സര്‍വീസുകള്‍ വെട്ടിച്ചുരുക്കി എയര്‍ ഇന്ത്യ എക്സ്പ്രസ്; പ്രവാസികള്‍ക്ക് തിരിച്ചടിയാവും
മസ്‌കത്ത്: വിവിധ ഇന്ത്യന്‍ സെക്ടറുകളിലേക്കുള്ള സര്‍വീസുകള്‍ വെട്ടിച്ചുരുക്കിയ എയര്‍ ഇന്ത്യ എക്സ്പ്രസ് തീരുമാനം പ്രവാസികള്‍ക്ക് കനത്ത തിരിച്ചടിയാവും. കേരളത്തിലേക്കുള്ള വിവിധ സര്‍വീസുകളും ഇതിനോടൊപ്പം റദ്ദാക്കിയിട്ടുണ്ട്. മസ്‌കത്ത്-കോഴിക്കോട്, കൊച്ചി, തിരുവനന്തപുരം, കണ്ണൂര്‍, ചെന്നൈ, തിരുച്ചിറപ്പള്ളി, മംഗലാപുരം സര്‍വീസുകളാണ് എയര്‍ ഇന്ത്യ റദ്ദാക്കിയത്. ഫെബ്രുവരി 9ന് പുതിയ തീരുമാനം പ്രാബല്യത്തില്‍ വരും. നിലവിലെ നടപടി താത്കാലികമാണ്. മാര്‍ച്ച് 29 വരെ സര്‍വീസ് വെട്ടിച്ചുരുക്കിയത് തുടരും.
മസ്‌കത്തില്‍ നിന്ന് കോഴിക്കോട്ടേക്ക് ആഴ്ചയില്‍ എല്ലാ ദിവസവും സര്‍വീസ് നടത്തിയിരുന്ന എയര്‍ ഇന്ത്യ എക്സ്പ്രസ് വെട്ടിച്ചുരുക്കിയത് ഒന്‍പത് സര്‍വീസുകളാണ്. ബുധന്‍, വ്യാഴം ദിവസങ്ങളിലെ സര്‍വീസുകളാണ് കൂടുതലായും റദ്ദാക്കിയിരിക്കുന്നത്. ഫെബ്രുവരി 9, 12, 15, 17, 19, 20, 24, 26, 27 തീയതികളില്‍ കോഴിക്കോട് സര്‍വീസ് ഉണ്ടാകില്ല.
കണ്ണൂരിലേക്കും കൊച്ചിയിലേക്കും സര്‍വീസുകള്‍ കുറച്ചിട്ടുണ്ട്. ഫെബ്രുവരി 17 മുതല്‍ മസ്‌കത്തില്‍ നിന്ന് കണ്ണൂരിലേക്ക് ആഴ്ചയില്‍ നാല് സര്‍വീസുകള്‍ മാത്രമാണുണ്ടാവുക. ആഴ്ചയില്‍ ആറ് സര്‍വീസുകള്‍ നടത്തിയിരുന്നത് നാലായി ചുരുക്കി. കൊച്ചിയിലേക്കും ഫെബ്രുവരി 17 മുതല്‍ നാല് സര്‍വീസുകള്‍ മാത്രമാണ് എയര്‍ ഇന്ത്യ എക്സ്പ്രസ് നടത്തുന്നത്.
തിരുവനന്തപുരത്തേക്കുള്ള സര്‍വീസുകളും റദ്ദാക്കിയിട്ടുണ്ട്. രാവിലെ 8.40ന് തിരുവനന്തപുരത്തു നിന്ന് പുറപ്പെട്ട് ഒമാന്‍ സമയം 11.10ന് മസ്‌കത്തില്‍ എത്തുന്ന വിമാനവും അതെ ദിവസം മസ്‌കത്തില്‍നിന്ന് 12.30ന് പുറപ്പെട്ട് 6.10ന് തിരുവനന്തപുരത്ത് എത്തുന്ന വിമാനവും റദ്ദാക്കി. ഇതിന് പുറമെ ഫെബ്രുവരി 16 മുതല്‍ മാര്‍ച്ച് 16 വരെയുള്ള ഞായറാഴ്ചകളിലെ മസ്‌കത്ത്-തിരുവനന്തപുരം സര്‍വീസുകളും ഒഴിവാക്കിയിട്ടുണ്ട്.
മംഗലാപുരം, ചെന്നൈ, തിരുച്ചിറപ്പള്ളി റൂട്ടുകളിലും സര്‍വീസുകള്‍ റദ്ദാക്കിയിട്ടുണ്ട്. ഫെബ്രുവരി ഒമ്പത്, 17 തീയതികളില്‍ മംഗലാപുരം, ഫെബ്രുവരി 11 മുതല്‍ മാര്‍ച്ച് 25 വരെ മസ്‌കത്ത്-ചെന്നൈ (ചൊവ്വ), ഫെബ്രുവരി 17 മുതല്‍ മാര്‍ച്ച് 17 വരെ മസ്‌കത്ത്-തിരുച്ചിറപ്പള്ളി (തിങ്കള്‍), ഫെബ്രുവരി 24 മുതല്‍ മാര്‍ച്ച് 24 വരെ (ഞായര്‍, തിങ്കള്‍) മസ്‌കത്ത്-മംഗലാപുരം റൂട്ടുകളിലാണ് സര്‍വീസ് റദ്ദാക്കിയത്.
