യാഥാര്ത്ഥ്യമാകുമോ ഈ കുടിവെള്ള പദ്ധതി; കാത്തിരിപ്പിന് വര്ഷങ്ങളുടെ പഴക്കം
ബദിയടുക്ക പഞ്ചായത്തിലെ ഏണിയര്പ്പില് നോക്കുകുത്തിയായി മാറുന്ന കേരള വാട്ടര് അതോറിറ്റിയുടെ കീഴിലുള്ള ജലസംഭരണി
ബദിയടുക്ക: ഗ്രാമീണ പ്രദേശങ്ങളിലെ കുടിവെള്ള പ്രശ്നം പരിഹരിക്കാന് തുടക്കം കുറിച്ച പദ്ധതി പ്രവര്ത്തനം ഒച്ചിന്റെ വേഗതയില് ഇഴഞ്ഞുനീങ്ങുന്നു. പണി തീര്ത്ത കൂറ്റന് ജല സംഭരണി നോക്കുകുത്തിയായി മാറുന്നു. ബദിയടുക്ക, പുത്തിഗെ, കുംബഡാജെ തുടങ്ങി വിവിധ പഞ്ചായത്തുകളിലെ വീടുകളിലേക്ക് ശുദ്ധജലം എത്തിക്കുക എന്ന ലക്ഷ്യത്തോടെ കേരള വാട്ടര് അതോറിറ്റിയാണ് കോടികള് ചെലവഴിച്ച് പദ്ധതി പ്രവര്ത്തനത്തിന് തുടക്കം കുറിച്ചത്. മുളിയാര് പഞ്ചായത്തിലെ ബാവിക്കര തടയണയില് നിന്ന് പൈപ്പ് ലൈന് വഴി വിവിധ സ്ഥലങ്ങളില് പണിത കൂറ്റന് ടാങ്കുകളിലേക്ക് വെള്ളം എത്തിച്ച് അവിടെ നിന്നും വീടുകളിലേക്ക് ജല വിതരണം ചെയ്യുന്നതാണ് പദ്ധതിയുടെ ലക്ഷ്യം. എന്നാല് തുടക്കത്തില് തന്നെ അശാസ്ത്രീയമായ പ്രവര്ത്തനമാണ് നടത്തിയത്. പൈപ്പ് ലൈനിന്റെ പ്രവര്ത്തനം നടത്തുന്നതിന് വിപരീതമായി പാതയോരങ്ങളില് പൈപ്പുകള് ഇറക്കി വെക്കുകയും ചെയ്തതല്ലാതെ തുടര് പ്രവര്ത്തനം നടത്തിയില്ല. ബദിയടുക്ക പഞ്ചായത്തിലെ ഏണിയര്പ്പില് കൂറ്റന് ജലസംഭരണി നിര്മ്മിക്കുകയും പരിസരങ്ങളിലെ വീടുകളില് മീറ്ററുകള് ഘടിപ്പിക്കുകയും ചെയ്ത് പദ്ധതി പ്രവര്ത്തനം ഉപേക്ഷിച്ച മട്ടിലുമാണ്. വര്ഷം രണ്ടര പിന്നിട്ടുവെങ്കിലും തുടര് പ്രവര്ത്തനം നടത്താന് അധികൃതര് തയ്യാറായിട്ടില്ല. റോഡുകള്ക്ക് കുറുകെ മതിയായ രീതിയില് കുഴിയെടുക്കാതെ വലിച്ച പൈപ്പുകളില് പലതും വാഹനങ്ങള് കയറിയിറങ്ങി പൊട്ടിപ്പൊളിഞ്ഞു നശിക്കുകയാണ്. വേനല്കാലത്ത് കുടിവെള്ള പ്രശ്നം രൂക്ഷമാവുമ്പോള് ബാവിക്കര തടയണയുടെ സമീപ പ്രദേശങ്ങളില് പോലും ജലം ലഭിക്കാതെ വരുമ്പോള് കിലോ മീറ്ററുകള് ദൂരമുള്ള പ്രദേശത്തേക്ക് എങ്ങനെ വെള്ളം ലഭിക്കുമെന്നതും ചോദ്യചിഹ്നമാണ്. നിലവില് കേരള ജല വിതരണ വകുപ്പിന് കീഴില് ബദിയടുക്ക പഞ്ചായത്തിലെ പള്ളത്തടുക്ക പുഴയിലെ തലമ്പാടിയില് നിന്നും പഞ്ചായത്തിലെ ചില സ്ഥലങ്ങളിലേക്ക് ജലവിതരണം ചെയ്യുന്നുണ്ടെങ്കിലും വെള്ളം ലഭിക്കാറുമില്ല. ലഭിക്കാത്ത വെള്ളത്തിന് ബില്ല് അടക്കേണ്ട അവസ്ഥയാണ് ഗുണഭോക്താക്കള് നേരിടുന്നത്. ഇത് വ്യാപക പരാതിക്ക് ഇടയാക്കിയിട്ടുണ്ട്. പരിസര പ്രദേശങ്ങളില് ജലസ്രോതസുകള് വറ്റിവരണ്ട് കുടിവെള്ളത്തിനായി നെട്ടോട്ടമോടുമ്പോള് പ്രവര്ത്തനം തുടങ്ങി പകുതി വഴിയില് നിര്ത്തിവെച്ചത് പോലുള്ള കുടിവെള്ള പദ്ധതി യാഥാര്ത്ഥ്യമാകാന് ഇനിയും എത്രനാള് കാത്തിരിക്കണം.
റോഡരികില് ഉപയോഗ ശൂന്യമായി കിടക്കുന്ന പൈപ്പുകള്
വീടുകള്ക്ക് മുന്നില് ഘടിപ്പിച്ച മീറ്റര്
