LETTER | 'അഷ്‌റഫേ, ദൈവം അയച്ചുതന്ന കൊതുമ്പുവള്ളങ്ങളില്‍ ഏറ്റവും ചേര്‍ന്നുനിന്ന വള്ളം താങ്കളുടേതായിരുന്നു...'
പെരുന്നാളിന് അര്‍ജുന്റെ അമ്മ എ.കെ.എം അഷ്‌റഫ് എം.എല്‍.എക്ക് അയച്ച കത്തില്‍ കണ്ണീരിന്റെ നനവ്
ഈ പെരുന്നാളിന് കിട്ടിയ ഏറ്റവും മൂല്യമുള്ള സമ്മാനം-എ.കെ.എം അഷ്‌റഫ് എം.എല്‍.എ
കാസര്‍കോട്: ചെറിയ പെരുന്നാള്‍ ദിനത്തില്‍ ആശംസകള്‍ നേര്‍ന്ന് മഞ്ചേശ്വരം എം.എല്‍.എ എ.കെ.എം അഷ്‌റഫിന് ഒരു കത്ത് ലഭിച്ചു. ഈ പെരുന്നാളിന് ലഭിച്ച ഏറ്റവും മൂല്യമുള്ള സ്‌നേഹസമ്മാനമാണിതെന്നാണ് എം.എല്‍.എ ഫേസ്ബുക്കില്‍ പങ്കുവെച്ചത്. ആ കത്ത് ഇങ്ങനെയായിരുന്നു. 'ഒരു കണ്ണീര്‍മഴക്കാലത്ത് സങ്കടക്കടലില്‍ അകപ്പെട്ട ഒരു കുടുംബം കച്ചിത്തുരുമ്പെങ്കിലും കൈകളില്‍ തടഞ്ഞെങ്കിലെന്ന് പ്രാര്‍ത്ഥിക്കവെ... ഒരുപാടൊരുപാട് കൊതുമ്പുവള്ളങ്ങള്‍ പരമ കാരുണികനായ ദൈവം അയച്ചുതന്നു. അതില്‍ ഏറ്റവും ചേര്‍ന്നുനിന്ന വള്ളങ്ങളിലൊന്ന് താങ്കളുടേതായിരുന്നു. അന്ന് മുതലെന്നും താങ്കളും ഞങ്ങളോടൊപ്പം ചേര്‍ന്നുനിന്നു. കുറച്ചു വാക്കുകളില്‍ തീരുന്നതല്ല കടപ്പാടുകള്‍. എന്നും നന്മകള്‍ നേര്‍ന്നുകൊണ്ട് അമ്മ-ഷീല കെ.സി'.
കഴിഞ്ഞ മഴക്കാലത്ത് കര്‍ണാടക ഷിരൂറില്‍ ലോറി മണ്ണിനടിയില്‍ കുടുങ്ങി ദാരുണമായി മരിച്ച കോഴിക്കോട് കണ്ണാടിക്കല്‍ സ്വദേശി അര്‍ജുന്റെ അമ്മയുടെ കത്തായിരുന്നു അത്. കഴിഞ്ഞ ജൂലായ് 16ന് ദേശീയപാത-66ല്‍ കര്‍ണാടക-ഷിരൂര്‍ ഗംഗാവലി പുഴയോട് ചേര്‍ന്നുണ്ടായ മണ്ണിടിച്ചിലില്‍പെട്ട് മരിച്ച അര്‍ജുന്‍ കേരളത്തിന്റെ മൊത്തം നൊമ്പരമായിരുന്നു. മണ്ണിനടിയില്‍പെട്ട അര്‍ജുനെ കണ്ടെത്താനായി ഒരു സംസ്ഥാനം മുഴുക്കെ പ്രാര്‍ത്ഥനയില്‍ കഴിയുന്നതിനിടെ 72 ദിവസങ്ങള്‍ക്ക് ശേഷമായിരുന്നു അര്‍ജുന്റെ മൃതദേഹം കണ്ടെത്തുന്നത്. ഇവിടത്തെ തിരച്ചിലിന് ദിവസങ്ങളോളം നേതൃത്വം നല്‍കിയത് എ.കെ.എം. അഷ്‌റഫ് എം.എല്‍.എയും കര്‍ണാടക കാര്‍വാര്‍ എം.എല്‍.എ സതീഷ്‌കൃഷ്ണ സെയിലുമായിരുന്നു. ഒടുവില്‍ സെപ്തംബര്‍ 25ന് മൃതദേഹം കണ്ടെത്തുകയും ഡി.എന്‍.എ ടെസ്റ്റില്‍ അര്‍ജുന്റെ മൃതദേഹമാണെന്ന് തിരിച്ചറിയുകയും ഇവിടെ നിന്ന് സ്വദേശത്തേക്ക് എത്തിക്കുന്നത് വരെയും എ.കെ.എം അഷ്‌റഫ് എം.എല്‍.എ മുന്നിലുണ്ടായിരുന്നു. ഇതിനൊക്കെ നന്ദി അറിയിച്ചു കൊണ്ടുള്ളതായിരുന്നു അര്‍ജുന്റെ അമ്മയുടെ കത്ത്.
'ആ കണ്ണീര്‍ മഴക്കാലത്തിന്റെ ഓര്‍മ്മകളില്‍ അമ്മ എന്നെയും ചേര്‍ത്തുവെച്ചിട്ടുണ്ട്. എനിക്കും ആ കാലം മറക്കാനാവില്ല. പ്രിയപ്പെട്ട അമ്മേ, നിങ്ങള്‍ എഴുതിയ ഓരോ വാക്കിലെയും നോവ് എനിക്ക് വായിച്ചെടുക്കാനാവും. തോരാമഴ പെയ്ത, കണ്ണീര്‍മഴ കൊണ്ട് കണ്ണ് മൂടിയ അന്നത്തെ ഓരോ ദിവസവും എന്റെ മനസിലുണ്ട്. ആ ഓര്‍മ്മകള്‍ക്ക് മരണമില്ല'- മറുപടി കുറിപ്പില്‍ എ.കെ.എം അഷ്‌റഫ് ഇങ്ങനെ എഴുതി.
അര്‍ജുന്റെ അമ്മ എഴുതിയ കത്തിനെയും എ.കെ.എം അഷ്‌റഫ് എം.എല്‍.എയുടെ മറുപടി കുറിപ്പിനെയും പ്രശംസിച്ചും പ്രമുഖര്‍ അടക്കം കമന്റിട്ടു. 'ആ അമ്മയുടെ വാക്കുകളില്‍ കണ്ണീരിന്റെ നനവുണ്ട്, ഹൃദയവേദനയുടെ ഉപ്പ് രസമുണ്ട്. മകന്‍ നഷ്ടപ്പെട്ടതിന്റെ വേദനയുണ്ട്. തന്റെ കരളിന്റെ കഷ്ണം മണ്ണിനടിയില്‍പെട്ട് കാലയവനികക്കുള്ളില്‍ മറഞ്ഞതിന്റെ തീര്‍ത്താല്‍ തീരാത്ത ദു:ഖമുണ്ട്. അഷ്‌റഫിന്റെ ആത്മാര്‍ത്ഥമായ ഇടപെടലിന് ഒരമ്മയുടെ ഹൃദ്രക്തത്തില്‍ ചാലിച്ച വരികള്‍ ചില്ലിട്ട് സൂക്ഷിക്കാന്‍ മറക്കരുത്'- ഡോ. കെ.ടി ജലീല്‍ എം.എല്‍.എയുടെ കമന്റ് ഇങ്ങനെയായിരുന്നു.
ഹൃദയത്തിന്റെ അടിത്തട്ടില്‍ നിന്നുള്ള വാക്കുകള്‍ ഏത് അവാര്‍ഡുകള്‍ക്കും മുകളില്‍ നില്‍ക്കും എന്നുള്ളതായിരുന്നു പലരുടെയും കമന്റ്.
