തുരപ്പന്‍ പെരുച്ചാഴികള്‍ വീണ്ടും...!
ക്ഷേത്ര ചുമരും മേല്‍പ്പുരയും വാതിലും കട്ടിളയും സ്വര്‍ണത്തകിട് കൊണ്ട് പൊതിഞ്ഞത്. അതിന് മങ്ങലേറ്റു എന്നുപറഞ്ഞ് മിനുക്കാന്‍ കരാര്‍ കൊടുത്തു. കൊണ്ടുപോയതല്ല, തിരികെ എത്തിച്ചത്. കരാറുകാരനും ദേവസ്വം ഭരണാധികാരികളും തരികിടക്കാരായാല്‍ എന്ത് സംഭവിക്കും? ചക്കരക്കുടം കണ്ടാല്‍ കയ്യിട്ടു നക്കും; നല്ല സ്വാദ് ഉണ്ടെങ്കില്‍ കുടം അങ്ങനെ തന്നെ വായിലേക്ക് കമഴ്ത്തും.
'അറിഞ്ഞില്ലേ, വാര്‍ത്ത കണ്ടില്ലേ? ഒരു പെരുച്ചാഴി കൂടി കൂട്ടിലായി. ഇത് മൂന്നാമത്തേത്. തുടര്‍ നടപടികള്‍ ഉടനെ ഉണ്ടാകും.'
കാട്ടാനയും പുലിയും തൊട്ട് ചുണ്ടെലി വരെ സൈ്വര ജീവിതത്തിന് ഭീഷണിയാണല്ലോ കുറേക്കാലമായിട്ട്. മൂന്ന് പെരുച്ചാഴികള്‍ കൂട്ടില്‍ ആയതാണ് ഇപ്പോള്‍ വലിയ വാര്‍ത്തയായത് എന്ന് തോന്നി. പക്ഷേ, കൂട്ടിലായാല്‍ പിന്നെ എന്താണ് തുടര്‍ നടപടി? കൂട് തുറന്ന് പിടികൂടി പെരുച്ചാഴിയുടെ കഥ കഴിക്കണം -അതായത് തല്ലിക്കൊല്ലണം. ദൂരത്ത് എവിടെയെങ്കിലും കുഴിച്ചിടണം. ജന്തു പ്രേമികള്‍ അറിയേണ്ട. അവര്‍ പൊതുതാല്‍പര്യ ഹര്‍ജിയുമായി കോടതിയിലേക്ക് ഓടും. സര്‍ക്കാറിന് പൊല്ലാപ്പായി. ശല്യകാരികളായ ജന്തുക്കളെ നിയന്ത്രിക്കണം. ജന്തു പ്രേമികളെ തൃപ്തിപ്പെടുത്തുകയും വേണം.
എന്നാല്‍ ഈ പെരുച്ചാഴികളെ കൈകാര്യം ചെയ്യേണ്ടത് അങ്ങനെയല്ല. ചോദ്യം ചെയ്യണം, മൊഴി രേഖപ്പെടുത്തണം. അതിലെ നേരും നുണയും വേര്‍തിരിക്കണം. എന്നിട്ട് കോടതി സമക്ഷം സമര്‍പ്പിക്കണം; തെളിവുകള്‍ അടക്കം. അന്തിമവിധി വരാന്‍ വര്‍ഷങ്ങള്‍ എടുക്കും.
ഇവിടെ 'പെരുച്ചാഴി' എന്നു പറഞ്ഞത് ഒരു ആലങ്കാരിക പ്രയോഗം എന്ന നിലയിലാണ്. മഹാകവി പി. കുഞ്ഞിരാമന്‍ നായരോട് കടപ്പാട്.
'ക്ഷേത്രം ഭരിപ്പുകാരായ/
പെരുച്ചാഴികള്‍ കൂട്ടമായ്
മാന്തി പൊളിക്കയായ് സ്വര്‍ണ/
നിക്ഷേപത്തിന്റെ കല്ലറ/'
('നരബലി' എന്ന കവിതയില്‍ നിന്ന്)
1966 ജനുവരി രണ്ടിന്റെ മാതൃഭൂമി വാരികയില്‍ ആദ്യം പ്രസിദ്ധീകരിച്ചത്.
സ്വര്‍ണ്ണ നിക്ഷേപമുള്ള കല്ലറ മാന്തി പൊളിച്ചത് പെരുച്ചാഴികള്‍, 'ക്ഷേത്രം ഭരിപ്പുകാര്‍' എന്ന് അവകാശപ്പെടുന്നവരാണ്. ഇത്തരക്കാര്‍ ഭരിച്ചാല്‍ എന്താകും ക്ഷേത്രത്തിന്റെ അവസ്ഥ?
'പൂജയേല്‍ക്കാതെ, നൈവേദ്യം അര്‍പ്പിക്കാതെ, അസ്തശക്തിയായി മാറും, വരാഭയങ്ങള്‍ അരുളുന്ന ദേവീദേവന്മാര്‍!
കട്ടുതിന്ന് പണക്കുമ്പ വീര്‍ത്ത ഊരാളനെ കാണാനില്ല. ഒരുപക്ഷേ ദേവസ്വം മാളികയില്‍ പങ്കക്കാറ്റേറ്റ് ഉറങ്ങുന്നുണ്ടാകും.
ആറു പതിറ്റാണ്ട് മുമ്പത്തെ കാര്യമാണ് മഹാകവി 'നരബലി' എന്ന കവിതയിലൂടെ വിവരിച്ചത്. 2025 അവസാനിക്കുമ്പോഴും പെരുച്ചാഴികള്‍ സ്വര്‍ണനിക്ഷേപ കല്ലറ തുരക്കുന്നു.
ക്ഷേത്ര ചുമരും മേല്‍പ്പുരയും വാതിലും കട്ടിളയും സ്വര്‍ണത്തകിട് കൊണ്ട് പൊതിഞ്ഞത്. അതിന് മങ്ങലേറ്റു എന്നുപറഞ്ഞ് മിനുക്കാന്‍ കരാര്‍ കൊടുത്തു. കൊണ്ടുപോയതല്ല, തിരികെ എത്തിച്ചത്. കരാറുകാരനും ദേവസ്വം ഭരണാധികാരികളും തരികിടക്കാരായാല്‍ എന്ത് സംഭവിക്കും? ചക്കരക്കുടം കണ്ടാല്‍ കയ്യിട്ടു നക്കും; നല്ല സ്വാദ് ഉണ്ടെങ്കില്‍ കുടം അങ്ങനെ തന്നെ വായിലേക്ക് കമഴ്ത്തും.
ശബരിമലയില്‍ കള്ളക്കളി നടത്തിയവര്‍ അറസ്റ്റ് ചെയ്യപ്പെട്ടു. മുന്‍ ദേവസ്വം ബോര്‍ഡ് പ്രസിഡണ്ട് പത്മകുമാര്‍, 2019ല്‍ ദേവസ്വം കമ്മീഷണര്‍ ആയിരുന്ന എന്‍. വാസു, മൂരാരി ബാബു, സുധീഷ് കുമാര്‍, ശങ്കര്‍ദാസ്, പാലാവിള വിജയകുമാര്‍ -പ്രതികള്‍. ആരെല്ലാം ആണ് പെരുച്ചാഴികള്‍, ചുണ്ടെലികള്‍ എന്ന് അറിയാനിരിക്കുന്നതേയുള്ളൂ. കരാര്‍ എടുത്ത ഉണ്ണികൃഷ്ണന്‍ പോറ്റിയുമുണ്ട് പ്രതിപട്ടികയില്‍ ഒന്നാം സ്ഥാനത്ത്. ഇവരുടെ രാഷ്ട്രീയബന്ധം നോക്കണം.
പ്രതി പട്ടികയില്‍ ഉള്ളവരുടെ രാഷ്ട്രീയം -അതാണ് എല്ലാവരും ആദ്യം അന്വേഷിക്കുക. ശബരിമല സ്വര്‍ണ്ണത്തട്ടിപ്പ് കേസില്‍ ആരോപണ വിധേയര്‍ എല്ലാവരും -പത്മകുമാര്‍, വാസു, മൂരാരി ബാബു... സി.പി.എം.കാരാണത്രേ. ഇപ്പോള്‍ ഭരണ നേതൃത്വം വഹിക്കുന്നവരുടെ സ്വന്തക്കാരും ബന്ധുക്കളും എന്ന് പ്രതിപക്ഷം. മുമ്പ് ആയിരുന്നു; ഇപ്പോള്‍ പാര്‍ട്ടിക്ക് പുറത്ത് എന്ന് ഭരണക്കാര്‍. കേസിന്റെ ഗതി നിര്‍ണയിക്കുന്നതില്‍ ഇതും...
ഡോ. സാമുവല്‍ ജോണ്‍സണ്‍ പറഞ്ഞു: 'പാട്രിയോട്ടിസം ഈസ് ദ ലാസ്റ്റ് റഫ്യൂജ് ഓഫ് ദ സ്‌കൗണ്ട്രല്‍സ്' (തെമ്മാടികളുടെ അവസാനത്തെ അഭയസ്ഥാനം രാഷ്ട്രീയം).
പ്രശസ്ത മാധ്യമപ്രവര്‍ത്തകന്‍ ടി.ജെ.എസ്. ജോര്‍ജ് തിരുത്തിപ്പറഞ്ഞു: 'പൊളിറ്റിക്‌സ് ഈസ് ദ ഫസ്റ്റ് റഫ്യൂജ് ഓഫ് സ്‌കൗണ്ട്രല്‍സ് ഇന്‍ മോഡേണ്‍ ഇന്ത്യ'. (ആധുനിക ഇന്ത്യയില്‍ ആദ്യത്തെ അഭയസ്ഥാനം ആണ് രാഷ്ട്രീയം). തുരപ്പന്‍ പെരുച്ചാഴികളുടെയും.
