ബദിയടുക്ക: ദീപാവലി ആഘോഷത്തിനായി നാട്ടിലെത്തിയ എഞ്ചിനീയര്‍ പാമ്പുകടിയേറ്റ് മരിച്ചു. ബദിയടുക്ക ചെടേക്കാലിന് സമീപം പട്ടാജെയിലെ ഗോപാലകൃഷ്ണഭട്ടിന്റെയും പരേതയായ തിരുമലേശ്വരിയുടെയും ഏകമകന്‍ പി.വി കൃഷ്ണകുമാര്‍(27) ആണ് മരിച്ചത്. ഇന്നലെ വൈകിട്ട് 6.15 മണിയോടെ വീടിന് സമീപത്തുവെച്ചാണ് കൃഷ്ണകുമാറിന് പാമ്പുകടിയേറ്റത്. ഉടന്‍ തന്നെ ചെങ്കള ഇ.കെ നായനാര്‍ സഹകരണാസ്പത്രിയില്‍ പ്രവേശിപ്പിച്ചെങ്കിലും രാത്രി 8.30 മണിയോടെ മരണം സംഭവിച്ചു. ചെന്നൈയിലെ അമേരിക്കന്‍ കമ്പനിയില്‍ എഞ്ചിനീയറായ കൃഷ്ണകുമാര്‍ ദീപാവലി ആഘോഷത്തിനായി ഇക്കഴിഞ്ഞ ശനിയാഴ്ചയാണ് നാട്ടിലേക്ക് വന്നത്. അതിനിടെയാണ് യുവാവിനെ മരണം തട്ടിയെടുത്തത്.
