സെപ്റ്റംബര്‍ 15 മുതല്‍ പുതിയ യുപിഐ നിയമങ്ങള്‍ പ്രാബല്യത്തില്‍: മാറ്റങ്ങള്‍ അറിയാം
ഇത് പൊതുജനങ്ങള്‍ക്കും ബിസിനസുകാര്‍ക്കും വലിയ ഡിജിറ്റല്‍ പേയ്മെന്റുകള്‍ നടത്തുന്നത് എളുപ്പമാക്കുന്നു
സെപ്റ്റംബര്‍ 15 മുതല്‍ പുതിയ യൂണിഫൈഡ് പേയ്മെന്റ് ഇന്റര്‍ഫേസ് (യുപിഐ) നിയമങ്ങള്‍ പ്രാബല്യത്തില്‍ വരും. തിരഞ്ഞെടുത്ത വിഭാഗങ്ങളിലെ യുപിഐ ഇടപാടുകള്‍ക്ക് നാഷണല്‍ പേയ്മെന്റ് കോര്‍പ്പറേഷന്‍ ഓഫ് ഇന്ത്യ (എന്‍പിസിഐ) ഉയര്‍ന്ന പരിധികള്‍ നടപ്പിലാക്കുന്നു. ഇത് പൊതുജനങ്ങള്‍ക്കും ബിസിനസുകാര്‍ക്കും വലിയ ഡിജിറ്റല്‍ പേയ്മെന്റുകള്‍ നടത്തുന്നത് എളുപ്പമാക്കുന്നു.
ഇന്‍ഷുറന്‍സ് അടയ്ക്കല്‍, ലോണ്‍ ഇഎംഐകള്‍ അല്ലെങ്കില്‍ മാര്‍ക്കറ്റുകളില്‍ നിക്ഷേപിക്കല്‍ തുടങ്ങിയ പേഴ്സണ്‍-ടു-മെര്‍ച്ചന്റ് (പി 2 എം) ഇടപാടുകള്‍ക്ക് പുതിയ മാറ്റങ്ങള്‍ ബാധകമാകും. കുടുംബാംഗങ്ങള്‍ക്കോ സുഹൃത്തുക്കള്‍ക്കോ പണം അയയ്ക്കുന്നത് പോലുള്ള പേഴ്സണ്‍-ടു-പേഴ്സണ്‍ (പി 2 പി) ട്രാന്‍സ്ഫറുകള്‍ക്കുള്ള ദൈനംദിന പരിധി പ്രതിദിനം 1 ലക്ഷം രൂപയില്‍ മാറ്റമില്ലാതെ തുടരുന്നു.
യുപിഐ പരിധികളില്‍ മാറുന്നത്
മൂലധന വിപണി നിക്ഷേപങ്ങളും ഇന്‍ഷുറന്‍സും:
ഇടപാട് പരിധി 2 ലക്ഷം രൂപയില്‍ നിന്ന് 5 ലക്ഷം രൂപയായി ഉയര്‍ത്തും, പരമാവധി 24 മണിക്കൂറിനുള്ളില്‍ 10 ലക്ഷം രൂപവരെ കൈമാറാന്‍ സാധിക്കും.
സര്‍ക്കാര്‍ ഇ-മാര്‍ക്കറ്റ് പ്ലേസും നികുതി പേയ്മെന്റുകളും:
ഓരോ ഇടപാടിനും ഒരു ലക്ഷം എന്ന പരിധി അഞ്ചു ലക്ഷമാക്കിയാണ് ഉയര്‍ത്തിയത്.
യാത്രാ ബുക്കിംഗുകള്‍:
ഓരോ ഇടപാടിനും പരിധി ഒരു ലക്ഷത്തില്‍ നിന്ന് 5 ലക്ഷമായി ഉയര്‍ത്തും, പ്രതിദിനം പരമാവധി 10 ലക്ഷം രൂപ.
ക്രെഡിറ്റ് കാര്‍ഡ് ബില്‍ പേയ്മെന്റുകള്‍:
ഒറ്റയടിക്ക് 5 ലക്ഷം രൂപ വരെ ഇടപാടുകള്‍ നടത്താം, എന്നിരുന്നാലും ദിവസേനയുള്ള പരിധി 6 ലക്ഷം രൂപയായി പരിമിതപ്പെടുത്തും.
ലോണ്‍, ഇഎംഐ കളക്ഷനുകള്‍:
ഓരോ ഇടപാടിനും 5 ലക്ഷം രൂപയായി വര്‍ദ്ധിപ്പിച്ചു, പ്രതിദിനം പരമാവധി 10 ലക്ഷം രൂപ.
ആഭരണ വാങ്ങലുകള്‍:
പരിധി ഒരു ഇടപാടിന് 1 ലക്ഷം രൂപയില്‍ നിന്ന് 2 ലക്ഷം രൂപയായി ഇരട്ടിയാക്കും, പ്രതിദിനം പരമാവധി 6 ലക്ഷം രൂപ.
ടേം ഡെപ്പോസിറ്റുകള്‍ (ഡിജിറ്റല്‍ ഓണ്‍ബോര്‍ഡിംഗ്):
മുമ്പത്തെ 2 ലക്ഷവുമായി താരതമ്യപ്പെടുത്തുമ്പോള്‍, ഡിജിറ്റല്‍ ഓണ്‍ബോര്‍ഡിങ് വഴിയുള്ള ടേം ഡെപ്പോസിറ്റ് പരിധി അഞ്ചു ലക്ഷമാക്കി ഉയര്‍ത്തി. ഒറ്റ ഇടപാടായി അഞ്ചുലക്ഷം രൂപ വരെ കൈമാറാം. എന്നാല്‍ ഒരു ദിവസം മൊത്തത്തില്‍ കൈമാറാന്‍ കഴിയുന്ന തുകയും അഞ്ചു ലക്ഷമാണ്.
ഡിജിറ്റല്‍ അക്കൗണ്ട് തുറക്കല്‍:
മാറ്റമില്ല, 2 ലക്ഷം രൂപയില്‍ തന്നെ തുടരുന്നു.
ബിബിപിഎസ് വഴിയുള്ള വിദേശനാണ്യ പേയ്മെന്റുകള്‍:
ഇപ്പോള്‍ ഓരോ ഇടപാടിനും 5 ലക്ഷം രൂപ വരെ അനുവദിക്കും, പ്രതിദിനം 5 ലക്ഷം രൂപയായി പരിമിതപ്പെടുത്തും.
