുമാറും പ്രതികള്. കേസില് സി.ബി.ഐ. തിരുവനന്തപുരം ചീഫ് ജുഡീഷ്യല് മജിസ്ട്രേറ്റ് കോടതിയില് എഫ്.ഐ.ആര്. സമര്പ്പിച്ചു. കേരളാ പൊലീസ്, ഐ.ബി. ഉദ്യോഗസ്ഥരടക്കം പതിനെട്ട് പേരെയാണ് കേസില് പ്രതി ചേര്ത്തിരിക്കുന്നത്.
പേട്ട സി.ഐ ആയിരുന്ന എസ്. വിജയന് ആണ് കേസിലെ ഒന്നാം പ്രതി. സിബി മാത്യൂസ് നാലാം പ്രതിയും കെ.കെ. ജോഷ്വ അഞ്ചാം പ്രതിയും ആണ്. ഐ.ബി. ഡെപ്യൂട്ടി ഡയറക്ടറായിരുന്ന ആര്.ബി. ശ്രീകുമാര് പ്രതിപട്ടികയില് ഏഴാമതാണ്. സിറ്റി പൊലീസ് കമ്മീഷണറായിരുന്ന വി.ആര്. രാജീവന്, എസ്.ഐ. ആയിരുന്ന തമ്പി എസ്.ദുര്ഗാദത്ത് എന്നിവരും പ്രതികളാണ്. പ്രതികള്ക്ക് എതിരെ ഗൂഢാലോചനയ്ക്കും മര്ദ്ദനത്തിനും വകുപ്പുകള് ചേര്ത്തിട്ടുണ്ട്. പ്രതികള് കേന്ദ്രസര്ക്കാര് ഉദ്യോഗസ്ഥരെ അപകടപ്പെടുത്താന് തെറ്റായ രേഖകള് ചമച്ചെന്നും എഫ്.ഐ.ആര് പറയുന്നു.
ചാരക്കേസില് നമ്പിനാരായണനെ അടക്കം പ്രതിയാക്കിയതിന്റെ ഗൂഢാലോചന സംബന്ധിച്ച് സുപ്രീംകോടതിയാണ് സി.ബി.ഐ. അന്വേഷണത്തിന് നിര്ദ്ദേശം നല്കിയത്. ഇതിന്റെ അടിസ്ഥാനത്തില് മെയ് മാസത്തില് സി.ബി.ഐ. കേസ് രജിസ്റ്റര് ചെയ്തിരുന്നു.
നമ്പിനാരായണന് അടക്കമുള്ളവരെ കേസില് ഉള്പ്പെടുത്തി എന്നാരോപിക്കപ്പെടുന്നവരുടെ കൃത്യമായ പട്ടിക തയ്യാറാക്കിയാണ് എഫ്.ഐ.ആര്. രജിസ്റ്റര് ചെയ്തിട്ടുള്ളത്. നമ്പി നാരായണന് അടക്കമുള്ളവര്ക്കെതിരായ ചാരക്കേസ് കെട്ടിച്ചമച്ചതാണെന്ന് നേരത്തെ കേസ് അന്വേഷിച്ച സി.ബി.ഐ. കണ്ടെത്തിയിരുന്നു. സുപ്രീംകോടതി ജഡ്ജിയായിരുന്ന ഡി.കെ. ജയിന്റെ നേതൃത്വത്തില് സുപ്രീംകോടതി നിയോഗിച്ച സമിതിയാണ് സി.ബി.ഐ. അന്വേഷണത്തിന് ഉത്തരവിട്ടത്.