തിരുവനന്തപുരം: സംസ്ഥാനത്ത് കോവിഡ് വ്യാപനം വീണ്ടും രൂക്ഷമായ സാഹചര്യത്തില് സ്വകാര്യ ആശുപത്രികളില് 50 ശതമാനം കിടക്കകള് കോവിഡ് രോഗികള്ക്കായി മാറ്റിവെക്കാന് നിര്ദേശിച്ചതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. ഐ സി യു, വെന്റിലേറ്റര് എന്നിവയുള്പ്പെടെ സ്വകാര്യ ആശുപത്രിയിലെ കോവിഡ്, ഇതര രോഗികളുടെ ദൈനംദിന കണക്കുകള് ദിനംപ്രതി ജില്ലാ മെഡിക്കല് ഓഫീസര്ക്ക് കൈമാറണം. വിവരങ്ങള് കൃത്യമായി കൈമാറാത്തവര്ക്കെതിരെ പകര്ച്ചവ്യാധി പ്രതിരോധ നിയമ പ്രകാരം നടപടി സ്വീകരിക്കുമെന്നും മന്ത്രി മുന്നറിയിപ്പ് നല്കി.
സംസ്ഥാന റാപ്പിഡ് റെസ്പോണ്സ് ടീമിന്റെ (ആര് ആര് ടി) പ്രതിദിന അവലോകന യോഗത്തിലാണ് തീരുമാനം. കോവിഡിന്റെ രണ്ട് ഘട്ടങ്ങളിലും സ്വകാര്യ ആശുപത്രികളില് നിന്നും മികച്ച സഹകരണമാണ് ലഭിച്ചതെന്നും നിലവിലെ സാഹചര്യത്തിലും പിന്തുണ നല്കണമെന്നും മന്ത്രി പറഞ്ഞു. വാക്സിനേഷന് ഡോസുകളുടെ ഇടയില് ആരും കാലതാമസം വരുത്തരുതെന്നും ആര് ആര് ടി യോഗം വിലയിരുത്തി. ഒന്നും രണ്ടും ഡോസ് ചേര്ത്ത് സംസ്ഥാനത്തെ സമ്പൂര്ണ കോവിഡ് വാക്സിനേഷന് നിലവില് 83 ശതമാനമാണ്. കൃത്യമായ ഇടവേളകളില് രണ്ട് ഡോസ് വാക്സിനും സ്വീകരിച്ച് സുരക്ഷ ഉറപ്പാക്കണമെന്നും രണ്ടാം ഡോസ് വാക്സിന് സ്വീകരിച്ച് ഒമ്പത് മാസത്തിനുശേഷം കരുതല് ഡോസിന് അര്ഹരായവര് മൂന്നാമത്തെ വാക്സിനും സ്വീകരിക്കണമെന്നും യോഗം ആവശ്യപ്പെട്ടു.