തടി കുറയ്ക്കണോ? ഈ ഭക്ഷണരീതികള്‍ ശീലമാക്കാം
അമിതവണ്ണം പലരുടേയും ഒരു പ്രധാന പ്രശ്‌നമാണ്. വണ്ണം കുറയ്ക്കാന്‍ പല വഴികളും നോക്കിയിട്ടും ഫലംകാണാത്തതിലുള്ള വിഷമങ്ങള്‍ അനുഭവിക്കുന്നവരും ഉണ്ട്. തെറ്റായ ഭക്ഷണശീലങ്ങളും മാറിക്കൊണ്ടിരിക്കുന്ന ജീവിതശൈലിയുമാണ് ആളുകളെ പലപ്പോഴും അമിതവണ്ണത്തിന് ഇരയാക്കുന്നത്. ശരീരഭാരം കുറയ്ക്കാന്‍ ഡയറ്റിംഗും ജിം പരിശീലനവുമൊക്കെയായി ദിവസങ്ങള്‍ തള്ളിനീക്കുന്നവരുമുണ്ട്. എന്നാല്‍ ശരീരഭാരം കുറയ്ക്കാന്‍ ചില ഭക്ഷണരീതികള്‍ പിന്തുടര്‍ന്ന് നോക്കൂ. തീര്‍ച്ചയായും ഫലം കാണും. ഏതൊക്കെ ഭക്ഷണങ്ങളാണ് കഴിക്കേണ്ടതെന്ന് നോക്കാം.
പ്രഭാതഭക്ഷണം
ഒരു ദിവസത്തിലെ പ്രധാന ഭക്ഷണമായി കണക്കാക്കുന്നത് പ്രഭാതഭക്ഷണത്തെ ആണ്. ദിവസം മുഴുവന്‍ ശരീരത്തെ ഊര്‍ജ്ജസ്വലമായി നിലനിര്‍ത്തുന്നത് നമ്മള്‍ കഴിക്കുന്ന പ്രഭാതഭക്ഷണമാണ്. ശരീരഭാരം കുറയ്ക്കാന്‍ ആഗ്രഹിക്കുന്നുവെങ്കില്‍, തീര്‍ച്ചയായും ആരോഗ്യകരമായ പ്രഭാതഭക്ഷണം കഴിക്കുക. ഈ സാഹചര്യത്തില്‍, പൊണ്ണത്തടി കുറയ്ക്കാന്‍ പ്രഭാതഭക്ഷണത്തില്‍ ഏതൊക്കെ ഭക്ഷണങ്ങള്‍ ഉള്‍പ്പെടുത്താം എന്ന് നോക്കാം.
ഇഡ്ഡലി-സാമ്പാര്‍
ശരീരഭാരം കുറയ്ക്കാനുള്ള നല്ലൊരു പ്രഭാതഭക്ഷണമാണ് ഇഡ്ഡലി-സാമ്പാര്‍. രുചികരം എന്നതിലുപരി ആരോഗ്യകരവുമാണ് ഈ ഭക്ഷണം. പ്രോട്ടീന്, ഫൈബര്‍, കാര്‍ബോഹൈഡ്രേറ്റ്, ധാതുക്കള്‍ എന്നിവ ധാരാളം അടങ്ങിയിട്ടുണ്ട്. എളുപ്പം ദഹിക്കുന്ന ഭക്ഷണം എന്നതിലുപരി ഇത് കഴിച്ചാല്‍ ഏറെ നേരത്തേക്ക് വിശപ്പ് തോന്നുകയുമില്ല.
വാഴപ്പഴം
ഊര്‍ജ്ജത്തിന്റെ ഒരു പവര്‍ ഹൗസാണ് വാഴപ്പഴം. വാഴപ്പഴം മിതമായി കഴിക്കുകയാണെങ്കില്‍, അനുയോജ്യമായ ശരീരഭാരം കുറയ്ക്കാനുള്ള ഭക്ഷണമായി മാറുന്നു.
മുട്ട
രാവിലെ മുട്ട കഴിക്കുന്നത് ദിവസം മുഴുവന്‍ ഊര്‍ജ്ജസ്വലമാക്കും. ശരീരഭാരം കുറയ്ക്കാന്‍ ഇത് സഹായിക്കും. പ്രോട്ടീന് പുറമെ, നല്ല കൊഴുപ്പിന്റെ ഉറവിടം കൂടിയാണിത്.
പനീര്‍
ശരീരഭാരം കുറയ്ക്കാന്‍ പനീര്‍ കഴിക്കുന്നത് ഏറെ ഗുണം ചെയ്യും. ഇതില്‍ പ്രോട്ടീന്, കാല്‍സ്യം, ആരോഗ്യകരമായ കൊഴുപ്പ് എന്നിവ അടങ്ങിയിട്ടുണ്ട്. തടി കുറക്കണമെങ്കില്‍ പനീര്‍ പല വിധത്തില്‍ രാവിലെ പ്രഭാത ഭക്ഷണത്തില്‍ ഉള്‍പ്പെടുത്താം.
ഇതിനായി പനീര്‍ സാന്‍ഡ് വിച്ചോ റൊട്ടിക്കൊപ്പം പനീര്‍ ബുര്‍ജിയോ കഴിക്കാം. രാവിലെ ഉപ്പും കുരുമുളകും ചേര്‍ത്ത് അസംസ്‌കൃത പനീറും കഴിക്കാം. ഇത് ശരീരഭാരം കുറയ്ക്കാന്‍ സഹായിക്കുക മാത്രമല്ല, ശരീരത്തിന് ഊര്‍ജം നല്‍കുകയും ചെയ്യുന്നു.
ഓട്സ്
തടി കുറയ്ക്കാന്‍ ഓട്സ് ഏറെ ഗുണം ചെയ്യും. പ്രോട്ടീന്, നാരുകള്‍, കാല്‍സ്യം, ഇരുമ്പ്, മഗ്‌നീഷ്യം, ഫോസ്ഫറസ്, പൊട്ടാസ്യം, ഫോളേറ്റ് തുടങ്ങിയ പോഷകങ്ങള്‍ ഇതില്‍ ധാരാളമായി അടങ്ങിയിട്ടുണ്ട്. ഓട്സ് കഴിക്കുന്നത് വഴി ഏറെ നേരം വയര്‍ നിറഞ്ഞ് നില്‍ക്കാനും ദഹനം ആരോഗ്യകരമാക്കാനും സഹായിക്കും. ഓട്‌സില്‍ ധാരാളം പച്ചക്കറികള്‍ ചേര്‍ക്കുന്നത് പോഷകമൂല്യം വര്‍ദ്ധിപ്പിക്കും.
തൈര്
നിങ്ങള്‍ക്ക് പാല്‍ ഇഷ്ടമല്ലെങ്കില്‍, പാലില്‍ നിന്ന് ലഭിക്കുന്ന തൈര് ഉപയോഗിച്ച് പോഷകനഷ്ടം നികത്താം. ഇതില്‍ ആവശ്യത്തിന് കാല്‍സ്യവും ധാതുക്കളും അടങ്ങിയിട്ടുണ്ട്. തൈരില്‍ അടങ്ങിയിരിക്കുന്ന പ്രോബയോട്ടിക്‌സ് കുടലിന്റെ ആരോഗ്യത്തിന് ഉത്തമമാണ്. ഇത് പ്രതിരോധശേഷി വര്‍ദ്ധിപ്പിക്കുകയും ശരീരഭാരം കുറയ്ക്കുകയും ചെയ്യുന്നു.
ഗ്രീന്‍ ടീ
തടി കുറയ്ക്കാനായി ഗ്രീന്‍ ടീ തിരഞ്ഞെടുക്കാം. രുചി ഇഷ്ടപ്പെടാത്തവര്‍ക്ക് ഇതിലേക്ക് ഇഞ്ചി, കറുവപ്പട്ട, അല്‍പം നാരങ്ങ തുടങ്ങിയവ ചേര്‍ക്കാം. എന്നാല്‍ മധുരം ചേര്‍ക്കരുത്.
നട്‌സ്
ശരീരഭാരം കുറയ്ക്കാന്‍ ശ്രമിക്കുന്നുണ്ടെങ്കില്‍ ഡയറ്റ് പ്ലാനില്‍ രാവിലെ തീര്‍ച്ചയായും നട്‌സ് ഉള്‍പ്പെടുത്തുക. ഇത് കഴിക്കുന്നത് ദിവസം മുഴുവന്‍ ഊര്‍ജ്ജസ്വലനാക്കും. ബദാം, വാല്‍നട്ട്, പിസ്ത, കശുവണ്ടി എന്നിവ തൈരില്‍ കലര്‍ത്തി കഴിക്കുന്നതും നല്ലതാണ്.
പീനട്ട് ബട്ടര്‍
പ്രോട്ടീന്, പോളിഫെനോള്‍സ്, ആന്റിഓക്സിഡന്റുകള്‍, വിറ്റാമിനുകള്‍, ധാതുക്കള്‍ എന്നിവയുടെ അത്ഭുതകരമായ കലവറയാണ് പീനട്ട് ബട്ടര്‍. ഈ പോഷകങ്ങളെല്ലാം ശരീരത്തിന് വളരെ ഉപയോഗപ്രദമാണ്. അതില്‍ നിന്നാണ് നിങ്ങളുടെ ശരീരത്തിന് ദിവസം മുഴുവന്‍ ഊര്‍ജം ലഭിക്കുന്നത്. ഫുഡ് സയന്‍സ് ആന്‍ഡ് ടെക്‌നോളജി ജേണലില്‍ പ്രസിദ്ധീകരിച്ച ഗവേഷണ പ്രകാരം മിതമായ അളവില്‍ പീനട്ട് ബട്ടര്‍ കഴിക്കുന്നത് ശരീരഭാരം കുറയ്ക്കാന്‍ ഗുണം ചെയ്യും എന്നാണ്.
ആപ്പിള്‍
ആയിരം മരുന്നുകള്‍ക്ക് പകരം വയ്ക്കാന്‍ ഒരു ആപ്പിളിന് സാധിക്കുമെന്നാണ് ശാസ്ത്രജ്ഞരും ഡോക്ടര്‍മാരും ആപ്പിളിനെ വിശേഷിപ്പിക്കുന്നത്. ആപ്പിള്‍ വെറും വയറ്റില്‍ കഴിക്കുന്നത് വഴി ആരോഗ്യത്തിന് ഗുണം ചെയ്യുകയും ശരീരഭാരം എളുപ്പത്തില്‍ കുറയ്ക്കുകയും ചെയ്യും.
പഞ്ചസാര
ശരീരഭാരം കുറയ്ക്കണമെങ്കില്‍ ഭക്ഷണത്തില്‍ പഞ്ചസാരയുടെ അളവ് നിയന്ത്രിക്കേണ്ടത് പ്രധാനമാണ്. ശുദ്ധീകരിച്ച പഞ്ചസാര അടങ്ങിയ ഭക്ഷണങ്ങള്‍ കലോറി മാത്രമേ നല്‍കൂ. പഞ്ചസാര കുറയ്ക്കുന്നതിലൂടെ കലോറി കുറക്കാന്‍ സാധിക്കും. മധുരത്തിനായി ഭക്ഷണത്തില്‍ ഈന്തപ്പഴം, ആപ്പിള്‍ തുടങ്ങിയവ ഉള്‍പ്പെടുത്താം.
സമാധാനത്തോടെ കഴിക്കുക
തിടുക്കത്തിലും ശ്രദ്ധയില്ലാതെയും ഭക്ഷണം കഴിക്കുന്നത് അമിതമായി ഭക്ഷണം കഴിക്കുന്നതിന് കാരണമാകും. അതുകൊണ്ടുതന്നെ മെറ്റബോളിസത്തെയും ദഹന പ്രക്രിയയെയും നിയന്ത്രിക്കുന്നതിനായി ശ്രദ്ധാപൂര്‍വം ഭക്ഷണം കഴിക്കണം.
