വനാതിര്‍ത്തി പ്രദേശങ്ങളില്‍ തിരഞ്ഞെടുപ്പിലെ പ്രധാന ചര്‍ച്ചയായി വന്യമൃഗശല്യവും
മുളിയാര്‍ പഞ്ചായത്ത് കോട്ടൂര്‍ വാര്‍ഡിലെ യു.ഡി.എഫ് പ്രവര്‍ത്തകര്‍ വന്യമൃഗശല്യം ആസ്പദമാക്കി നിര്‍മ്മിച്ച എ.ഐ. വീഡിയോയില്‍ നിന്ന്‌
മുള്ളേരിയ: തദ്ദേശ തിരഞ്ഞെടുപ്പില്‍ വനാതിര്‍ത്തി പ്രദേശങ്ങളില്‍ വന്യമൃഗശല്യം രാഷ്ട്രീയ ചര്‍ച്ചയാകുന്നു. വോട്ടു ചോദിച്ച് എത്തുന്നവരോട് തങ്ങള്‍ നേരിടുന്ന വന്യമൃഗശല്യത്തെക്കുറിച്ചാണ് ജനങ്ങള്‍ക്ക് പറയാനുള്ളത്. സ്ഥാനാര്‍ത്ഥികളും സഹപ്രവര്‍ത്തകരും എത്തുമ്പോള്‍ വന്യമൃഗങ്ങള്‍ നശിപ്പിച്ച കാര്‍ഷിക വിളകള്‍ ചൂണ്ടിക്കാട്ടിയാണ് കര്‍ഷകര്‍ കണ്ണീര്‍ പൊഴിക്കുന്നത്. വിഷയത്തെ എങ്ങനെ മറികടക്കാം എന്നാണ് സ്ഥാനാര്‍ത്ഥികള്‍ തലപുകഞ്ഞ് ആലോചിക്കുന്നത്. മുളിയാര്‍, കാറഡുക്ക, ദേലംപാടി, കുറ്റിക്കോല്‍, ബേഡഡുക്ക പഞ്ചായത്തുകളിലെ വനാതിര്‍ത്തി പ്രദേശങ്ങളിലാണ് പുലി, കാട്ടുപ്പോത്ത്, കാട്ടുപന്നി, കുരങ്ങ്, മയില്‍ തുടങ്ങിയ വന്യമൃഗങ്ങളുടെ ശല്യം പ്രധാന വിഷയമായി ഉയരുന്നത്. മാസങ്ങള്‍ക്ക് മുമ്പ് വരെ പുലിയിറങ്ങി വളര്‍ത്തുമൃഗങ്ങളെ കൊന്ന് തിന്നുന്നത് ഈ പ്രദേശങ്ങളില്‍ പതിവായിരുന്നു. തിരഞ്ഞെടുപ്പില്‍ വോട്ടുതേടി ചെല്ലുന്നവരോടെല്ലാം വോട്ടര്‍മാര്‍ തങ്ങള്‍ കാലങ്ങളായി നേരിടുന്ന പ്രതിസന്ധികള്‍ ബോധ്യപ്പെടുത്തുന്നു. പ്രശ്നം പരിഹരിക്കാന്‍ സ്ഥാനാര്‍ത്ഥികള്‍ക്കും ആഗ്രഹമുണ്ട്. വനമേഖലയോട് ചേര്‍ന്ന പഞ്ചായത്തുകളിലെല്ലാം വന്യമൃഗ വിഷയം രാഷ്ട്രീയ പാര്‍ട്ടികളെയെല്ലാം കുഴപ്പിക്കുകയാണ്. ഉപദ്രവകാരികളായ കാട്ടുപന്നികളെ വെടിവെച്ച് കൊല്ലുന്നതിന് അനുമതി നല്‍കാനുളള്ള അധികാരം തദ്ദേശ സ്ഥാപനങ്ങള്‍ക്ക് നല്‍കിയിരുന്നു. എന്നാല്‍ ഷൂട്ടര്‍മാരെ കിട്ടാനില്ലെന്ന കാരണം പറഞ്ഞ് കഴിഞ്ഞ വര്‍ഷങ്ങലില്‍ ഈ പഞ്ചായത്തുകളില്‍ ഭരണം നടത്തിയവര്‍ ഒഴിഞ്ഞുമാറുകയായിരുന്നുവെന്നാണ് വോട്ടര്‍മാരുടെ പരാതി. വന്യമൃഗശല്യം കാരണം ഒരു കൃഷിയും ചെയ്യാനാകുന്നില്ല. ഇവയെ എങ്ങനെ നിയന്ത്രിക്കുമെന്ന് സര്‍ക്കാറുകള്‍ക്കുപോലും പറയാന്‍ കഴിയാതിരിക്കെ, തങ്ങള്‍ക്ക് എന്തുചെയ്യാന്‍ കഴിയുമെന്നാണ് സ്ഥാനാര്‍ത്ഥികള്‍ മറുചോദ്യം ഉയര്‍ത്തുന്നത്. എന്നാല്‍ മലയോരത്തിന്റെ കാര്‍ഷിക മേഖലയെ പിന്നോട്ടടിക്കുന്ന വന്യമൃഗശല്യം തടയണമെന്ന കാര്യത്തില്‍ ആര്‍ക്കും അഭിപ്രായ വ്യത്യാസമില്ല.
