തിരുവനന്തപുരം: സംസ്ഥാനത്ത് വാക്സിനേഷന് പ്രക്രിയ പുരോഗമിക്കുന്നു. 14 ലക്ഷം ഡോസ് വാക്സിന് കൂടി എത്തിയതായി ആരോഗ്യ മന്ത്രി വീണാ ജോര്ജ് അറിയിച്ചു. തിരുവനന്തപുരത്ത് 3,27,810, എറണാകുളത്ത് 8,38,130, കോഴിക്കോട് 2,59,210 എന്നിങ്ങനെ ഡോസ് കോവിഷീല്ഡ് വാക്സിനാണ് ലഭ്യമായത്. ഈ വാക്സിനുകള് വിവിധ ജില്ലകളിലെത്തിച്ചു വരികയാണെന്നും വാക്സിന് എത്തിച്ചേരുന്ന മുറയ്ക്ക് വാക്സിനേഷന് ശക്തിപ്പെടുമെന്നും മന്ത്രി വ്യക്തമാക്കി.
ഇതിനിടെ ആദ്യ ഡോസ് വാക്സിന് സ്വീകരിച്ചവര് 80 ശതമാനത്തിലേക്ക് അടുക്കുകയാണ്. വാക്സിനേഷന് എടുക്കേണ്ട ജനസംഖ്യയുടെ 79.5 ശതമാനം പേര്ക്ക് ഒരു ഡോസ് വാക്സിനും (2,28,18,901) 31.52 ശതമാനം പേര്ക്ക് രണ്ട് ഡോസ് വാക്സിനും (90,51,085) നല്കിയതായി മന്ത്രി പറഞ്ഞു. ഒന്നും രണ്ടും ഡോസ് ഉള്പ്പെടെ ആകെ 3,18,69,986 ഡോസ് വാക്സിന് ആണ് ഇതുവരെ നല്കിയത്.
വാക്സിന് എടുത്തിട്ടില്ലാത്ത കോളേജ് വിദ്യാര്ത്ഥികള് എത്രയും വേഗം ആരോഗ്യ പ്രവര്ത്തകരുമായി ബന്ധപ്പടേണ്ടതാണ്. ഇനിയും വാക്സിനെടുക്കാന് വിമുഖത കാട്ടിയിട്ട് കാര്യമില്ല. ഈ മാസം അവസാനത്തോടെ 18 വയസിന് മുകളിലുള്ള എല്ലാവര്ക്കും വാക്സിന് നല്കാനുള്ള ശ്രമത്തിലാണ് സര്ക്കാരെന്നും മന്ത്രി കൂട്ടിച്ചേര്ത്തു.