കണങ്കാലുകളിലേയും കാലുകളിലേയും വീക്കം കുറയ്ക്കാനുള്ള പ്രകൃതിദത്ത വഴികള്‍ അറിയാം
ദീര്‍ഘനേരം നില്‍ക്കുന്നത്, ഉയര്‍ന്ന അളവിലുള്ള ഉപ്പ് ഉപഭോഗം, ഗര്‍ഭം, പരിക്ക് തുടങ്ങിയ വിവിധ കാരണങ്ങളാല്‍ വീക്കം സംഭവിക്കാം
പലരുടേയും പ്രശ്‌നമാണ് കണങ്കാലുകളിലും കാലുകളിലും വീക്കം അനുഭവപ്പെടുന്നത്. ഇത്തരം അനുഭവം പലരിലും അസ്വസ്ഥതയുണ്ടാക്കാറുണ്ട്. ദീര്‍ഘനേരം നില്‍ക്കുന്നത്, ഉയര്‍ന്ന അളവിലുള്ള ഉപ്പ് ഉപഭോഗം, ഗര്‍ഭം, പരിക്ക് തുടങ്ങിയ വിവിധ കാരണങ്ങളാല്‍ വീക്കം സംഭവിക്കാറുണ്ട്. പലരും ഇത്തരം പ്രശ്‌നങ്ങള്‍ക്ക് ഡോക്ടറെ കാണുക പതിവാണ്.
എന്നാല്‍ ചിലര്‍ വീട്ടില്‍ തന്നെ സ്വയം ചികിത്സ നടത്താറുണ്ട്. അത്തരത്തില്‍ കാലുകളിലും കണങ്കാലുകളിലും അനുഭവപ്പെടുന്ന വീക്കം കുറയ്ക്കാനുള്ള പ്രകൃതിദത്ത പരിഹാരങ്ങളെ കുറിച്ച് അറിയാം. എന്നിരുന്നാലും നിങ്ങളുടെ വീക്കം തുടരുകയോ മറ്റ് ലക്ഷണങ്ങളോടൊപ്പം വരികയോ ചെയ്താല്‍, ഗുരുതരമായ അവസ്ഥകള്‍ ഒഴിവാക്കാന്‍ ഒരു ആരോഗ്യ വിദഗ്ദ്ധനെ സമീപിക്കേണ്ടത് അത്യാവശ്യമാണ്.
1. കാലുകള്‍ ഉയര്‍ത്തി വയ്ക്കുക
വിശ്രമിക്കുന്ന സമയങ്ങളില്‍ പാദങ്ങള്‍ തലയിണയിലോ മറ്റോ ഉയര്‍ത്തിവെക്കുന്നത് വഴി നീരും വേദനയും കുറയ്ക്കാം. ഗുരുത്വാകര്‍ഷണത്തിന് എതിരായി ഇത്തരത്തിലൊരു പ്രവര്‍ത്തി ചെയ്യുമ്പോള്‍ നിങ്ങളുടെ കാല്‍പാദങ്ങളിലേക്കുള്ള രക്തയോട്ടം വര്‍ദ്ധിക്കും. പാദങ്ങള്‍ ഹൃദയത്തേക്കാള്‍ ഉയരത്തില്‍ നിലകൊള്ളുമ്പോള്‍ രക്തചക്രമണം മെച്ചപ്പെടും.
2. ഐസ് വയ്ക്കാം
ഹൈ ഹീല്‍ ചെരുപ്പുകള്‍ ധരിക്കുന്നത് മൂലമുണ്ടാവുന്ന വേദനകള്‍ ഒഴിവാക്കാന്‍ ഏകദേശം 20 മിനിറ്റ് വേദനയുള്ള കാല്‍പ്പാദങ്ങളില്‍ ഒരു ഐസ് പായ്ക്ക് വയ്ക്കുക. നിങ്ങളുടെ കാലിലെ വീക്കം വേഗത്തില്‍ കുറയ്ക്കാന്‍ ഐസ് സഹായിക്കും. ഒരു ചെറിയ പ്ലാസ്റ്റിക് ബാഗില്‍ ചെറിയ അളവില്‍ പൊടിച്ച ഐസ് ചേര്‍ത്ത് ഉപയോഗിക്കാം. ഒരു തവണ 10 മിനിറ്റിലധികം നേരം അടുപ്പിച്ച് ഐസ് പായ്ക്ക് ഉപയോഗിക്കുന്നത് നിങ്ങളുടെ പാദങ്ങളുടെ ചര്‍മ്മത്തിനും ഞരമ്പുകള്‍ക്കും കേടു സംഭവിക്കാം. അതുകൊണ്ട് ഇടവേളകള്‍ എടുത്ത് ഇത് ചെയ്യാം.
3. ധാരാളം വെള്ളം കുടിക്കുക
കാലുകളിലെ നീരിന് വേറൊരു കാരണം ശരീരത്തില്‍ ഉപ്പ് കൂടുന്നതാണ്. ദ്രാവക ഉപഭോഗം വര്‍ദ്ധിപ്പിക്കുന്നത് ശരീരത്തിലെ ഉപ്പിന്റെ അളവ് നേര്‍പ്പിക്കാന്‍ സഹായിക്കും. ഇത് പുറന്തള്ളാനായി പകല്‍ സമയത്ത് 8-10 ഗ്ലാസ് വെള്ളം കുടിക്കാന്‍ ശ്രമിക്കുക. വ്യായാമത്തിനിടയില്‍, കുക്കുമ്പര്‍-നാരങ്ങ വെള്ളം, നാരങ്ങ-വെള്ളരിക്ക വെള്ളം, എന്നിവയെല്ലാം നല്ലതാണ്. ഇവയുടെ ആന്റി-ഇന്‍ഫ് ളമേറ്ററി ഗുണങ്ങള്‍ ശരീരത്തിന് കൂടുതല്‍ ജലാംശവും ഉത്തേജനവും നല്‍കും.
ജലാംശം നിലനിര്‍ത്തുന്നത് ആരോഗ്യകരമായ വൃക്കകളുടെ പ്രവര്‍ത്തനം നിലനിര്‍ത്താന്‍ സഹായിക്കുന്നു. മാത്രമല്ല, ശരീരത്തില്‍ നിന്ന് അധിക സോഡിയം നീക്കം ചെയ്യാന്‍ സഹായിക്കുകയും അതുവഴി വീക്കവും വേദനയും കുറയുകയും ചെയ്യുന്നു.
4. ഉപ്പ് കഴിക്കുന്നത് കുറയ്ക്കുക
ഭക്ഷണത്തിലെ അമിതമായ ഉപ്പ് നിങ്ങളുടെ ശരീരത്തില്‍ ദ്രാവകം നിലനിര്‍ത്താന്‍ കാരണമാകും, ഇത് കാലുകളിലും കണങ്കാലുകളിലും വീക്കത്തിന് കാരണമാകുന്നു. ഉപ്പിന്റെ അളവ് കുറയ്ക്കുന്നതിലൂടെ, ജലാംശം നിലനിര്‍ത്തുന്നത് ലഘൂകരിക്കാനും വീക്കം കൂടുതല്‍ ഫലപ്രദമായി നിയന്ത്രിക്കാനും കഴിയും.
സംസ്‌കരിച്ച ഭക്ഷണങ്ങള്‍, ഫാസ്റ്റ് ഫുഡ്, ടിന്നിലടച്ച സൂപ്പുകള്‍, ഉപ്പിട്ട ലഘുഭക്ഷണങ്ങള്‍ എന്നിവ കഴിക്കുന്നത് പരിമിതപ്പെടുത്തുക, അവയില്‍ സോഡിയം കൂടുതലാണ്. പഴങ്ങള്‍, പച്ചക്കറികള്‍, കുറഞ്ഞ സോഡിയം ഓപ്ഷനുകള്‍ പോലുള്ള ഭക്ഷണങ്ങള്‍ തിരഞ്ഞെടുക്കുക. സോഡിയം കുറയ്ക്കുന്നത് വഴി വൃക്കകളിലെ ദ്രാവകത്തിന്റെ അളവ് നിയന്ത്രിക്കാന്‍ സഹായിക്കുന്നു.
5. എപ്‌സം സാള്‍ട്ട് സോക്ക് പ്രയോഗിക്കുക
എപ്‌സം സാള്‍ട്ടില്‍ മഗ്‌നീഷ്യം ധാരാളമായി അടങ്ങിയിട്ടുണ്ട്. അതുകൊണ്ടുതന്നെ ഇത് വീക്കം കുറയ്ക്കുന്നു. ഒരു പാത്രത്തില്‍ ചൂടുവെള്ളമെടുത്ത് അതില്‍ 12 കപ്പ് എപ്‌സം ഉപ്പ് ചേര്‍ക്കുക. അതില്‍ നിങ്ങളുടെ പാദങ്ങള്‍ 20 മിനിറ്റ് മുക്കിവയ്ക്കുക.
എപ്‌സം ഉപ്പിലെ മഗ്‌നീഷ്യം പേശികളെ വിശ്രമിക്കാനും വീക്കം കുറയ്ക്കാനും സഹായിക്കുന്നു. അതേസമയം ചൂടുവെള്ളം രക്തചംക്രമണം മെച്ചപ്പെടുത്തുന്നു.
6. കംപ്രഷന്‍ സോക്‌സുകള്‍ ധരിക്കുക
നിങ്ങളുടെ കാലുകളില്‍ നേരിയ മര്‍ദ്ദം ചെലുത്തുന്നതിന് പ്രത്യേകം രൂപകല്‍പ്പന ചെയ്തതാണ് കംപ്രഷന്‍ സോക്‌സുകള്‍. ഇത് രക്തയോട്ടം ഉത്തേജിപ്പിക്കാനും വീക്കം കുറയ്ക്കാനും സഹായിക്കുന്നു. ദീര്‍ഘനേരം നില്‍ക്കുകയോ ഇരിക്കുകയോ ചെയ്യുന്ന ആളുകള്‍ക്ക് ഈ സോക്‌സുകള്‍ സഹായകരമാണ്.
ദീര്‍ഘനേരം നില്‍ക്കുകയോ ഇരിക്കുകയോ ചെയ്യണമെങ്കില്‍ ദിവസം മുഴുവന്‍ കംപ്രഷന്‍ സോക്‌സുകള്‍ ധരിക്കുക. കംപ്രഷന്‍ സോക്‌സുകള്‍ രക്തചംക്രമണം മെച്ചപ്പെടുത്തുകയും ദ്രാവകം അടിഞ്ഞുകൂടുന്നത് കുറയ്ക്കാന്‍ സഹായിക്കുകയും രക്തം കട്ടപിടിക്കുന്നത് തടയുകയും ചെയ്യുന്നു.
7. മൃദുവായ മസാജ്
ഒരു റോളിംഗ് പിന്‍ അല്ലെങ്കില്‍ എളുപ്പത്തിന് ഒരു ടെന്നീസ് ബോള്‍ ഉപയോഗിച്ച് നിങ്ങളുടെ പാദങ്ങള്‍ നന്നായി മസാജ് ചെയ്യുന്നത് ഏറ്റവും നല്ല ഓപ്ഷന്‍ ആണ്. നിങ്ങളുടെ നഗ്‌നപാദങ്ങളില്‍ കുറച്ചു മിനിറ്റുകളില്‍ ബോള്‍ അല്ലെങ്കില്‍ ട്രോളിംഗ് പിന്‍ ഉപയോഗിക്കുന്നത് വഴി കാലുകള്‍ക്ക് ആശ്വാസം പകരാന്‍ കഴിയും. ചൂടുള്ള ഒലിവ് ഓയില്‍ ഉപയോഗിച്ച ശേഷം ചുടുവെള്ളത്തില്‍ മുക്കി വെയ്ക്കുന്നതും ഗുണം ചെയ്യും.
8. ഡൈയൂററ്റിക് ഇഫക്റ്റിനുള്ള ഹെര്‍ബല്‍ ടീകള്‍
ഡാന്‍ഡെലിയോണ്‍, ഇഞ്ചി, പാഴ്സ്ലി തുടങ്ങിയ ചില ഔഷധസസ്യങ്ങള്‍ പ്രകൃതിദത്ത ഡൈയൂററ്റിക്‌സാണ്. അവ നിങ്ങളുടെ ശരീരത്തിലെ അധിക ദ്രാവകങ്ങള്‍ പുറന്തള്ളാന്‍ സഹായിക്കും, ഇത് നിങ്ങളുടെ കണങ്കാലുകളിലും കാലുകളിലും വീക്കം കുറയ്ക്കുന്നു.
ചെയ്യേണ്ട വിധം: ഈ ഔഷധസസ്യങ്ങള്‍ ഉപയോഗിച്ച് നിര്‍മ്മിച്ച ഹെര്‍ബല്‍ ടീ ദിവസത്തില്‍ ഒന്നോ രണ്ടോ തവണ കുടിക്കുക. മിക്ക ആരോഗ്യ ഭക്ഷണ സ്റ്റോറുകളിലും നിങ്ങള്‍ക്ക് ഡാന്‍ഡെലിയോണ്‍ അല്ലെങ്കില്‍ ഇഞ്ചി ചായ ലഭിക്കാം, അല്ലെങ്കില്‍ പുതിയ ഔഷധസസ്യങ്ങള്‍ ഉപയോഗിച്ച് നിങ്ങള്‍ക്ക് അവ വീട്ടില്‍ തന്നെ ഉണ്ടാക്കാം.
ഡൈയൂററ്റിക്‌സ് വൃക്കകള്‍ക്ക് അധിക ദ്രാവകങ്ങളും മാലിന്യങ്ങളും പ്രോസസ്സ് ചെയ്യാന്‍ സഹായിക്കുന്നു. മാത്രമല്ല വെള്ളം നിലനിര്‍ത്തുകയും അതുവഴി വീക്കം കുറയ്ക്കുകയും ചെയ്യുന്നു.
9. ആപ്പിള്‍ സിഡെര്‍ വിനെഗര്‍
ആപ്പിള്‍ സിഡെര്‍ വിനെഗര്‍ (ACV) ദ്രാവകത്തിന്റെ അളവ് സന്തുലിതമാക്കാനും രക്തചംക്രമണം മെച്ചപ്പെടുത്താനും നല്ലതാണ്. ആപ്പിള്‍ സിഡെര്‍ വിനെഗറിലെ പൊട്ടാസ്യം വീക്കം തടയാന്‍ സഹായിക്കും.
ചെയ്യേണ്ട വിധം: 1-2 ടേബിള്‍സ്പൂണ്‍ അസംസ്‌കൃത, ഫില്‍ട്ടര്‍ ചെയ്യാത്ത ആപ്പിള്‍ സിഡെര്‍ വിനെഗര്‍ ഒരു ഗ്ലാസ് വെള്ളത്തില്‍ കലര്‍ത്തുക. ഈ മിശ്രിതം ദിവസത്തില്‍ ഒന്നോ രണ്ടോ തവണ കുടിക്കുക. ഒരു തുണി അല്ലെങ്കില്‍ കോട്ടണ്‍ ബോള്‍ ഉപയോഗിച്ച് വീര്‍ത്ത ഭാഗങ്ങളില്‍ നേര്‍പ്പിച്ച ആപ്പിള്‍ സിഡെര്‍ വിനെഗര്‍ പുരട്ടുക.
ശരീരത്തിലെ സോഡിയത്തിന്റെ അളവ് സന്തുലിതമാക്കുന്നതിനൊപ്പം ദ്രാവക ചംക്രമണം പ്രോത്സാഹിപ്പിക്കുകയും വീക്കം കുറയ്ക്കുകയും ചെയ്യുന്നു.
10. പതിവ് വ്യായാമം
പതിവ് ശാരീരിക പ്രവര്‍ത്തനങ്ങള്‍, പ്രത്യേകിച്ച് കാലുകളുടെ ചലനം ഉള്‍പ്പെടുന്ന വ്യായാമങ്ങള്‍, രക്തചംക്രമണവും ലിംഫറ്റിക് ഡ്രെയിനേജും മെച്ചപ്പെടുത്തുന്നതിലൂടെ കാലുകളിലും കണങ്കാലുകളിലും അനുഭവപ്പെടുന്ന വീക്കം കുറയ്ക്കുന്നു.
ദിവസത്തില്‍ കുറഞ്ഞത് 30 മിനിറ്റെങ്കിലും നടത്തം, നീന്തല്‍, സൈക്ലിംഗ് പോലുള്ള ചെറിയ വ്യായാമങ്ങളില്‍ ഏര്‍പ്പെടുക. വ്യായാമങ്ങള്‍ ചെയ്യുമ്പോള്‍ നിങ്ങളുടെ കാലുകള്‍ ഉയര്‍ത്തുന്നത് വഴി വീക്കം കുറയ്ക്കാന്‍ സഹായിക്കും.
മാത്രമല്ല രക്തചംക്രമണം വര്‍ദ്ധിപ്പിക്കുകയും കാലുകളില്‍ നിന്നും കണങ്കാലുകളില്‍ നിന്നും അധിക ദ്രാവകം പുറം തള്ളാന്‍ സഹായിക്കുകയും വീക്കം കുറയ്ക്കുകയും ചെയ്യുന്നു.
11. നല്ല ഭക്ഷണം കഴിക്കുക
ആരോഗ്യകരമായ ഭക്ഷണങ്ങള്‍ കഴിക്കുന്നത് ഒരു പരിധിവരെ നിങ്ങളുടെ ശരീരത്തിന്റെ അസ്വസ്ഥതകളെ അകറ്റി നിര്‍ത്തും. അസുഖകരമായ പാദങ്ങള്‍ കൊണ്ട് ബുദ്ധിമുട്ടുന്ന സാഹചര്യത്തില്‍ നിങ്ങളുടെ ശരീരത്തിലെ ദ്രാവക സന്തുലനാവസ്ഥ നിയന്ത്രിക്കാന്‍ കഴിയുന്ന ഭക്ഷണങ്ങള്‍ കഴിക്കുക. വാഴപ്പഴം നിങ്ങളുടെ ഭക്ഷണത്തിന്റെ ഭാഗമാക്കുക, കാരണം അവയില്‍ പൊട്ടാസ്യം ധാരാളം അടങ്ങിയിട്ടുണ്ട്, ഇത് ദ്രാവകം കൂടുതലായി കെട്ടിനിര്‍ത്തുന്നത് ഒഴിവാക്കാന്‍ സഹായിക്കുന്നു.
