റോഡിലേക്ക് ചാടി നായകള്; വിദ്യാനഗര്-സീതാംഗോളി റോഡില് അപകടം തുടര്ക്കഥ

വിദ്യാനഗര്-സീതാംഗോളി റോഡില് വാഹനങ്ങള്ക്ക് ഭീഷണിയായി റോഡില് കയറിയ നായകള്
കാസര്കോട്: വാഹനങ്ങള് കടന്നുപോകുമ്പോള് റോഡിലേക്ക് എടുത്ത് ചാടുന്ന തെരുവ് നായകള് അപകടം സൃഷ്ടിക്കുന്നു. വിദ്യാനഗര്-സീതാംഗോളി റോഡിലാണ് ഇത്തരത്തില് അപകടം തുടര്ക്കഥയായിരിക്കുന്നത്. ഇരുചക്ര വാഹനങ്ങളാണ് കൂടുതലും അപകടത്തില്പെടുന്നത്. കഴിഞ്ഞ ദിവസം ഉദയഗിരിക്ക് സമീപം നായ ചാടിയതിനെ തുടര്ന്ന് ബൈക്ക് നിയന്ത്രണം വിട്ട് മറിഞ്ഞ് അതിഥി തൊഴിലാളിക്ക് പരിക്കേറ്റിരുന്നു. റോഡില് കയറിയ നായകളെ ഇടിക്കാതിരിക്കാന് വെട്ടിക്കുമ്പോഴും പല വാഹനങ്ങളും അപകടത്തില്പ്പെടുന്നു. വിദ്യാനഗര്, ഉദയഗിരി, ഇസത്ത്നഗര്, പാറക്കട്ട, ചെട്ടുംകുഴി, ഉളിയത്തടുക്ക എന്നിവിടങ്ങളിലെല്ലാം റോഡരികില് സദാ സമയവും നായകളെ കാണാനാവും. ഇവ പൊടുന്നനെ റോഡിലേക്കും വാഹനങ്ങളുടെ മുമ്പിലേക്കും ചാടുന്നതാണ് അപകട ഭീഷണിയുണ്ടാക്കുന്നത്. രാത്രികാലങ്ങളിലും തിരക്കേറെയുള്ള റോഡില് തെരുവ്നായ ശല്യം വലിയ ഭീഷണിയാവുകയാണ്. റോഡരികില് നടന്നുപോവുന്ന വിദ്യാര്ത്ഥികളടക്കമുള്ളവര്ക്കും തെരുവ്നായകള് ഭീതി സൃഷ്ടിക്കുന്നു.

