തുടര്‍ച്ചയായ രണ്ടാം ജയത്തോടെ ബ്രസീലും പോര്‍ച്ചുഗലും പ്രീ ക്വാര്‍ട്ടറില്‍

ദോഹ: പ്രാഥമിക ഘട്ടത്തിലെ തുടര്‍ച്ചയായ രണ്ടാം മത്സരത്തിലും ജയം നേടി കരുത്തരായ ബ്രസീലും പോര്‍ച്ചുഗലും പ്രീ ക്വാര്‍ട്ടറിലേക്ക് കടന്നു.
സ്വിറ്റ്‌സര്‍ലാന്റിന്റെ പ്രതിരോധക്കോട്ട തകര്‍ത്ത് 83-ാം മിനിറ്റില്‍ കാസെമിറോയുടെ തകര്‍പ്പന്‍ ഗോളാണ് ബ്രസീലിന് വിജയം സമ്മാനിച്ചത്. ആദ്യ മത്സരത്തില്‍ സെര്‍ബിയയെ എതിരില്ലാത്ത രണ്ടു ഗോളുകള്‍ക്ക് കീഴടക്കിയ ബ്രസീല്‍ ജി ഗ്രൂപ്പില്‍ ആറു പോയിന്റുമായി ഒന്നാമതാണ്. ആദ്യ മത്സരം ജയിച്ച സ്വിറ്റ്‌സര്‍ലാന്റ് മൂന്നുപോയിന്റുമായി രണ്ടാം സ്ഥാനത്തുണ്ട്. ഗോള്‍ രഹിതമായ ആദ്യ പകുതിക്ക് ശേഷം രണ്ടാം പകുതിയിലാണ് കാസെമിറോ ബ്രസീലിന്റെ രക്ഷകനായി അവതരിച്ചത്. റോഡ്രിഗോയുടെ അസിസ്റ്റില്‍നിന്നായിരുന്നു ഗോള്‍ പിറന്നത്. ബോക്‌സിന് അകത്തുനിന്ന് കാസെമിറോയുടെ അതിമനോഹരമായ ഷോട്ട് സ്വിസ് പ്രതിരോധ താരത്തിന്റെ ദേഹത്തുതട്ടിയ ശേഷം വലയിലെത്തുകയായിരുന്നു.
ബ്രൂണോ ഫെര്‍ണാണ്ടസിന്റെ പ്രതിഭാസ്പര്‍ശം സമ്മാനിച്ച 2 ഗോളുകളിലാണ് പോര്‍ച്ചുഗല്‍ യുറഗ്വായെ കീഴടക്കിയത്. 54-ാം മിനിറ്റില്‍ മനോഹരമായൊരു ചിപ് ഷോട്ടിലൂടെയും ഇന്‍ജറി ടൈമില്‍ (90+3) പെനല്‍റ്റി കിക്ക് ലക്ഷ്യത്തിലെത്തിച്ചുമായിരുന്നു ബ്രൂണോയുടെ ഗോളുകള്‍.
രണ്ടു മത്സരങ്ങളില്‍ നിന്നു 6 പോയിന്റുമായി ഗ്രൂപ്പ് എച്ചില്‍ ഒന്നാമതാണ് പോര്‍ച്ചുഗല്‍. 3 പോയിന്റുമായി ഘാന രണ്ടാമതും ഒരു പോയിന്റുള്ള ദക്ഷിണ കൊറിയ മൂന്നാമതുമാണ്. യുറഗ്വായ് ഒരു പോയിന്റോടെ അവസാന സ്ഥാനത്താണ്. രണ്ടാം പകുതിയുടെ തുടക്കം മുതല്‍ കൂടുതല്‍ ഒത്തിണക്കത്തോടെ ഭാവനാപൂര്‍ണമായ നീക്കങ്ങള്‍ക്ക് തുടക്കമിട്ടതാണ് പോര്‍ച്ചുഗലിന്റെ ആദ്യ ഗോളില്‍ കലാശിച്ചത്. ഇടതുവിങ്ങിലൂടെ തുടങ്ങിയ നീക്കത്തിനൊടുവില്‍ റാഫേല്‍ ഗുരേരോയുടെ പാസ് സ്വീകരിച്ച് ബോക്‌സിനകത്തേക്ക് ബ്രൂണോ ഫെര്‍ണാണ്ടസ് കോരിയിട്ട ഷോട്ടിലേക്ക് ക്രിസ്റ്റ്യാനോ റൊണാള്‍ഡോ കുതിച്ചുയര്‍ന്നു.
സൂപ്പര്‍താരത്തിന്റെ തലയില്‍ തൊട്ടുതൊട്ടില്ലെന്ന മട്ടില്‍ പന്ത് യുറഗ്വായ് ഗോള്‍കീപ്പര്‍ സെര്‍ജിയോ അല്‍വാരസിനെയും മറികടന്ന് വലയിലെത്തി. ഈ ഗോള്‍ ആദ്യം ക്രിസ്റ്റ്യാനോയുടെ പേരിലാണ് ക്രെഡിറ്റ് ചെയ്തത്. പിന്നീട് പരിശോധനയില്‍ ക്രിസ്റ്റ്യാനോ പന്തില്‍ തൊട്ടില്ലെന്നു വ്യക്തമായതോടെ ഗോള്‍ ബ്രൂണോയ്ക്കു സ്വന്തമായി.
കളിയുടെ തീരാറായ ഘട്ടത്തില്‍, പെനല്‍റ്റി ബോക്‌സിനകത്ത് വച്ച് പന്ത് യുറഗ്വായ് ഡിഫന്‍ഡര്‍ ഹോസെ മരിയ ഹിമിനസിന്റെ കയ്യില്‍ത്തട്ടിയതിനെത്തുടര്‍ന്ന് വി.എ.ആര്‍ പരിശോധനയിലാണ് പോര്‍ച്ചുഗലിന് പെനല്‍റ്റി അനുവദിച്ചത്. ബ്രൂണോ ഫെര്‍ണാണ്ടസ് എടുത്ത സ്‌പോട്ട് കിക്ക് ഗോള്‍ കീപ്പര്‍ സെര്‍ജിയോ അല്‍വാരസിനെ കബളിപ്പിച്ച് വലയിലെത്തി.
ഇന്ന് രാത്രി 8.30ന് ഇക്വഡോര്‍ സെനഗലിനെയും നെതര്‍ലാന്റ് ഖത്തറിനെയും നേരിടും. 12.30ന് ഇറാന്‍ അമേരിക്കയെയും ഇംഗ്ലണ്ട് വെയ്ല്‍സിനെയും നേരിടും.