കാസര്‍കോട്: പ്രവാചകന്‍ മുഹമ്മദ് നബി(സ)യുടെ ജന്മദിനം നാടെങ്ങും ആഘോഷിക്കുന്നു. മഹല്ലുകള്‍ കേന്ദ്രീകരിച്ച് റാലി, പ്രഭാഷണം, അന്നദാനം, മദ്രസാ വിദ്യാര്‍ഥികളുടെ കലാപരിപാടികള്‍, മൗലൂദ് പാരായണം, ദുആ സമ്മേളനം, കലാ സാഹിത്യ മത്സരങ്ങള്‍, സേവന പ്രവര്‍ത്തനങ്ങള്‍ എന്നിവ നടത്തി. മദ്രസകളില്‍ വിദ്യാര്‍ത്ഥികളുടെ ഇസ്ലാമിക കലാസാഹിത്യ പരിപാടികളും മൗലീദ് പാരായണവും അരങ്ങേറി. നഗരത്തിലടക്കം വിദ്യാര്‍ത്ഥികളുടെ നബിദിന റാലിയും നടന്നു. തളങ്കരയില്‍ മാലിക് ദീനാര്‍ വലിയ ജുമുഅത്ത് പള്ളിയിലേക്കാണ് വിവിധ മദ്രസകളിലെ നബിദിന റാലി വന്നുചേര്‍ന്നത്. വഴിനീളെ പലഹാരവും മധുരപാനീയവും വിതരണം ഉണ്ടായിരുന്നു. വരും ദിവസങ്ങളില്‍ മദ്രസകള്‍ കേന്ദ്രീകരിച്ച് പ്രസംഗ, ഗാന മത്സരങ്ങള്‍ നടക്കും. പലയിടത്തും ദിവസങ്ങളോളം നീണ്ടുനില്‍ക്കുന്ന ആഘോഷ പരിപാടികളാണ് നടക്കുക.
