1.36 കോടിയുടെ സ്വര്‍ണവുമായി ഉപ്പള സ്വദേശിനിയും നീലേശ്വരം സ്വദേശിയും മംഗളൂരു വിമാനത്താവളത്തില്‍ പിടിയില്‍

മംഗളൂരു: ദുബായില്‍ നിന്ന് മംഗളൂരു അന്താരാഷ്ട്രവിമാനത്താവളം വഴി കടത്താന്‍ ശ്രമിച്ച 1.36 കോടി രൂപയുടെ സ്വര്‍ണവുമായി കാസര്‍കോട് ഉപ്പള സ്വദേശിനിയും നീലേശ്വരം സ്വദേശിയും കസ്റ്റംസിന്റെ പിടിയിലായി. ഉപ്പള സ്വദേശിനിയും മുംബൈയില്‍ താമസക്കാരിയുമായ സീനത്ത് ബാനു(45), നീലേശ്വരം കോട്ടപ്പുറത്തെ മുഹമ്മദ് ഇക്ബാല്‍ (47) എന്നിവരെയാണ് കസ്റ്റംസ് അറസ്റ്റ് ചെയ്തത്. സീനത്ത് ബാനുവില്‍ നിന്ന് 86,89,440 രൂപ വിലമതിക്കുന്ന 1.684 കിലോ സ്വര്‍ണമാണ് പിടികൂടിയത്. സ്വര്‍ണം പേസ്റ്റ് രൂപത്തിലാക്കി സാനിറ്ററി പാഡിനുള്ളില്‍ വെച്ച് അടിവസ്ത്രത്തില്‍ ഒളിപ്പിച്ചുകടത്താന്‍ ശ്രമിക്കുകയായിരുന്നു. 4,97,424 രൂപ വിലമതിക്കുന്ന 964 ഗ്രാം സ്വര്‍ണമാണ് മുഹമ്മദ് ഇക്ബാലില്‍ നിന്ന് പിടികൂടിയത്. സ്വര്‍ണം സെല്ലോയ്ഡ് ടേപ്പിലും ഗര്‍ഭനിരോധന ഉറയിലും പൊതിഞ്ഞ് നാല് ഗോളങ്ങളാക്കി ശരീരത്തിനുള്ളില്‍ ഒളിച്ചുകടത്താന്‍ ശ്രമിക്കുകയായിരുന്നു. സീനത്ത് ബാനുവും മുഹമ്മദ് ഇക്ബാലും ചൊവ്വാഴ്ച ദുബായില്‍ നിന്ന് വന്ന എയര്‍ ഇന്ത്യ എക്സ്പ്രസില്‍ യാത്രക്കാരായിരുന്നു. കസ്റ്റംസ് സൂപ്രണ്ടുമാരായ കെ സന്തോഷ്‌കുമാര്‍, എം ലളിതരാജ്, വി.എസ് അജിത്കുമാര്‍, പ്രീതിസുമ, ഹരിമോഹന്‍, വിരാഗ് ശുക്ല എന്നിവരുടെ നേതൃത്വത്തിലാണ് ഇരുവരെയും പരിശോധിച്ചത്. തുടര്‍ന്ന് വൈദ്യപരിശോധനയ്ക്ക് ശേഷം രണ്ടുപേരെയും ഫസ്റ്റ് ക്ലാസ് ജുഡീഷ്യല്‍ മജിസ്ട്രേട്ടിന് മുന്നില്‍ ഹാജരാക്കി.