ഇറച്ചിക്കറിയുടെ അതേരുചിയില്‍ കിടിലന്‍ സോയ ചങ്ക്‌സ് കറി ഉണ്ടാക്കാം
സോയ ചങ്ക്‌സ് കൊണ്ട് പലതരം വിഭവങ്ങള്‍ ഉണ്ടാക്കാം. കുട്ടികള്‍ക്കും മുതിര്‍ന്നവര്‍ക്കുമെല്ലാം ഈ വിഭവങ്ങള്‍ ഒരുപാട് ഇഷ്ടപ്പെടും. നോണ്‍വെജ് കഴിക്കാത്തവര്‍ പലരും സോയ ചങ്ക്‌സ് കൊണ്ടുള്ള കറികള്‍ ഉണ്ടാക്കുന്നത് പതിവാണ്. നോണ്‍വെജ് കഴിക്കുന്നവരും ഈ വിഭവങ്ങള്‍ ഉണ്ടാക്കാറുണ്ട്. ഇറച്ചിക്കറിയുടെ അതേരുചിയില്‍ ഒരു അടിപൊളി സിമ്പിള്‍ സോയ ചങ്ക്‌സ് കറി ഉണ്ടാക്കിയാലോ. സോയ ഇഷ്ടമില്ലാത്തവര്‍ പോലും ഇത് കഴിച്ചു പോകും.
ചേരുവകള്‍:
സോയ - 1 കപ്പ്
ഇഞ്ചി വെളുത്തുള്ളി ചതച്ചത് - 2 ടീ സ്പൂണ്‍
പച്ച മുളക് - 6 എണ്ണം
സവാള - 2 എണ്ണം
തക്കാളി - 1 എണ്ണം
കറി വേപ്പില- ആവശ്യത്തിന്
മഞ്ഞള്‍ പൊടി - 1/4 ടീ സ്പൂണ്‍
മുളക് പൊടി - 1 ടീ സ്പൂണ്‍
കാശ്മീരി മുളക് പൊടി - 1 ടീ സ്പൂണ്‍
മല്ലി പൊടി - 3 ടീ സ്പൂണ്‍
ഗരം മസാല പൊടി - 1/4 ടീ സ്പൂണ്‍
കുരുമുളക് പൊടി - 1/4 ടീ സ്പൂണ്‍
ഉപ്പ് ആവശ്യത്തിന്
വെളിച്ചെണ്ണ - ആവശ്യത്തിന്
ചെറിയുള്ളി - 1/4 കപ്പ്
തേങ്ങ ചിരകിയത് - 1/4 കപ്പ്
ഉണ്ടാക്കുന്ന വിധം
കഴുകിയ സോയ ചങ്ക്‌സ് തിളച്ച വെള്ളത്തില്‍ 10 മിനിറ്റ് കുതിര്‍ക്കാന്‍ വയ്ക്കുക. ശേഷം ചെറിയ കഷണങ്ങളാക്കി മുറിച്ച് അതിലെ വെള്ളമെല്ലാം പിഴിഞ്ഞ് കളഞ്ഞ ശേഷം ഒരു ബൗളിലേക്ക് ഇട്ടുകൊടുക്കുക. ഇതിലേക്ക് ചെറുതായി നീളത്തില്‍ കനം കുറച്ച് അരിഞ്ഞ സവാള, പച്ചമുളക് , കറി വേപ്പില ഇഞ്ചി വെളുത്തുള്ളി ചതച്ചത്, കുരുമുളകുപൊടി, ഗരംമസാല മുളകുപൊടി, കാശ്മീരി മുളകുപൊടി, മല്ലിപ്പൊടി എന്നിവ ഇട്ടുകൊടുത്ത് കൂടെ തന്നെ ആവശ്യത്തിന് ഉപ്പും കുറച്ചു വെളിച്ചെണ്ണയും ഒഴിച്ചു കൊടുത്ത് കൈകൊണ്ടുതന്നെ നന്നായി കുഴച്ചെടുത്ത് ഒരു കുക്കറിലേക്ക് ഇട്ടുകൊടുത്ത് രണ്ട് വിസില്‍ വേവിക്കുക.
ഒരു പാന്‍ അടുപ്പില്‍ വെച്ച് അതിലേക്ക് വെളിച്ചെണ്ണ ഒഴിച്ചു കൊടുത്ത് ചൂടാകുമ്പോള്‍ ചെറിയുള്ളി ചെറുതായി അരിഞ്ഞതും പച്ചമുളകും വേപ്പിലയും ഇട്ട് നന്നായി വഴറ്റുക. കൂടെ തന്നെ വറ്റല്‍മുളകും ഇതിലേക്ക് ഇഞ്ചി വെളുത്തുള്ളി ചതച്ചത് കാശ്മീരി മുളകുപൊടി കുരുമുളകുപൊടി, മല്ലിപ്പൊടി എന്നിവയും ഇട്ടുകൊടുത്ത് നന്നായി വഴറ്റുക.
ശേഷം തേങ്ങ വറുത്തത് മിക്‌സിയുടെ ജാറില്‍ ഇട്ട് അരച്ച് പേസ്റ്റ് രൂപത്തിലാക്കി അതും കൂടി ഇട്ടുകൊടുത്ത് എല്ലാം കൂടി ഇളക്കി യോജിപ്പിക്കുക. ഇനി ഇതിലേക്ക് നമ്മള്‍ വേവിച്ചു വച്ചിരിക്കുന്ന സോയ ഇട്ടുകൊടുത്ത് എല്ലാം കൂടി ഇളക്കി യോജിപ്പിക്കുക. ഇനി കറി നന്നായി വറ്റിച്ചെടുത്ത ശേഷം ഇതിലേക്ക് ഗരം മസാലയും വേപ്പിലയും കൂടി ഇട്ടു കൊടുത്ത് തീ ഓഫ് ചെയ്യാവുന്നതാണ്.
ചപ്പാത്തി, ദോശ, തുടങ്ങി ഏത് വിഭവത്തിനൊപ്പവും ഇത് കഴിക്കാം. അപാര രുചിയായിരിക്കും.
