തിരുവനന്തപുരം: ഡോളര് കടത്ത് കേസുമായി ബന്ധപ്പെട്ട് സ്പീക്കര് പി. ശ്രീരാമകൃഷ്ണനെ കസ്റ്റംസ് ചോദ്യം ചെയ്തു. തിരുവനന്തപുരത്തെ വസതിയിലെത്തിയാണ് കസ്റ്റംസ് ഉദ്യോഗസ്ഥ സംഘം സ്പീക്കറെ ചോദ്യം ചെയ്തത്. കസ്റ്റംസ് സൂപ്രണ്ട് സലിലിന്റെ നേതൃത്വത്തിലായിരുന്നു ചോദ്യം ചെയ്യല്. വ്യാഴാഴ്ച കൊച്ചിയില് ഹാജരാകാന് സമന്സ് നല്കിയിരുന്നുവെങ്കിലും സുഖമില്ലെന്ന് പറഞ്ഞ് സ്പീക്കര് ഹാജരായിരുന്നില്ല. തുടര്ന്ന് കസ്റ്റംസ് ഉദ്യോഗസ്ഥര് സ്പീക്കറുടെ വസതിയിലെത്തുകയായിരുന്നു.
അതേ സമയം സൗകര്യം ചോദിച്ചറിഞ്ഞാണ് കസ്റ്റംസ് ഔദ്യോഗിക വസതിയില് എത്തിയതെന്നും ആവശ്യമായ എല്ലാ വിവാദങ്ങള്ക്കും വിശദീകരണം നല്കാന് തയാറാണെന്ന് നേരത്തെതന്നെ അറിയിച്ചതാണെന്നും സ്പീക്കര് വിശദീകരിച്ചു. വിമാനത്താവളത്തിലെ വിവാദ കേസുമായി ബന്ധപ്പെട്ട് സ്പീക്കറില് നിന്നും ആവശ്യമായ വിശദീകരണം നല്കുന്ന കാര്യത്തില് ദൃശ്യമാധ്യമങ്ങളിലൂടെ വന്നുകൊണ്ടിരിക്കുന്ന പലതരം ഊഹാപോഹങ്ങള് ശരിയല്ലെന്നും സ്പീക്കറുടെ ഓഫീസ് വ്യക്തമാക്കി.
സ്പീക്കര് പി. ശ്രീരാമകൃഷ്ണനെ കസ്റ്റംസ് ചോദ്യം ചെയ്ത സാഹചര്യത്തില് അദ്ദേഹം സ്പീക്കര് പദവിയില് തുടരുന്നത് ഉചിതമല്ലെന്നും എത്രയും വേഗം രാജിവയ്ക്കണമെന്നും കെ.പി.സി.സി പ്രസിഡണ്ട് മുല്ലപ്പള്ളി രാമചന്ദ്രന് ആവശ്യപ്പെട്ടു. കസ്റ്റംസ് ചോദ്യം ചെയ്തിട്ടും അത് രഹസ്യമാക്കി സൂക്ഷിക്കാനാണ് സര്ക്കാര് കേന്ദ്രങ്ങള് ശ്രമിച്ചത്. മന്ത്രി ജലീല് തലയില് മുണ്ടിട്ട് കേന്ദ്ര ആന്വേഷണ ഏജന്സികള്ക്ക് മുന്നില് ഹാജരായത് കേരളം മറന്നിട്ടില്ലെന്നും മുല്ലപ്പള്ളി പ്രസ്താവനയില് ചൂണ്ടിക്കാട്ടി.