ഇന്ത്യയുടെ കയറ്റുമതി മേഖല വളരുന്നു ; കയറ്റുമതിയിൽ വൻ കുതിപ്പുമായി ഇന്ത്യ

ന്യൂഡൽഹി : ഇന്ത്യയുടെ കയറ്റുമതി മേഖലയിൽ കുതിപ്പെന്ന് റിപ്പോർട്ട്. മെയ് മാസത്തിൽ രാജ്യത്തെ ചരക്ക് കയറ്റുമതി 20.55 ശതമാനം ഉയർന്ന് 38.94 ബില്യൺ ഡോളറിലെത്തി. അതേസമയം, വ്യാപാര കമ്മി റെക്കോർഡ് വർദ്ധനവോടെ 24.29 ബില്യൺ ഡോളറായി ഉയർന്നു. ഇറക്കുമതി 63.22 ബില്യൺ ഡോളറാണ്. കേന്ദ്രം പുറത്തുവിട്ട കണക്കുകൾ പ്രകാരം ഇറക്കുമതിയിൽ 62.83 ശതമാനം വർദ്ധനവുണ്ടായി.

2021-22 സാമ്പത്തിക വർഷത്തിൽ വ്യാപാരക്കമ്മി 6.53 ബില്യൺ ഡോളറായിരുന്നു. ഈ മാസത്തെ ഇറക്കുമതി 45.42 ശതമാനം ഉയർന്ന് 123.41 ബില്യൺ ഡോളറിലെത്തി. വ്യാപാരക്കമ്മി കഴിഞ്ഞ വർഷം ഇതേ കാലയളവിലെ 21.82 ബില്യൺ ഡോളറിൽ നിന്ന് 44.69 ബില്യൺ ഡോളറായി ഉയർന്നു.

പെട്രോളിയം, ക്രൂഡ് ഓയിൽ ഇറക്കുമതി മെയ് മാസത്തിൽ 102.72 ശതമാനം ഉയർന്ന് 19.2 ബില്യൺ ഡോളറിലെത്തി. കൽക്കരി, കോക്ക്, ഇഷ്ടിക എന്നിവയുടെ ഇറക്കുമതി 2 ബില്യൺ ഡോളറിൽ നിന്ന് 5.5 ബില്യൺ ഡോളറായി ഉയർന്നു. 2021 മെയ് മാസവുമായി താരതമ്യപ്പെടുത്തുമ്പോൾ ഈ സാമ്പത്തിക വർഷത്തിൽ സ്വർണ്ണ ഇറക്കുമതി 6 ബില്യൺ ഡോളർ ഉയർന്നു. കഴിഞ്ഞ വർഷം 677 മില്യൺ ഡോളറായിരുന്നു സ്വർണ ഇറക്കുമതി. അതേസമയം, രാസവസ്തുക്കളുടെ കയറ്റുമതി 17.35 ശതമാനം ഉയർന്ന് 2.5 ബില്യൺ ഡോളറിലെത്തി. എല്ലാ തുണിത്തരങ്ങളുടെയും, റെഡിമെയ്ഡ് വസ്ത്രങ്ങളുടേയും കയറ്റുമതി 27.85 ശതമാനവും, ഫാർമ കയറ്റുമതി 10.28 ശതമാനവും വർദ്ധിച്ചതായി കേന്ദ്രം പുറത്തുവിട്ട കണക്കുകൾ വ്യക്തമാക്കുന്നു.