'വിമാനത്തിലെ പ്രതിഷേധം ആവശ്യമില്ലാത്തതായിരുന്നു എന്ന് ബോധ്യമുണ്ട്'

മുഖ്യമന്ത്രിക്കെതിരെ വിമാനത്തിൽ നടന്ന പ്രതിഷേധത്തെ പ്രോത്സാഹിപ്പിക്കുന്നില്ലെന്ന് കെ.പി.സി.സി പ്രസിഡന്റ് കെ. സുധാകരൻ. വിമാനത്തിലെ പ്രതിഷേധം ആവശ്യമില്ലാത്തതായിരുന്നു എന്ന് ബോധ്യമുണ്ടെന്നും സുധാകരൻ പറഞ്ഞു. സമരക്കാരുടെ ഉദ്ദേശശുദ്ധിയെ നിഷേധിക്കുന്നില്ലെന്നും സുധാകരൻ മാധ്യമങ്ങളോട് പറഞ്ഞു.

ഇ പി ജയരാജനെതിരായ പരാതിയുമായി മുന്നോട്ട് പോകും. ജയരാജനാണ് തള്ളിയിട്ടത്. വാ തുറന്നാല്‍ വിടുവായിത്തം അല്ലാതെ എന്ത് പറയണമെന്ന് അദ്ദേഹത്തിന് അറിയില്ല. സി.പി.ഐ(എം) എങ്ങനെയാണ് രാഷ്ട്രീയത്തിൽ അദ്ദേഹത്തെ സ്വീകരിക്കുന്നത് എന്നത് തന്നെ അത്ഭുതപ്പെടുത്തുന്നുവെന്നും സുധാകരൻ പറഞ്ഞു.

ഈ പാർട്ടിയെ എവിടേക്കാണ് കൊണ്ടുപോകുന്നതെന്ന് അണികൾ പുനരാലോചന നടത്തണം. എത്ര കോണ്‍ഗ്രസ് ഓഫീസുകൾ അടിച്ചുതകർത്തു? തങ്ങള്‍ക്കെന്താ തകർക്കാൻ പറ്റില്ലേ? പക്ഷേ, ഞങ്ങൾ അതിനെ പ്രോത്സാഹിപ്പിക്കുന്നില്ല. അത് പാർട്ടിയുടെ അന്തസ്സും പൊതുസ്വഭാവവുമാണ്. കോണ്‍ഗ്രസിന് ജനാധിപത്യ സ്വഭാവമുണ്ടെന്നും സുധാകരൻ പറഞ്ഞു.