തിരുവനന്തപുരം: കോണ്‍ഗ്രസിന്റെ വൈക്കം സത്യഗ്രഹ ശതാബ്ദി പരിപാടിയില്‍ കെ. മുരളീധരന് എം.പിക്ക് പ്രസംഗിക്കാന്‍ അവസരം നല്‍കാത്തതില്‍ പാര്‍ട്ടിക്കെതിരെ തുറന്നടിച്ച് ശശി തരൂര്‍ എംപി. കെ. മുരളീധരന് പ്രസംഗിക്കാന്‍ അവസരം നല്‍കാത്തത് തെറ്റാണെന്നും സീനിയറായ ആളെ അപമാനിച്ചത് ശരിയായില്ലെന്നും ശശി തരൂര്‍ പറഞ്ഞു. പാര്‍ട്ടിയെ നല്ല രീതിയില്‍ മുന്നോട്ട് കൊണ്ടുപോകണമെങ്കില്‍ ഇങ്ങനെ ചെയ്യരുതെന്നും അദ്ദേഹം കൂട്ടിച്ചേര്‍ത്തു. ‘കെ.പി.സി.സി.യുടെ വൈക്കം സത്യാഗ്രഹ വേദിയില്‍ തനിക്ക് പ്രസംഗിക്കാന്‍ അവസരം കിട്ടാത്തതില്‍ പരാതിയില്ല. എന്നാല്‍ കെ. മുരളീധരന്റെ കാര്യത്തില്‍ പാര്‍ട്ടിയെടുത്തത് തെറ്റായ തീരുമാനമാണ്. മുന്‍ കെ.പി.സി.സി അധ്യക്ഷന്മാരെ ഒരേപോലെ കാണണമായിരുന്നു. മുരളീധരന് പ്രസംഗിക്കാന്‍ അവസരം നല്‍കണമായിരുന്നു’-ശശി തരൂര്‍ മാധ്യമങ്ങളോട് പറഞ്ഞു. അദ്ദേഹത്തിന് പ്രസംഗിക്കാന്‍ അവസരം നല്‍ക്കാത്തത് ബോധപൂര്‍വ്വമായ ശ്രമമാണോ എന്ന് അറിയില്ലെന്നും തരൂര്‍ കൂട്ടിച്ചേര്‍ത്തു. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ പങ്കെടുത്ത വേദിയില്‍ കെ. സുധാകരനും വി.ഡി സതീശനും രമേശ് ചെന്നിത്തലയും എം.എം ഹസനും മാത്രമാണ് കെ.പി.സി.സിയുടെ ഭാഗമായി സംസാരിച്ചത്. മുന്‍ പി.സി.സി പ്രസിഡണ്ട് എന്ന പരിഗണന തനിക്ക് ലഭിച്ചില്ലെന്ന് കെ. മുരളീധരന് നേരത്തെ പരാതി പറഞ്ഞിരുന്നു. തന്നെ മനപ്പൂര്‍വം അവഗണിച്ചെന്നും സ്വരം നന്നായിരിക്കുമ്പോള്‍ പാട്ട് നിര്‍ത്താനാണ് തീരുമാനമെന്നും മുരളി തുറന്നടിക്കുകയും ചെയ്തു. എന്നാല്‍ സമയ പരിമിതി കാരണമാണ് എല്ലാ നേതാക്കള്‍ക്കും പ്രസംഗിക്കാന്‍ അവസരം ലഭിക്കാതിരുന്നത് എന്നായിരുന്നു കോട്ടയം ഡി.സി.സിയുടെ വിശദീകരണം.
