തിരുവനന്തപുരം: കേരളത്തില് ഞായറാഴ്ച സമ്പൂര്ണ ലോക് ഡൗണ് ഏര്പ്പെടുത്തും. ഒരു ഇടവേളയ്ക്ക് ശേഷമാണ് സംസ്ഥാനത്ത് വീണ്ടും വാരാന്ത്യ ലോക്ഡൗണ് ഏര്പ്പെടുത്തുന്നത്. ട്രിപ്പിള് ലോക് ഡൗണിന് സമാനമായ നിയന്ത്രണങ്ങള് ഞായറാഴ്ച ഉണ്ടായിരിക്കുമെന്ന് സര്ക്കാര് വ്യക്തമാക്കി.
ഓണത്തിന്റെ പശ്ചാത്തലത്തില് കഴിഞ്ഞ രണ്ട് ഞായറാഴ്ചകളില് സംസ്ഥാനത്ത് വാരാന്ത്യ ലോക് ഡൗണില്ലായിരുന്നു. നിയന്ത്രണങ്ങളുണ്ടായിരുന്നെങ്കിലും ജനജീവിതം സാധാരണ നിലയിലേക്ക് വന്ന ശേഷമാണ് വീണ്ടും ലോക് ഡൗണ് ഏര്പ്പെടുത്തുന്നത്. കേരളത്തില് കോവിഡ് വ്യാപനം രൂക്ഷമായ പ്രദേശങ്ങളില് രാത്രി കാല കര്ഫ്യു ഏര്പ്പെടുത്താന് കേന്ദ്രസര്ക്കാര് കര്ശന നിര്ദേശം നല്കി. രോഗവ്യാപനത്തില് സമാന സ്ഥിതിയിലുള്ള മഹാരാഷ്ട്രക്കും ഇതേ നിര്ദേശം നല്കിയിട്ടുണ്ട്. രണ്ട് സംസ്ഥാനങ്ങളിലേയും കോവിഡ് പ്രതിരോധ പ്രവര്ത്തനങ്ങളുടെ പുരോഗതി വിലയിരുത്താന് പ്രത്യേകമായി വിളിച്ചുചേര്ത്ത യോഗത്തിലാണ് കേന്ദ്ര ആഭ്യന്തര സെക്രട്ടറി അജയ് കുമാര് ബല്ല ഈ ആവശ്യം ഉന്നയിച്ചത്.