പ്ലസ്ടു പരീക്ഷാഫലം പ്രഖ്യാപിച്ചു; 83.87 ശതമാനം വിജയം

തിരുവനന്തപുരം: പ്ലസ്ടു, വി.എച്ച്.എസ്.ഇ പരീക്ഷാ ഫലം പ്രഖ്യാപിച്ചു. പ്ലസ്ടുവിന് 83.87 ശതമാനമാണ് വിജയം. കഴിഞ്ഞ വര്‍ഷം 87.94 ആയിരുന്നു വിജയശതമാനം. വി.എച്ച്.എസ്.ഇക്ക് 78.26 ശതമാനമാണ് വിജയം. വിദ്യാഭ്യാസ മന്ത്രി വി. ശിവന്‍കുട്ടിയാണ് ഫലം പ്രഖ്യാപിച്ചത്. പ്ലസ്ടുവിന് വിജയശതമാനം ഏറ്റവും കൂടുതല്‍ കോഴിക്കോടും (87.79 %) കുറവ് വയനാടും (75.07%) ആണ്. 78 സ്‌കൂളുകള്‍ നൂറുമേനി വിജയം നേടി. മുന്‍ വര്‍ഷം 136 സ്‌കൂളുകളാണ് ഈ നേട്ടം സ്വന്തമാക്കിയത്. ഏറ്റവും കൂടുതല്‍ കുട്ടികള്‍ പരീക്ഷ എഴുതിയത് മലപ്പുറത്തും ഏറ്റവും കുറവുപേര്‍ പരീക്ഷ എഴുതിയത് വയനാട്ടിലുമാണ്.
മൂല്യ നിര്‍ണയത്തിന് ശേഷം 20 ദിവസം കൊണ്ടാണ് ഫലം പ്രഖ്യാപിച്ചത്. ജുലായ് 25 മുതല്‍ സേ പരീക്ഷ നടത്തും. സേ, ഇംപ്രൂവ്‌മെന്റ പരീക്ഷക്ക് ഈ മാസം 25 വരെ അപേക്ഷിക്കാം. പ്ലസ്ടുവിന് റഗുലര്‍ വിഭാഗത്തില്‍ 3,61,091 പരീക്ഷ എഴുതിയതില്‍ 3,02,865 പേര്‍ വിജയിച്ചു. സയന്‍സ് വിഭാഗത്തില്‍ 86. 14% പേരും ഹുമാനിറ്റീസില്‍ 75.61% പേരും ടെക്നിക്കല്‍ വിഭാഗത്തില്‍ 68.71% പേരും ആര്‍ട്സ് വിഭാഗത്തില്‍ 86.57% പേരും വിജയിച്ചു. 28450 വിദ്യാര്‍ഥികള്‍ മുഴുവന്‍ വിഷയങ്ങള്‍ക്കും എ പ്ലസ് നേടി. കൂടുതല്‍ കുട്ടികള്‍ എ പ്ലസ് നേടിയത് മലപ്പുറത്താണ്, 4283 പേര്‍. സര്‍ക്കാര്‍ സ്‌കൂളുകളില്‍ 81.72 ശതമാനമാണ് വിജയം. എയ്ഡഡ് സ്‌കൂളുകളില്‍ 86.02 % പേരും അണ്‍ എയ്ഡഡ് സ്‌കൂളുകളില്‍ 81.12 % പേരും വിജയിച്ചു. ഓപ്പണ്‍ സ്‌കൂളില്‍ 21,185 പേര്‍ വിജയിച്ചു. 47.19 % ആണ് വിജയം. വി.എച്ച്.എസ്.ഇക്ക് പരീക്ഷ എഴുതിയ 29,711 പേരില്‍ 23,251 പേര്‍ വിജയിച്ചു. വിജയശതമാനം കൂടുതല്‍ കൊല്ലത്തും കുറവ് കാസര്‍കോടുമാണ്. 178 കുട്ടികള്‍ എല്ലാ വിഷയങ്ങള്‍ക്കും എ പ്ലസ് നേടി. പ്ലസ് ടു പരീക്ഷകള്‍ക്ക് ഇത്തവണയും ഗ്രേസ് മാര്‍ക്കില്ല.