റോക്കറ്റ് വേഗതയില്‍ സ്വര്‍ണവില; പവന് 64000 കടന്ന് ചരിത്രവിലയില്‍
കൊച്ചി: സംസ്ഥാനത്ത് റെക്കോര്‍ഡുകള്‍ തകര്‍ത്ത് സ്വര്‍ണത്തിന്റെ കുതിപ്പ് തുടരുന്നു. രണ്ട് ദിവസത്തിനിടെ പവന് 920 രൂപയുടെ വര്‍ധനവാണ് ഉണ്ടായിരിക്കുന്നത്. ഇന്ന് സ്വര്‍ണം ഗ്രാമിന് 80 രൂപയും പവന് 640 രൂപയുമാണ് കൂടിയത്. ഇതോടെ ഗ്രാമിന് 8060 രൂപയിലും പവന് 64480 രൂപയിലുമാണ് വ്യാപാരം നടക്കുന്നത്.
18 കാരറ്റ് സ്വര്‍ണത്തിന് ഗ്രാമിന് 65 രൂപയും പവന് 520 രൂപയും കൂടി. ഇതോടെ 18 കാരറ്റ് സ്വര്‍ണത്തിന് ഗ്രാമിന് 6650 രൂപയിലും പവന് 53200 രൂപയിലുമാണ് വ്യാപാരം നടക്കുന്നത്. വെള്ളി നിരക്കില്‍ കഴിഞ്ഞ കുറേദിവസങ്ങളായി മാറ്റമില്ല. ഒരു ഗ്രാം സാധാരണ വെള്ളിക്ക് 106 രൂപയിലാണ് വ്യാപാരം നടക്കുന്നത്. അതേസമയം, ഹാള്‍മാര്‍ക് വെള്ളിയുടെ വില മാസങ്ങളായി രേഖപ്പെടുത്തിയിട്ടില്ല.
പുതുവര്‍ഷം പിറന്നത് മുതല്‍ സ്വര്‍ണ വിലയില്‍ ഉയര്‍ച്ചയാണ് ഭൂരിഭാഗം ദിനങ്ങളിലും ഉണ്ടായത്. പവന് 57000 ല്‍ ഉണ്ടായിരുന്ന വില ഒരു മാസം പിന്നിടുമ്പോള്‍ 7480 രൂപയുടെ വര്‍ധനവാണ് ഉണ്ടായിരിക്കുന്നത്. സ്വര്‍ണവില
കഴിഞ്ഞാഴ്ച മിക്ക ദിനങ്ങളിലും സര്‍വകാല റെക്കോര്‍ഡില്‍ ആണ് വ്യാപാരം നടത്തിയത്. ഡോളറിനെതിരായ രൂപയുടെ വിലത്തകര്‍ച്ചയും അന്താരാഷ്ട്ര വിപണിയിലെ ചലനങ്ങളും ഓഹരി വിപണിയിലെ മാറ്റങ്ങളുമാണ് സ്വര്‍ണവിലയെ സ്വാധീനിക്കുന്നത്.
