അവിസ്മരണീയം; ദുബായ് ജില്ലാ കെ.എം.സി.സിയുടെ 'ഹല കാസ്രോഡ്' ഗ്രാന്റ് ഫെസ്റ്റ് ചരിത്രമായി
ദുബായ് കെ.എം.സി.സി. കാസര്‍കോട് ജില്ലാ കമ്മിറ്റി സംഘടിപ്പിച്ച 'സിറ്റി ഗോള്‍ഡ് ഹലാ കാസര്‍കോട് ഗ്രാന്റ് ഫെസ്റ്റ് 2025' മുസ്ലിംലീഗ് സംസ്ഥാന പ്രസിഡണ്ട് പാണക്കാട് സാദിഖലി തങ്ങള്‍ ഉദ്ഘാടനം ചെയ്യുന്നു
ദുബായ്: പതിനായിരങ്ങള്‍ സാക്ഷ്യം വഹിച്ച അവിസ്മരണീയ മുഹൂര്‍ത്തത്തില്‍, ദുബായ് കെ.എം.സി.സി. കാസര്‍കോട് ജില്ലാ കമ്മിറ്റി സംഘടിപ്പിച്ച 'സിറ്റി ഗോള്‍ഡ് ഹലാ കാസര്‍കോട് ഗ്രാന്റ് ഫെസ്റ്റ് 2025' യു.എ.ഇയിലെ പ്രവാസി സംഗമ ചരിത്രത്തില്‍ പുതിയ അധ്യായം കുറിച്ചു. ദുബായ് എത്തിസലാത്ത് അക്കാദമിയില്‍ നടന്ന കാസര്‍കോട് ജില്ലക്കാരുടെ ആഗോള സംഗമം, ജില്ലയുടെ സാംസ്‌കാരിക തനിമയും പ്രവാസി കൂട്ടായ്മയുടെ ശക്തിയും കാരുണ്യ പ്രവര്‍ത്തനങ്ങളുടെ തുടര്‍ച്ചയും വിളിച്ചോതുന്നതായി. ഹല കാസ്രോഡ് ഗ്രാന്റ് ഫിനാലെയുടെ ഉദ്ഘാടനം പാണക്കാട് സയ്യിദ് സാദിഖലി ശിഹാബ് തങ്ങള്‍ നിര്‍വഹിച്ചു. കാസര്‍കോടിന്റെയും പ്രവാസലോകത്തെയും പ്രമുഖ വ്യക്തിത്വങ്ങളെ ചടങ്ങില്‍ ആദരിച്ചു. വ്യവസായ പ്രമുഖനും സാമൂഹ്യപ്രവര്‍ത്തകനുമായ ഖാദര്‍ തെരുവത്തിന് ലെഗസി ലെജന്‍ഡ് അവാര്‍ഡ് ലുലു ഗ്രൂപ്പ് ചെയര്‍മാന്‍ പത്മശ്രീ എം.എ. യൂസഫലി സമ്മാനിച്ചു. പ്രമുഖ വ്യവസായിയും യു.എ.ഇ കെ.എം.സി.സി ദേശീയ ഉപദേശക സമിതി ചെയര്‍മാനുമായ ശംസുദ്ദീന്‍ ബിന്‍ മൊഹിയുദ്ദീന് യൂണിറ്റി അംബാസഡര്‍ അവാര്‍ഡും വ്യവസായിയും ദുബായ് കെ.എം.സി.സി ജനറല്‍ സെക്രട്ടറിയുമായ യഹ്യ തളങ്കരക്ക് ഹ്യുമാനിറ്റി ക്രൗണ്‍ അവാര്‍ഡും പാണക്കാട് സയ്യിദ് സാദിഖലി ശിഹാബ് സമ്മാനിച്ചു. ദുബായ് കെ.എം.സി.സി ജില്ലാ പ്രസിഡണ്ട് സലാം കന്യപ്പാടി അധ്യക്ഷത വഹിച്ചു. ജനറല്‍ സെക്രട്ടറി ഹനീഫ് ടി.ആര്‍. സ്വാഗതം പറഞ്ഞു. മുസ്ലിം ലീഗ് ഓര്‍ഗനൈസിംഗ് സെക്രട്ടറി ഇ.ടി മുഹമ്മദ് ബഷീര്‍ എം.പി, ട്രഷറര്‍ പി.വി അബ്ദുല്‍ വഹാബ് എം.പി, സംസ്ഥാന ജനറല്‍ സെക്രട്ടറി പി.എം.എ സലാം, രാജ്മോഹന്‍ ഉണ്ണിത്താന്‍ എം.പി, അഡ്വ. ഹാരിസ് ബീരാന്‍ എം.പി, ജില്ലാ മുസ്ലിംലീഗ് പ്രസിഡണ്ട് കല്ലട്ര മാഹിന്‍ ഹാജി, ജനറല്‍ സെക്രട്ടറി എ. അബ്ദുല്‍ റഹിമാന്‍, ട്രഷറര്‍ പി.എം മുനീര്‍ ഹാജി, എം.എല്‍.എമാരായ എന്‍.എ നെല്ലിക്കുന്ന്, എ.കെ.എം അഷ്‌റഫ്, കെ.എം.സി.സി നേതാക്കളായ പുത്തൂര്‍ റഹ്മാന്‍, നിസാര്‍ തളങ്കര്‍, ഡോ. അന്‍വര്‍ അമീന്‍, അബ്ദുല്ല ആറങ്ങാടി, ഹംസ തൊട്ടി, അഡ്വ. ഇബ്രാഹിം ഖലീല്‍, അഫ്‌സല്‍ മെട്ടമ്മല്‍, കരീം സിറ്റിഗോള്‍ഡ്, ലത്തീഫ് ഉപ്പളഗേറ്റ്, പി.എ സല്‍മാന്‍ ഇബ്രാഹിം, ഡോ. അബൂബക്കര്‍ കുറ്റിക്കോല്‍, ഷാഫി നാലപ്പാട്, ബഷീര്‍ കിന്നിങ്കര്‍ പ്രസംഗിച്ചു. ട്രഷറര്‍ ഡോ. ഇസ്മയില്‍ നന്ദി പറഞ്ഞു. രാഷ്ട്രീയ, സാമൂഹിക, സാംസ്‌കാരിക, വ്യവസായ രംഗത്തെ പ്രമുഖര്‍ സംബന്ധിച്ചു. ഉച്ചയ്ക്ക് 12 മണി മുതല്‍ ആരംഭിച്ച ഫെസ്റ്റില്‍ മാജിക് ഷോ, ഗെയിമുകള്‍, മെഹന്തി ഫെസ്റ്റ്, ഒപ്പന, കോല്‍ക്കളി എന്നിവയും തുടര്‍ന്ന് കണ്ണൂര്‍ ഷെരീഫ് നയിച്ച ഇശല്‍ വിരുന്നും അരങ്ങേറി.
കെ.എം.സി.സി നടത്തുന്നത് തുല്യതയില്ലാത്ത കാരുണ്യം-സാദിഖലി തങ്ങള്‍
ദുബായ്: കെ.എം.സി.സി. നടത്തുന്നത് തുല്യതയില്ലാത്ത കാരുണ്യ സേവനങ്ങളാണെന്നും അത് മറ്റാര്‍ക്കും അത്ര ലളിതമായി ചെയ്യാന്‍ സാധിക്കുന്നതല്ലെന്നും പാണക്കാട് സയ്യിദ് സാദിഖലി ശിഹാബ് തങ്ങള്‍ പറഞ്ഞു. കേരളത്തില്‍ ഇന്ന് ഒരു ഭരണത്തിന്റെ അഭാവമുണ്ടെന്നും ആധുനിക എ.ഐ. ടെക്‌നോളജി പഠിച്ച യുവതീ യുവാക്കളെ പോലും കേരളത്തിന് ഉപയോഗിക്കാന്‍ സാധിക്കുന്നില്ലെന്നും തന്മൂലം അവര്‍ കൂട്ടത്തോടെ നാടുവിടുന്ന സാഹചര്യം ആശങ്കാജനകമാണെന്നും സാദിഖലി തങ്ങള്‍ കൂട്ടിച്ചേര്‍ത്തു.
ഖാദര്‍ തെരുവത്തുമായുള്ള 45 വര്‍ഷത്തെ ആത്മബന്ധം അയവിറക്കി യൂസഫലി
യു.എ.ഇ ഭരണാധികാരികള്‍ ഒരുക്കിത്തന്ന സവിശേഷമായ സാമൂഹിക സാഹചര്യങ്ങളാണ് കേരളത്തിലെ വീടുകളില്‍ ഐശ്വര്യത്തിനും ആശ്രയത്തിനും കാരണമായതെന്ന് എം.എ യൂസഫലി പറഞ്ഞു. ഖാദര്‍ തെരുവത്തിനുള്ള ലെഗസി ലെജന്‍ഡ് അവാര്‍ഡ് വിതരണം ചെയ്ത് സംസാരിക്കുകയായിരുന്നു അദ്ദേഹം. പ്രവാസികള്‍ സ്വന്തം കുടുംബത്തെ മാത്രമല്ല പോറ്റുന്നത്, അവര്‍ രാജ്യത്തെക്കൂടി പോറ്റുന്നവരാണെന്നും നാട്ടിലെ ഏത് നന്മയിലും ഒരു ഗള്‍ഫ് പ്രവാസിയുടെ സംഭാവനയുണ്ടാകുമെന്നും അദ്ദേഹം പറഞ്ഞു. 45 വര്‍ഷം മുമ്പ് പരിചയപ്പെട്ട ഖാദര്‍ തെരുവത്തുമായുള്ള ആത്മബന്ധത്തിന്റെ കഥകളും യൂസഫലി വിവരിച്ചു. ഖാദര്‍ തെരുവത്തുമായി ആത്മബന്ധം സ്ഥാപിക്കാനായത് തന്റെ ജീവിതത്തിലെ വലിയ സന്തോഷങ്ങളിലൊന്നാണെന്നും അദ്ദേഹം പറഞ്ഞു.
കെ.എം.സി.സിയെ കോവിഡ് കാലത്ത് ലോകം മാതൃകയാക്കി-പി.കെ. കുഞ്ഞാലിക്കുട്ടി
കാരുണ്യത്തിന്റെ പര്യായമാണ് കെ.എം.സി.സി എന്ന് പി.കെ. കുഞ്ഞാലിക്കുട്ടി പറഞ്ഞു. കോവിഡ് മഹാമാരിയുടെ കാലത്ത് കാസര്‍കോട് ജില്ലാ കെ.എം.സി.സി. തുടങ്ങിയ മാതൃകാപരമായ പ്രവര്‍ത്തനങ്ങള്‍ ലോകം ഏറ്റെടുത്തുവെന്നും പ്രതിസന്ധി ഘട്ടങ്ങളില്‍ ഈ കൂട്ടായ്മയുടെ ശക്തി വലുതാണെന്നും അദ്ദേഹം പറഞ്ഞു.
ദുബായ് കാസര്‍കോട് ജില്ലാ കെ.എം.സി.സിയുടെ ലെഗസി ലജന്റ് അവാര്‍ഡ് പദ്മശ്രീ എം.എ. യൂസഫലി ഖാദര്‍ തെരുവത്തിന് സമ്മാനിക്കുന്നു
