കാസര്‍കോട് നഗരസഭയുടെ പുതിയ കോണ്‍ഫറന്‍സ് ഹാള്‍ പ്രവൃത്തി പുരോഗമിക്കുന്നു
കാസര്‍കോട് നഗരസഭ നിര്‍മ്മിക്കുന്ന പുതിയ കോണ്‍ഫറന്‍സ് ഹാളിന്റെ പ്രവൃത്തി
കാസര്‍കോട്: പുലിക്കുന്നില്‍ നഗരസഭ നിര്‍മ്മിക്കുന്ന ആധുനിക രീതിയിലുള്ള പുതിയ കോണ്‍ഫറന്‍സ് ഹാളിന്റെ നിര്‍മ്മാണ പ്രവൃത്തികള്‍ പുരോഗമിക്കുന്നു. കഴിഞ്ഞ മാസം നഗരസഭ ചെയര്‍മാന്‍ അബ്ബാസ് ബീഗം തറക്കല്ലിട്ടതോടെയാണ് പ്രവൃത്തി പുരോഗമിക്കുന്നത്.
കാസര്‍കോട് നഗരത്തിന്റെ സാംസ്‌കാരിക മുഖമായി അറിയപ്പെടുന്ന നിലവിലെ മുനിസിപ്പല്‍ കോണ്‍ഫറന്‍സ് ഹാളിന് സമീപത്താണ് 75 ലക്ഷം രൂപയോളം ചെലവില്‍ 2700 സ്‌ക്വയര്‍ ഫീറ്റ് വിസ്തൃതിയില്‍ രണ്ട് നിലകളിലായാണ് കെട്ടിടം നിര്‍മ്മിക്കുന്നത്. ഒന്നാം നിലയില്‍ കോണ്‍ഫറന്‍സ് ഹാളും താഴത്തെ നിലയില്‍ 5 കടമുറികളും ഉണ്ടാവും. നഗരസഭയ്ക്ക് തനത് ഫണ്ട് കണ്ടെത്തുന്നതിന്റെ ഭാഗമായാണ് കോണ്‍ഫറന്‍സ് ഹാളും കടമുറികളും നിര്‍മ്മിക്കുന്നത്. 200 ഓളം ഇരിപ്പിടം ഉള്‍ക്കൊള്ളുന്ന ഹാള്‍ മനോഹരമായി സജ്ജീകരിക്കും. ഹാളിലേക്ക് റാംപ് സംവിധാനവും ഒരുക്കും. കാസര്‍കോട് നഗരത്തില്‍ സാംസ്‌കാരിക പരിപാടികള്‍ക്കടക്കം ഇപ്പോള്‍ ഏറെ പേരും ഉപയോഗപ്പെടുത്തുന്നത് മുനിസിപ്പല്‍ കോണ്‍ഫറന്‍സ് ഹാളാണ്. ഏതാണ്ട് മിക്ക ദിവസവും കോണ്‍ഫറന്‍സ് ഹാള്‍ ബുക്ക് ചെയ്യപ്പെടുന്നു. ഈ സാഹചര്യത്തിലാണ് സമീപത്ത് തന്നെ പുതിയൊരു ഹാള്‍ നിര്‍മ്മിക്കാന്‍ നഗരസഭ തീരുമാനിച്ചതെന്ന് അബ്ബാസ് ബീഗം അറിയിച്ചു. പുതിയ കോണ്‍ഫറന്‍സ് ഹാള്‍ നിലവില്‍ വരുന്നതോടെ കാസര്‍കോടിന്റെ കലാ സാംസ്‌കാരിക മേഖല സജീവമാകും.
