കരൂര്‍ അപകടം; എഫ് ഐ ആറില്‍ നടന്‍ വിജയ് ക്കെതിരെ ഗുരുതര പരാമര്‍ശം
ചെന്നൈ: സെപ്റ്റംബര്‍ 27 ന് നടനും തമിഴക വെട്രി കഴകം അധ്യക്ഷനുമായ(ടി.വി.കെ) വിജയ് പങ്കെടുത്ത റാലിക്കിടെ വേലുസാമിപുരത്ത് ഉണ്ടായ തിക്കിലും തിരക്കിലും 41 പേര് മരിക്കുകയും 60 പേര്‍ക്ക് പരിക്കേല്‍ക്കുകയും ചെയ്ത സംഭവത്തില്‍ പൊലീസിന്റെ എഫ്.ഐ ആര്‍ പുറത്ത്. സംഭവദിവസം രാത്രി ഒന്‍പതുമണിയോടെ റജിസ്റ്റര്‍ ചെയ്ത എഫ്.ഐ.ആറിലാണ് വിജയ്‌ക്കെതിരായ ഗുരുതര പരാമര്‍ശങ്ങളുള്ളത്. നിശ്ചിത സമരപരിധി നിര്‍ണയിച്ചാണ് വിജയ്ക്ക് റോഡ് ഷോയ്ക്കുള്ള അനുമതി നല്‍കിയതെന്നും എന്നാല്‍ വിജയ് എല്ലാ പരിധികളും ലംഘിച്ച് അനുമതിയില്ലാതെ റോഡ് ഷോ അടക്കം നടത്തിയെന്നും എഫ്.ഐ.ആറില്‍ പറയുന്നു.
നാലു മണിക്കൂര്‍ വൈകിയാണ് വിജയ് കരൂരിലെ യോഗസ്ഥലത്തേക്ക് എത്തിയത്. തുടര്‍ന്ന് വളരെ നേരം തന്റെ പ്രചാരണ വാഹനത്തിനുള്ളില്‍ തന്നെ തുടര്‍ന്നു. ഇത് തിക്കിലും തിരക്കിലും കൂടിനിന്ന ജനക്കൂട്ടത്തിനിടയിലും അസ്വസ്ഥത സൃഷ്ടിച്ചു. വിജയ് മനഃപൂര്‍വം സമയം വൈകി എത്തിയതാണെന്നും പൊലീസ് ചൂണ്ടിക്കാട്ടുന്നു. എഫ്.ഐ.ആറില്‍ പരാമര്‍ശിച്ചിരിക്കുന്ന പൊലീസ് വിവരണങ്ങള്‍ പ്രകാരം, വിജയ് തന്റെ വാഹനത്തിനുള്ളില്‍ തന്നെ കഴിഞ്ഞപ്പോള്‍, ജനക്കൂട്ടം അടുത്തറിയാന്‍ വേണ്ടി മുന്നോട്ട് കുതിച്ചു.
ഇടുങ്ങിയ വേദിയില്‍ പങ്കെടുത്തവര്‍ക്ക് മതിയായ ഇടമില്ലായിരുന്നു, ഇത് ആളുകള്‍ മുന്നോട്ട് നീങ്ങുമ്പോള്‍ ചവിട്ടിമെതിക്കപ്പെടാന്‍ കാരണമായി. മികച്ച കാഴ്ചയ്ക്കായി ചിലര്‍ സ്റ്റീല്‍ ഷെഡുകളിലും മരങ്ങളിലും കയറിയെങ്കിലും ഇവ തകര്‍ന്നപ്പോള്‍ താഴെയുള്ളവരുടെ മേല്‍ വീണ് മാരകമായ പരിക്കുകളും ശ്വാസംമുട്ടലും ഉണ്ടായതായും എഫ്.ഐ.ആറില്‍ പറയുന്നു.
ആളുകള്‍ അനിയന്ത്രിമായി എത്തുകയാണെന്നും അതിനാല്‍ മറ്റിടങ്ങളില്‍ ഇറങ്ങുകയോ സ്വീകരണം ഏറ്റുവാങ്ങുകയോ ചെയ്യരുതെന്നും ടിവികെ സംസ്ഥാന ഭാരവാഹികള്‍ക്ക് പൊലീസ് മുന്നറിയിപ്പ് നല്‍കിയിരുന്നു. എന്നാല്‍ അത് അവഗണിക്കുകയാണ് അവര്‍ ചെയ്‌തെന്നും എഫ്.ഐ.ആറില്‍ പറയുന്നു. ജനക്കൂട്ടത്തെ ആകര്‍ഷിക്കാനും പാര്‍ട്ടിയുടെ ശക്തിപ്രകടനത്തിനുമായാണ് വിജയ് അനുമതിയില്ലാതെ റോഡ് ഷോ നടത്തിയതും പലയിടങ്ങളിലും ഇറങ്ങി സ്വീകരണം ഏറ്റുവാങ്ങിയതെന്നും എഫ്.ഐ.ആറില്‍ പറയുന്നുണ്ട്.
തമിഴഗ വെട്രി കഴകം (ടിവികെ) യുടെ മൂന്ന് പ്രവര്‍ത്തകര്‍ക്കെതിരെ പൊലീസ് എഫ്.ഐ.ആര്‍ രജിസ്റ്റര്‍ ചെയ്തു. മതിയഴകന്‍, ബുസ്സി ആനന്ദ്, നിര്‍മ്മല്‍ കുമാര്‍ എന്നിവര്‍ക്കെതിരെയാണ് മനഃപൂര്‍വമല്ലാത്ത നരഹത്യ, ജീവന്‍ അപകടപ്പെടുത്തല്‍ എന്നീ വകുപ്പുകള്‍ പ്രകാരം എഫ്.ഐ.ആര്‍ രജിസ്റ്റര്‍ ചെയ്തത്. വിജയ്ക്കെതിരെ ഇതുവരെ കേസെടുത്തിട്ടില്ല. തിരക്കും ക്രമസമാധാനവും സംബന്ധിച്ച ആശങ്കകള്‍ കാരണം സര്‍ക്കാര്‍ ആശുപത്രി സന്ദര്‍ശിക്കരുതെന്ന് പൊലീസ് അദ്ദേഹത്തെ ഉപദേശിച്ചു.
'തുടക്കത്തില്‍, പരിക്കേറ്റവരെ സന്ദര്‍ശിക്കാനും അവരെ ആശ്വസിപ്പിക്കാനും അദ്ദേഹം പദ്ധതിയിട്ടിരുന്നു, പക്ഷേ അദ്ദേഹത്തിന്റെ സാന്നിധ്യം കൂടുതല്‍ തിരക്കിന് കാരണമാകുമെന്ന് അറിയിച്ചു'- എന്ന് ഒരു മുതിര്‍ന്ന ടിവികെ നേതാവ് പറഞ്ഞു,
സംഭവത്തെക്കുറിച്ച് അന്വേഷിക്കാന്‍ സംസ്ഥാന സര്‍ക്കാര്‍ വിരമിച്ച ജസ്റ്റിസ് അരുണ ജഗദീശന്റെ കീഴില്‍ ഒരു ഏകാംഗ അന്വേഷണ കമ്മീഷന്‍ രൂപീകരിച്ചു. അന്വേഷണത്തിന്റെ നിഷ്പക്ഷതയെക്കുറിച്ച് മുന്‍ തെലങ്കാന ഗവര്‍ണര്‍ ഡോ. തമിഴിസൈ സൗന്ദരരാജന്‍ സംശയം പ്രകടിപ്പിച്ചു, 'ഞാന്‍ ഭരണത്തിലുണ്ടായിരുന്നു. പൊലീസിന്റെ ഇന്റലിജന്‍സ് പരാജയം ഉണ്ടായതിനാല്‍ കമ്മീഷന്റെ അന്വേഷണം ഭാഗികമാകില്ലെന്ന് എനിക്ക് പറയാന്‍ കഴിയും. റാലി സ്ഥലത്തെ വര്‍ദ്ധിച്ചുവരുന്ന കണക്കുകള്‍ ശ്രദ്ധിക്കുന്നതില്‍ പൊലീസ് പരാജയപ്പെട്ടു,' എന്നും സൗന്ദരരാജന്‍ ചെന്നൈയില്‍ മാധ്യമപ്രവര്‍ത്തകരോട് പറഞ്ഞു.
പുറത്താക്കപ്പെട്ട എഐഎഡിഎംകെ നേതാവ് വി കെ ശശികല ദുരിതബാധിത കുടുംബങ്ങളെ സന്ദര്‍ശിച്ച ശേഷം കേന്ദ്ര ഏജന്‍സി അന്വേഷണം നടത്തണമെന്ന് ആവശ്യപ്പെട്ടു. 'യോഗം അവസാനിച്ച് മിനിറ്റുകള്‍ക്കുള്ളില്‍ വൈദ്യുതി നിലച്ചു, വൈദ്യുതി തിരിച്ചെത്തിയപ്പോള്‍ ആളുകള്‍ തിരക്കുകൂട്ടാന്‍ തുടങ്ങിയിരുന്നു. ഒരു കേന്ദ്ര ഏജന്‍സി വിഷയം സമഗ്രമായി അന്വേഷിച്ചാലേ സത്യം പുറത്തുവരൂ' എന്ന് അവര്‍ മാധ്യമപ്രവര്‍ത്തകരോട് പറഞ്ഞു. ജസ്റ്റിസ് ജഗദീശന്റെ നേതൃത്വത്തിലുള്ള അന്വേഷണ സംഘം ആശുപത്രിയില്‍ പരിക്കേറ്റവരുമായി ആശയവിനിമയം നടത്തി പൂര്‍ത്തിയായ ശേഷം വിശദമായ റിപ്പോര്‍ട്ട് സര്‍ക്കാരിന് സമര്‍പ്പിക്കുമെന്ന് പ്രതീക്ഷിക്കുന്നു.
വിജയ്ക്കെതിരെ സൂക്ഷിച്ചുമാത്രം നീങ്ങിയാല്‍ മതിയെന്നാണ് ഡിഎംകെയുടെ തീരുമാനം. ടിവികെ റാലിയിലുണ്ടായത് 'വലിയ ദുരന്ത'മാണെന്ന് വിശേഷിപ്പിച്ച തമിഴ്‌നാട് മുഖ്യമന്ത്രി എം.കെ.സ്റ്റാലിന്‍ സമൂഹമാധ്യമങ്ങള്‍ വഴി അപവാദ വ്യാജ പ്രചരണങ്ങള്‍ നടത്തരുതെന്നും മുന്നറിയിപ്പ് നല്‍കി. അപകടത്തില്‍ പരുക്കേറ്റവര്‍ക്ക് എല്ലാ വൈദ്യസഹായവും ലഭ്യമാക്കുമെന്നും അദ്ദേഹം ഉറപ്പു നല്‍കി.