ബംഗളൂരു: കര്ണാടകയുടെ 24-ാമത് മുഖ്യമന്ത്രിയായി സിദ്ധരാമയ്യ ഇന്ന് ഉച്ചയോടെ കണ്ഠീരവ സ്റ്റേഡിയത്തില് നടന്ന പ്രൗഢമായ ചടങ്ങില് സത്യപ്രതിജ്ഞ ചെയ്ത് അധികാരമേറ്റു. ഗവര്ണര് തവര് ചന്ദ് ഗെഹ്ലോട്ട് സത്യവാചകം ചൊല്ലിക്കൊടുത്തു. ഉപമുഖ്യമന്ത്രിയായി കര്ണാടക പി.സി.സി അധ്യക്ഷന് ഡി.കെ ശിവകുമാറും ചുമതലയേറ്റു.
അജ്ജയ്യ ഗംഗാധര സ്വാമിയുടെ പേരിലാണ് ഉപമുഖ്യമന്ത്രി ഡി കെ ശിവകുമാര് സത്യപ്രതിജ്ഞ ചെയ്തത്. മുഖ്യമന്ത്രിക്കും ഡി കെ ശിവകുമാറിനും പുറമെ എട്ട് മന്ത്രിമാരാണ് കര്ണാടകയില് ഇന്ന് അധികാരമേറ്റത്.
ജി പരമേശ്വര കെ എച്ച് മുനിയപ്പ, മലയാളി കെ ജെ ജോര്ജ്, എം ബി പാട്ടീല്, സതീഷ് ജര്ക്കിഹോളി, പ്രിയങ്ക് ഖാര്ഗെ, രാമലിംഗ റെഡ്ഢി, സമീര് അഹമ്മദ് ഖാന് എന്നിവരാണ് മന്ത്രിമാരായി ഇന്ന് സത്യപ്രതിജ്ഞ ചെയ്തത്.
കോണ്ഗ്രസ് നേതാക്കളായ രാഹുല് ഗാന്ധി, പ്രിയങ്ക ഗാന്ധി, പാര്ട്ടി അധ്യക്ഷന് മല്ലികാര്ജുന് ഖര്ഗെ, രാജസ്ഥാന് മുഖ്യമന്ത്രി അശോക് ഗെലോട്ട്, തമിഴ്നാട് മുഖ്യമന്ത്രി എം.കെ. സ്റ്റാലിന്, ബിഹാര് മുഖ്യമന്ത്രി നിതീഷ് കുമാര്, ഛത്തിസ്ഗഢ് മുഖ്യമന്ത്രി ഭൂപേഷ് ബാഗേല്, ഹിമാചല് പ്രദേശ് മുഖ്യമന്ത്രി സുഖ്വിന്ദര് സിങ് സുഖു, ബിഹാര് ഉപമുഖ്യമന്ത്രി തേജസ്വി യാദവ്, സിപിഎം ജനറല് സെക്രട്ടറി സീതാറാം യച്ചൂരി, സിപിഐ ജനറല് സെക്രട്ടറി ഡി. രാജ, തെന്നിന്ത്യന് താരം കമല് ഹാസന്, ഫാറൂഖ് അബ്ദുല്ല, മെഹബൂബ മുഫ്തി തുടങ്ങിയവര് സത്യപ്രതിജ്ഞയ്ക്കെത്തി.