വിക്കി പീഡിയയ്ക്ക് ബദലുമായി ഇലോണ്‍ മസ്‌ക്; ഗ്രോക്കി പീഡിയ പുറത്തിറക്കി
ഇതിലെ ലേഖനങ്ങള്‍ മസ്‌കിന്റെ ഗ്രോക്ക് എഐ എഴുതിയതാണ്
ഓണ്‍ലൈന്‍ എന്‍സൈക്ലോപീഡിയയായ വിക്കി പീഡിയയ്ക്ക് ബദലുമായി ഇലോണ്‍ മസ്‌ക് രംഗത്ത്. ഗ്രോക്കി പീഡിയ എന്ന പുതിയ ഓണ്‍ലൈന്‍ എന്‍സൈക്ലോപീഡിയയുടെ പ്രാരംഭ വേര്‍ഷന്‍ കഴിഞ്ഞദിവസം അദ്ദേഹം ലോഞ്ച് ചെയ്തു. എക്‌സിലൂടെ മസ്‌ക് തന്നെയാണ് ഇക്കാര്യം അറിയിച്ചത്.
'ഗ്രോക്കിന്റെയും ഗ്രോക്കിപീഡിയ.കോമിന്റെയും ലക്ഷ്യം സത്യമാണ്, മുഴുവന്‍ സത്യവും സത്യമല്ലാതെ മറ്റൊന്നുമല്ല. നമ്മള്‍ ഒരിക്കലും പൂര്‍ണരാകില്ല, പക്ഷേ ആ ലക്ഷ്യത്തിലേക്ക് നമ്മള്‍ പരിശ്രമിക്കും,' എന്നാണ് മസ്‌ക് തന്റെ സോഷ്യല്‍ മീഡിയ പ്ലാറ്റ് ഫോമായ എക്സില്‍ എഴുതിയത്. പിന്നീട് 'ഭ്രമണപഥത്തിലെ സ്ഥിരതയുള്ള ഓക്സൈഡില്‍, ചന്ദ്രനെയും ചൊവ്വയെയും ഭാവിയിലേക്ക് സംരക്ഷിക്കുന്നതിനായി' എന്നും അദ്ദേഹം കൂട്ടിച്ചേര്‍ത്തു.
ഇതിലെ ലേഖനങ്ങള്‍ മസ്‌കിന്റെ ഗ്രോക്ക് എഐ എഴുതിയതാണ്. സൈറ്റ് വിക്കി പീഡിയയുടെ മിനിമലിസ്റ്റ് ശൈലി, പേജ് ഘടന, റഫറന്‍സ് ശൈലി എന്നിവ അനുകരിക്കുന്നു. എന്നാല്‍ ഗ്രോക്കി പീഡിയ ഇപ്പോള്‍ വളരെ ചെറുതാണ്. 7 ദശലക്ഷത്തിലധികം വരുന്ന ലേഖനങ്ങളാണ് വിക്കി പീഡിയയില്‍ ഉള്ളത്. ഇതുമായി താരതമ്യപ്പെടുത്തുമ്പോള്‍ 800,000-ല്‍ അധികം ലേഖനങ്ങള്‍ മാത്രമേ ഗ്രോക്കി പീഡിയയില്‍ ഉള്ളൂ.
ആര്‍ക്കും വിക്കി പീഡിയ ലേഖനങ്ങള്‍ എഴുതാനും എഡിറ്റ് ചെയ്യാനും കഴിയുമെങ്കിലും, ഗ്രോക്കി പീഡിയ ലേഖനങ്ങളില്‍ എത്രത്തോളം പേര് ഉള്‍പ്പെട്ടിട്ടുണ്ടെന്ന് വ്യക്തമല്ല. ഒരു പിശക് സംഭവിച്ചുവെന്ന് കരുതുന്നുവെങ്കില്‍ ഉപയോക്താക്കള്‍ക്ക് ഫീഡ് ബാക്ക് അയയ്ക്കാനുള്ള ഓപ്ഷനും ഉണ്ട്.
ഗ്രോക്കി പീഡിയ തുടര്‍ച്ചയായി അപ്ഡേറ്റ് ചെയ്യുമെന്ന് മസ്‌ക് പറഞ്ഞിട്ടുണ്ട്. 'ഗ്രോക്ക് മെച്ചപ്പെടുമ്പോള്‍, ഗ്രോക്കി പീഡിയയും മെച്ചപ്പെടും,' എന്ന് അദ്ദേഹം ചൊവ്വാഴ്ച എക്സില്‍ കുറിച്ചു. 'ഞങ്ങള്‍ വിമര്‍ശനാത്മക ചിന്തയുടെയും സഹിഷ്ണുതയുടെയും തത്വങ്ങള്‍ ഗ്രോക്കിലേക്ക് ഉള്‍പ്പെടുത്തുകയാണ്.' എന്നും അദ്ദേഹം പറഞ്ഞു.
മസ്‌കിന്റെ എഐ കമ്പനിയായ എക്‌സ് എഐ പുറത്തിറക്കിയ ചാറ്റ് ബോട്ടായ ഗ്രോക്കില്‍ നിന്നാണ് ഈ വെബ് സൈറ്റിന് പേര് നല്‍കിയിരിക്കുന്നത്. എന്നാല്‍ വെബ് സൈറ്റില്‍ പിഴവുകളുണ്ടെന്ന് അതില്‍ കയറിനോക്കിയ പലരും അഭിപ്രായപ്പെട്ടു. വിക്കി പീഡിയയോട് അത്ര താല്‍പര്യമില്ലാത്ത മസ്‌ക് 'വോക്കിപീഡിയ' എന്ന് അടുത്തിടെ വിശേഷിപ്പിച്ചിരുന്നു. രാഷ്ട്രീയ അജന്‍ഡകള്‍ കുറവുള്ളതാകും ഗ്രോക്കി പീഡിയയെന്നും മസ്‌ക് പറഞ്ഞിരുന്നു.
വിക്കി പീഡിയ ശക്തമായ ലിബറല്‍ പക്ഷപാതമാണെന്ന് യാഥാസ്ഥിതികര്‍ പണ്ടേ ആരോപിച്ചിരുന്നു, വിക്കി പീഡിയ 'തീവ്ര ഇടതുപക്ഷ പ്രവര്‍ത്തകരുടെ നിയന്ത്രണത്തിലാണ്' എന്നും മസ്‌ക് ആരോപിച്ചു.
മസ്‌കിനെക്കുറിച്ചുള്ള ലേഖനങ്ങളില്‍ തുടങ്ങി, ഗ്രോക്കി പീഡിയയും വിക്കി പീഡിയയും തമ്മിലുള്ള വ്യക്തമായ വ്യത്യാസങ്ങള്‍ ഉപയോക്താക്കള്‍ ഇതിനകം ചൂണ്ടിക്കാണിച്ചിട്ടുണ്ട്.
