മുകേഷ് അംബാനിയുടെ നേതൃത്വത്തിലുള്ള റിലയന്‍സ് ഇന്‍ഡസ്ട്രീസിന് 56.44 കോടി രൂപ പിഴ ഇട്ട് ജി.എസ്.ടി
2017-ലെ കേന്ദ്ര-സംസ്ഥാന ചരക്ക് സേവന നികുതി നിയമത്തിലെ സെക്ഷന്‍ 74 പ്രകാരമാണ് പിഴ ചുമത്തിയിരിക്കുന്നത്
മുംബൈ: മുകേഷ് അംബാനിയുടെ നേതൃത്വത്തിലുള്ള റിലയന്‍സ് ഇന്‍ഡസ്ട്രീസിന് 56.44 കോടി രൂപയുടെ പിഴ ഇട്ട് ജി.എസ്.ടി. അഹമ്മദാബാദിലെ സെന്‍ട്രല്‍ ജി.എസ്.ടി ജോയിന്റ് കമ്മീഷണറില്‍ നിന്നാണ് 56.44 കോടി രൂപയുടെ നികുതി അടക്കാന്‍ നിര്‍ദേശം നല്‍കിയത്.
ഇന്‍പുട്ട് ടാക്സ് ക്രെഡിറ്റ് വകയിരുത്തിയതുമായി ബന്ധപ്പെട്ട ചില പ്രശ്നങ്ങളാണ് പിഴ ചുമത്താന്‍ കാരണമായത്. 2017-ലെ കേന്ദ്ര-സംസ്ഥാന ചരക്ക് സേവന നികുതി നിയമത്തിലെ സെക്ഷന്‍ 74 പ്രകാരമാണ് പിഴ ചുമത്തിയിരിക്കുന്നത്. ഉത്തരവിനെ ചോദ്യം ചെയ്ത് അപ്പീല്‍ നല്‍കുമെന്ന് കമ്പനി അറിയിച്ചു.
വന്‍തുക പിഴയായി വിധിച്ചെന്ന വാര്‍ത്ത പുറത്തുവന്നെങ്കിലും റിലയന്‍സിന്റെ ഓഹരികളെ അത് ബാധിച്ചിട്ടില്ലെന്ന് അധികൃതര്‍ വ്യക്തമാക്കി. വിപണിയില്‍ റിലയന്‍സ് ഓഹരികള്‍ നേട്ടത്തിലാണ് വ്യാപാരം നടത്തിയത്. ഇത് കേവലം ഒരു നികുതി തര്‍ക്കം മാത്രമാണെന്നും കമ്പനിയുടെ അടിസ്ഥാന പ്രവര്‍ത്തനങ്ങളെ ബാധിക്കില്ലെന്നും വിപണി വിദഗ്ധര്‍ വിലയിരുത്തി.
പിഴത്തുകയല്ലാതെ മറ്റ് സാമ്പത്തിക ബാധ്യതകളൊന്നും ഈ നടപടി വഴി ഉണ്ടാകില്ലെന്നും, കമ്പനിയുടെ ദൈനംദിന പ്രവര്‍ത്തനങ്ങളെയോ പദ്ധതികളെയോ നടപടി ബാധിക്കില്ലെന്നും റിലയന്‍സ് അധികൃതര്‍ അറിയിച്ചു. വന്‍കിട കമ്പനികളുടെ ജി.എസ്.ടി ഫയലിംഗുകളില്‍ നികുതി വകുപ്പ് കര്‍ശന പരിശോധന നടത്തുന്നതിന്റെ ഭാഗമായാണ് ഇത്തരം നടപടികള്‍ വര്‍ദ്ധിച്ചുവരുന്നത്.
