കിടിലന്‍ രുചിയില്‍ പനീര്‍ വീട്ടില്‍ തന്നെ ഉണ്ടാക്കാം
പനീര്‍ മിക്കവരുടെയും ഇഷ്ടഭക്ഷണമാണ്. പ്രത്യേകിച്ച് വെജിറ്റേറിയന്‍ വിഭവങ്ങള്‍ മാത്രം കഴിക്കുന്നവര്‍ക്ക്. നോര്‍ത്ത് ഇന്ത്യയിലും മറ്റും പനീര്‍ കൊണ്ടുള്ള വിഭവങ്ങള്‍ സുലഭമാണ്. പനീര്‍ വിഭവങ്ങള്‍ തയ്യാറാക്കുമ്പോള്‍ പലരും പനീര്‍ സൂപ്പര്‍മാര്‍ക്കറ്റുകളില്‍ നിന്നോ മറ്റ് കടകളില്‍ നിന്നോ വാങ്ങിക്കുകയാണ് പതിവ്. ഇത് ഉണ്ടാക്കാനുള്ള പ്രയാസമാണ് ഇതിന് കാരണം. അല്‍പസമയം ഇതിന് വേണ്ടി മാറ്റിവച്ചാല്‍ പോഷക ഗുണങ്ങള്‍ ഒരുപാടുള്ള പനീര്‍ വീട്ടില്‍ തന്നെ ഉണ്ടാക്കാവുന്നതേ ഉള്ളൂ.
വളരെ സോഫ്റ്റ് ആയ, രുചികരമായ പനീര്‍ കിട്ടുകയും ചെയ്യും. പനീര്‍ എങ്ങനെ ഉണ്ടാക്കാം എന്ന് നോക്കാം.
ചേരുവകള്‍:
പാല്‍-1 ലിറ്റര്‍
ചെറുനാരങ്ങ-1
ഉണ്ടാക്കുന്ന വിധം
ചെറുനാരങ്ങ പിഴിഞ്ഞ് പാല്‍ കട്ടിയുള്ള ഒരു പാത്രത്തിലാക്കി ചൂടാക്കുക. ഒരു തവി കൊണ്ട് ഇളക്കുക. തിളച്ചു തുടങ്ങുമ്പോള്‍ തീ നല്ലപോലെ കുറച്ച് ഒരോ സ്പൂണ്‍ വീതം ചെറുനാരങ്ങാ നീര് ഒഴിക്കുക. പാല്‍ പിരിഞ്ഞു തുടങ്ങും. ഓരോ സ്പൂണ്‍ വീതം ചെറുനാരങ്ങാനീര് ഒഴിച്ചു കൊണ്ടിരിക്കുക. വെള്ളം താഴെയും കട്ടിയുള്ള പാട മുകളിലുമായി വരുന്നതു വരെ നാരങ്ങാനീര് ചേര്‍ക്കണം. ഈ മിശ്രിതത്തിന് ഇളം പച്ച നിറവും വരും.
വൃത്തിയുള്ള അരിക്കാന്‍ കഴിയുന്ന ഒരു തുണിയില്‍ ഈ മിശ്രിതം അരിക്കുക. വെള്ളം മുഴുവന്‍ വാര്‍ന്ന് കട്ടിയുള്ള ഭാഗം തുണിക്കുള്ളില്‍ ആകും. ഇത് അല്‍പനേരം ഇങ്ങനെ തന്നെ വയ്ക്കുക. കാരണം വെള്ളം മുഴുവന്‍ വാര്‍ന്നു പോകണം. പിന്നീട് പനീറുള്ള ഈ തുണി കിഴി രൂപത്തില്‍ കെട്ടി വച്ച് അതിനു മുകളില്‍ കട്ടിയുള്ള ഏതെങ്കിലും പാത്രമോ ചപ്പാത്തിക്കല്ലോ വയ്ക്കുക. വെള്ളം പൂര്‍ണമായി വാര്‍ന്നു പോകുവാനാണ് ഇങ്ങനെ ചെയ്യുന്നത്. ഒന്നു രണ്ടു മണിക്കൂറിന് ശേഷം കട്ടിയായ പനീര്‍ എടുത്ത് ഉപയോഗിക്കാം. അല്ലെങ്കില്‍ ഫ്രിഡ് ജില്‍ സൂക്ഷിക്കാം.
മേമ്പൊടി: കട്ടിയുള്ള പാലാണ് പനീര്‍ ഉണ്ടാക്കാന്‍ നല്ലത്. പാല്‍ തിളച്ചു തുടങ്ങാനേ പാടൂ. നല്ലപോലെ തിളപ്പിക്കരുത്. വീട്ടില്‍ ഉണ്ടാക്കുന്ന ഈ പനീര്‍ കഴിവതും വേഗം ഉപയോഗിക്കുന്നത് തന്നെയാണ് നല്ലത്. അല്ലെങ്കില്‍ കേടാകും. ചെറുനാരങ്ങാനീരിന് പകരം വിനെഗറും വേണമെങ്കില്‍ ചേര്‍ക്കാം. പനീര്‍ പൊതിയാന്‍ പാകത്തിന് വലിപ്പമുള്ള തുണിയായിരിക്കണം അരിയ്ക്കാന്‍ എടുക്കേണ്ടത്. പാല്‍ ഇളക്കാന്‍ മരത്തവിയായിരിക്കും കൂടുതല്‍ നല്ലത്.
പനീര്‍ അരിച്ചെടുത്ത് കിട്ടുന്ന വെള്ളം ചപ്പാത്തിമാവ് കുഴയ്ക്കാനും മറ്റും ഉപയോഗിക്കാം. ഇതില്‍ പോഷകഗുണം ധാരാളമുണ്ട്.
