പ്രായപൂര്‍ത്തിയായവര്‍ക്ക് വിവാഹത്തിന് മാതാപിതാക്കളുടെ അനുമതി ആവശ്യമില്ല; യുഎഇയില്‍ ഫെഡറല്‍ വ്യക്തി നിയമം പ്രാബല്യത്തില്‍
വിവാഹം, വിവാഹ മോചനം, കുട്ടികളുടെ കസ്റ്റഡി പ്രായം തുടങ്ങിയ വിഷയങ്ങളില്‍ ജനുവരിയില്‍ കൊണ്ടുവന്ന ഭേദഗതിയാണ് പ്രാബല്യത്തില്‍ വന്നത്.
അബുദാബി: ഫെഡറല്‍ വ്യക്തിനിയമം യുഎഇയില്‍ പ്രാബല്യത്തിലായി. 2025 ഏപ്രില്‍ 15 ചൊവ്വാഴ്ച മുതലാണ് ഫെഡറല്‍ വ്യക്തിനിയമം പ്രാബല്യത്തില്‍ വന്നത്. 18 വയസ്സിന് മുകളിലുള്ളവര്‍ക്ക് ജീവിതപങ്കാളിയെ തിരഞ്ഞെടുക്കാനുള്ള അവകാശം നല്‍കുന്ന പരിഷ്‌കരിച്ച ഫെഡറല്‍ വ്യക്തിനിയമം ആണ് ഇതോടെ പ്രാബല്യത്തിലായത്. വിവാഹം, വിവാഹ മോചനം, കുട്ടികളുടെ കസ്റ്റഡി പ്രായം തുടങ്ങിയ വിഷയങ്ങളില്‍ ജനുവരിയില്‍ കൊണ്ടുവന്ന ഭേദഗതിയാണ് പ്രാബല്യത്തില്‍ വന്നത്.
പുതിയ നിയമത്തിലെ പ്രധാന വ്യവസ്ഥകളും ഭേദഗതികളും ഓരോ പങ്കാളിക്കും സ്വതന്ത്രമായ സാമ്പത്തിക സ്ഥിതി ഉണ്ടെന്ന് വ്യവസ്ഥ ചെയ്യുന്നു. ഇത് ഭാര്യയുടെ സ്വത്തുക്കള്‍ കൈകാര്യം ചെയ്യാനുള്ള സ്വാതന്ത്ര്യം ഉറപ്പുനല്‍കുന്നു, കൂടാതെ ഭര്‍ത്താവിന് അവളുടെ സമ്മതമില്ലാതെ അവ വിനിയോഗിക്കാന്‍ കഴിയില്ല.
നിയമം അനുസരിച്ച്, ഒരു ഇണ ആസ്തി വികസനത്തിനോ, താമസസ്ഥലം പണികഴിപ്പിക്കുന്നതിനോ അല്ലെങ്കില്‍ സമാനമായ കാര്യങ്ങള്‍ക്കോ പണം സംഭാവന ചെയ്യുന്നുവെങ്കില്‍, അയാള്‍ അല്ലെങ്കില്‍ അവള്‍ മറ്റേ കക്ഷിയുമായോ അവകാശികളുമായോ കൂടിയാലോചിക്കണം.
പുതിയ നിയമപ്രകാരം പ്രായപൂര്‍ത്തിയായവര്‍ക്ക് ഇഷ്ടമുള്ളയാളെ വിവാഹം കഴിക്കാന്‍ മാതാപിതാക്കള്‍ വിസമ്മതിച്ചാലും കോടതി മുഖേന സാധിക്കും. വിദേശ മുസ്ലിം സ്ത്രീകളുടെ വിവാഹത്തിന് രക്ഷാകര്‍ത്താവ് വേണമെന്ന് അവരുടെ ദേശീയ നിയമം ആവശ്യപ്പെടുന്നില്ലെങ്കില്‍ മാതാപിതാക്കളുടെ സമ്മതമില്ലാതെ വിവാഹിതരാകാം. എന്നാല്‍ പുരുഷനും സ്ത്രീയും തമ്മില്‍ 30 വയസ്സിന്റെ എങ്കിലും അന്തരമുണ്ടെങ്കില്‍ കോടതിയുടെ അനുമതിയോടെ മാത്രമേ വിവാഹം ചെയ്യാന്‍ സാധിക്കൂ.
സ്ത്രീയെ വിവാഹം കഴിക്കാനുള്ള പുരുഷന്റെ അഭ്യര്‍ഥന മാത്രമാണ് വിവാഹ നിശ്ചയമെന്നും അതിനെ വിവാഹമായി കണക്കാക്കാനാവില്ലെന്നും നിയമത്തില്‍ വ്യക്തമാക്കുന്നു. വിവാഹത്തിന് അന്തിമ രൂപം നല്‍കിയ ശേഷം പിന്‍മാറുകയാണെങ്കില്‍ പരസ്പരം നല്‍കിയ സമ്മാനങ്ങള്‍ വീണ്ടെടുക്കാനും അനുമതി നല്‍കുന്നു. 25,000 ദിര്‍ഹത്തില്‍ കൂടുതല്‍ വിലയേറിയ സമ്മാനങ്ങള്‍ അവയുടെ മൂല്യത്തെ അടിസ്ഥാനമാക്കി വീണ്ടെടുക്കാം.
വിവാഹ മോചന കേസുകളില്‍ കുട്ടികളുടെ കസ്റ്റഡി പ്രായം 18 വയസ്സാക്കി ഉയര്‍ത്തി. നേരത്തെ ആണ്‍കുട്ടികള്‍ക്ക് 11 ഉം, പെണ്‍കുട്ടികള്‍ക്ക് 15 ഉം വയസ്സായിരുന്നു. എന്നാല്‍ 15 വയസ്സ് തികഞ്ഞാല്‍ ഏത് രക്ഷിതാവിനൊപ്പം ജീവിക്കണമെന്ന് തിരഞ്ഞെടുക്കാനുള്ള അവകാശം കുട്ടിക്കായിരിക്കും.
മാതാപിതാക്കളെ അവഗണിക്കല്‍, മോശമായി പെരുമാറല്‍, ദുരുപയോഗം ചെയ്യല്‍, ഉപേക്ഷിക്കല്‍, ആവശ്യമുള്ളപ്പോള്‍ സാമ്പത്തിക സഹായം നല്‍കാതിരിക്കല്‍ എന്നിവയ്ക്ക് കടുത്ത ശിക്ഷയാണ് വ്യക്തി നിയമത്തില്‍ വ്യവസ്ഥ ചെയ്യുന്നത്. പ്രായപൂര്‍ത്തിയാകാത്തവരുമായി അനുവാദമില്ലാതെ യാത്ര ചെയ്യുക, അവരുടെ സ്വത്ത് തട്ടിയെടുക്കുക, അനന്തരാവകാശം പാഴാക്കുക എന്നീ നിയമലംഘനങ്ങള്‍ക്കും കടുത്ത ശിക്ഷയുണ്ടാകും. തടവും 5000 ദിര്‍ഹം മുതല്‍ 1 ലക്ഷം ദിര്‍ഹം വരെ പിഴയുമാണ് ശിക്ഷ.
സ്ത്രീധന വ്യവസ്ഥകളെ സംബന്ധിച്ചിടത്തോളം, വിവാഹ കരാറില്‍ സ്ത്രീധനം പൂര്‍ണ്ണമായോ ഭാഗികമായോ മാറ്റിവയ്ക്കുന്നതിനുള്ള ഒരു കരാര്‍ ഉള്‍പ്പെടുത്താമെന്നും, മാറ്റിവയ്ക്കല്‍ വ്യവസ്ഥ ഉള്‍പ്പെടുത്തിയിട്ടില്ലെങ്കില്‍, പണമടയ്ക്കുന്നതിന് പ്രത്യേക സമയം നിശ്ചയിച്ചിട്ടില്ലെങ്കില്‍, സ്ത്രീധനം അഭ്യര്‍ത്ഥിച്ചാല്‍ നല്‍കണമെന്നും നിയമം പറയുന്നു.
ഇണകള്‍ പരസ്പരം ദയയോടെ പെരുമാറണമെന്നും സ്‌നേഹവും കരുണയും വളര്‍ത്തണമെന്നും ശാരീരികമോ വൈകാരികമോ ആയി ഉപദ്രവിക്കുന്നത് ഒഴിവാക്കണമെന്നും നിയമം പറയുന്നു. ഇണകള്‍ക്ക് മറ്റൊരാളുടെ സമ്മതമില്ലാതെ വൈവാഹിക ബന്ധം തടയാനോ കുട്ടികളുണ്ടാകുന്നതില്‍ തടസം നില്‍ക്കാനോ കഴിയില്ല.
ഭര്‍ത്താവ് ന്യായമായ സംരക്ഷണം നല്‍കാനും ചികിത്സയുടെയും സാമ്പത്തിക പിന്തുണയുടെയും കാര്യത്തില്‍ ഒന്നിലധികം ഭാര്യമാര്‍ ഉണ്ടെങ്കില്‍ അവരെ തുല്യമായി പരിഗണിക്കാനും ബാധ്യസ്ഥനാണ്, കൂടാതെ ഭാര്യ ഭര്‍ത്താവിനെ അനുസരിക്കാനും കുട്ടികളെ മുലയൂട്ടാനും ബാധ്യസ്ഥയാണ്.
കുടുംബ നിയമം ആധുനികവല്‍ക്കരിക്കുക, ലിംഗസമത്വം വര്‍ദ്ധിപ്പിക്കുക, എല്ലാ കുടുംബാംഗങ്ങളുടെയും, പ്രത്യേകിച്ച് കുട്ടികളുടെയും അവകാശങ്ങള്‍ സംരക്ഷിക്കുക എന്നിവയാണ് ഈ ഭേദഗതികളുടെ ലക്ഷ്യം.
