ആദൂര്‍: ഭര്‍ത്താവ് ഓടിച്ച സ്‌കൂട്ടറില്‍ നിന്ന് തെറിച്ച് വീണ് യുവതി ലോറി ദേഹത്ത് കയറി ദാരുണമായി മരിച്ചു.
പാണ്ടി അമ്പട്ടമൂലയിലെ എ.കെ മുഹമ്മദിന്റെ ഭാര്യ ആമിന(45)യാണ് മരിച്ചത്. ഇന്നലെ വൈകിട്ട് മൂന്ന് മണിയോടെ ആദൂര്‍ പള്ളത്തായിരുന്നു അപകടം. റോഡിലെ കയറ്റത്തില്‍ എതിരെ വന്ന വാഹനത്തെ വെട്ടിക്കുന്നതിനായി ബ്രേക്കിട്ടപ്പോള്‍ സ്‌കൂട്ടറിന്റെ പിന്‍ സിറ്റിലുണ്ടായിരുന്ന ആമിന തെറിച്ച് റോഡിലേക്ക് വീഴുകയും പിറകില്‍ നിന്ന് വന്ന ലോറിക്കടിയില്‍പെട്ട് ദാരുണമായി മരണപ്പെടുകയുമായിരുന്നു. രോഗിയായ ഒരു ബന്ധുവിനെ കാണാനായി പള്ളപ്പാടിയിലേക്ക് പോകുന്നതിനിടെയാണ് ഇവര്‍ അപകടത്തില്‍പെട്ടത്. റോഡിലെ കയറ്റത്തില്‍ മുന്‍വശത്ത് നിന്നും ഒരു കാര്‍ അമിത വേഗത്തില്‍ വന്നപ്പോള്‍ സ്‌കൂട്ടര്‍ പെട്ടെന്ന് ബ്രേക്കിട്ട് നിര്‍ത്തുന്നതിനിടെയാണ് സ്‌കൂട്ടറില്‍ നിന്ന് ആമിന തെറിച്ച് റോഡിലേക്ക് വീണത്. അതിനിടെ പിറകില്‍ നിന്ന് വന്ന ലോറി ആമിനയുടെ ദേഹത്ത് കയറുകയായിരുന്നു. സംഭവസ്ഥലത്ത് തന്നെ മരണം സംഭവിച്ചു. ഭര്‍ത്താവ് മുഹമ്മദിന് നിസാരപരിക്കുണ്ട്. ആദൂര്‍ പൊലീസ് ഇന്‍ക്വസ്റ്റ് നടത്തിയ മൃതദേഹം കാസര്‍കോട് ജനറല്‍ ആസ്പത്രയില്‍ പോസ്റ്റ്‌മോര്‍ട്ടം നടത്തി. മക്കള്‍: അസീസ് (ദുബായ്), ഉബൈസ്, ഫാരിസ്. സഹോദരങ്ങള്‍: മുഹമ്മദ്, ഹാജിറ, അബ്ദുല്ല.
