ധനുഷിന്റെ 'നിലാവുക്ക് എന്‍ മേല്‍ എന്നടി കോപം' ട്രെയിലര്‍ പുറത്ത്: അനിഖയും പ്രിയാ വാര്യരും പ്രധാന വേഷത്തില്‍
ധനുഷ് സംവിധാനം ചെയ്യുന്ന നിലാവുക്ക് എന്‍ മേല്‍ എന്നടി കോപം എന്ന തമിഴ് ചിത്രത്തിന്റെ ട്രെയിലര്‍ റിലീസ് ചെയ്തു. നായകനും അയാളുടെ രണ്ട് പ്രണയങ്ങളും ആണ് ചിത്രത്തിന്റെ പ്രമേയമെന്ന് ട്രെയിലറില്‍ നിന്നും വ്യക്തമാകുന്നു. ധനുഷ് തന്നെ തിരക്കഥ എഴുതുന്ന ചിത്രത്തിന്റെ ഛായാഗ്രാഹണം നിര്‍വഹിക്കുന്നത് ലിയോണ്‍ ബ്രിട്ടോയാണ്. ജി വി പ്രകാശ് കുമാറാണ് സംഗീതം നിര്‍വഹിക്കുന്നത്.
ലിയോ എന്ന ചിത്രത്തിന് ശേഷം മാത്യു തോമസ് അഭിനയിക്കുന്ന തമിഴ് ചിത്രം കൂടിയാണ് ഇത്. ധനുഷ് ഗാന രംഗത്ത് മാത്രമെത്തുന്ന ചിത്രത്തില്‍ പവിഷ്, അനിഖ സുരേന്ദ്രന്‍, പ്രിയ പ്രകാശ് വാര്യര്‍, മാത്യു തോമസ്, റാബിയ, വെങ്കടേഷ് മേനോന്‍, അന്‍പ്, സതിഷ് എന്നിവരും പ്രധാന കഥാപാത്രങ്ങളായി എത്തുന്നു.
ഫെബ്രുവരി 21ന് ചിത്രം തിയറ്ററുകളില്‍ എത്തും. ഫെബ്രുവരി ഏഴിനായിരുന്നു നേരത്തെ റിലീസ് പ്രഖ്യാപിച്ചിരുന്നത്. എന്നാല്‍ അജിത്ത് ചിത്രം വിടാമുയര്‍ച്ചി റിലീസ് ചെയ്യുന്നതിനാല്‍ അണിയറ പ്രവര്‍ത്തകര്‍ തീയതി മാറ്റുകയായിരുന്നു.
ധനുഷിന്റെ സംവിധാനത്തില്‍ ഒരുങ്ങുന്ന മറ്റൊരു സിനിമയാണ് ഇഡ്‌ലി കടൈ. 2025 ഏപ്രില്‍ 10 ന് ചിത്രം ലോകമെമ്പാടുമുള്ള തിയറ്ററുകളില്‍ എത്തും. ധനുഷ് സംവിധാനം ചെയ്യുന്ന നാലാമത്തെ ചിത്രമാണിത്. നിത്യ മേനോനും ശാലിനി പാണ്ഡേയും പ്രധാന വേഷങ്ങളില്‍ എത്തുന്നു. വണ്ടര്‍ബാര്‍ ഫിലിംസ്, ഡോണ്‍ പിക്‌ചേഴ്‌സ് എന്നീ ബാനറുകളില്‍ ആകാശ് ഭാസ്‌കരനും ധനുഷും ചേര്‍ന്നാണ് ചിത്രത്തിന്റെ നിര്‍മ്മാണം. ധനുഷ് അഭിനയിക്കുന്ന 52-ാമത്തെ ചിത്രമാണിത്. പ പാണ്ടി, രായന്‍ എന്നിവയാണ് ധനുഷിന്റെ സംവിധാനത്തില്‍ ഇതിനകം പുറത്തെത്തിയ ചിത്രങ്ങള്‍.
